1 Kownu

9 Di Salomo kaba bow na oso+ fu Yehovah, en eigi oso,+ nanga ala tra sani di a ben firi fu meki,+ 2 Yehovah sori ensrefi na Salomo wan di fu tu leisi, neleki fa a ben sori ensrefi na en di a ben de na a foto Gibeon.+ 3 Yehovah taigi en: „Mi yere a begi fu yu+ èn mi yere fa yu aksi mi fu du bun gi yu. Mi meki na oso disi di yu bow, kon santa.+ Fu ala ten na oso o tyari mi nen.+ Mi o luku+ na oso disi èn mi o sorgu en fu ala ten.+ 4 Neleki fa yu papa David+ gi yesi na mi nanga en heri ati+ èn na wan reti fasi,+ na so yu musu du tu.+ Du ala san mi taigi yu+ èn hori den komando+ nanga den wèt+ fu mi. 5 Efu yu du dati, dan mi o meki den bakapikin fu yu tiri Israel leki kownu fu ala ten, soleki fa mi pramisi yu papa David. Mi ben taigi en: ’Nowan sma na ini yu famiri o lasi a grani fu tron kownu fu Israel.’+ 6 Efu unu nanga den manpikin fu unu drai baka gi mi,+ efu un no hori den komando nanga den wèt di mi gi unu, ma unu e go dini tra gado+ èn unu e boigi gi den, 7 dan mi o kiri den Israelsma, so taki den no o libi moro na ini a kondre di mi gi den.+ Boiti dati, mi no o wani na oso disi moro+ di mi meki kon santa fu a tyari mi nen. Na so sma fu tra kondre o koti odo+ gi Israel èn den o spotu den. 8 Iya, na oso disi o tron wan brokopresi.+ Ala sma di o waka pasa drape, o fruwondru+ te den si san pasa nanga na oso. Na wan spotu fasi den o taki: ’Fu san ede Yehovah du so wan sani nanga a gron disi èn nanga na oso disi?’+ 9 Dan sma o piki den: ’Na fu di den gowe libi Yehovah, a Gado fu den, di ben tyari den afo fu den komoto na ini a kondre Egepte.+ Den go dini tra gado.+ Ne den boigi gi den fu anbegi den. Na fu dati ede Yehovah meki den ogri disi miti den.’”+

10 Na so Salomo bow na oso fu Yehovah+ nanga en eigi oso.+ Na ini tutenti yari Salomo bow den tu oso disi. Na a kaba fu a pisi ten dati, 11 Kownu Salomo gi Hiram tutenti foto na ini a kontren fu Galilea.+ (Kownu Hiram+ fu Tirus ben yepi Salomo,+ fu di a gi en sedre-udu, yaneifer-udu, nanga gowtu. Hiram gi Salomo ala san a ben wani.)+ 12 Ne Hiram komoto fu Tirus fu go luku den foto di Salomo gi en. Ma a no ben lobi den foto.+ 13 Dati meki a taigi Salomo: „Mi brada, na den foto disi yu wani gi mi?” Fu dati ede te na a dei fu tide, sma e kari den foto disi, Kabul.*

14 Disiten Hiram seni fo dusun wán hondro nanga fo kilo gowtu+ gi Kownu Salomo.

15 Disi na a tori fu den sma di Kownu Salomo ben teki fu wroko gi en.+ A ben meki den bow na oso fu Yehovah,+ en eigi oso, a Bigi Dan,+ a skotu+ fu Yerusalem, sosrefi den foto Hasor,+ Megido,+ nanga Geiser.+ 16 (Wan leisi Farao, a kownu fu Egepte, teki a foto Geiser abra, dan a sutu faya gi en. A kiri den Kanansma+ di ben e libi drape. Ma di en umapikin ben o gowe fu trow nanga Salomo, dan a kownu gi en umapikin+ a foto disi leki kado.) 17 Ne Salomo bow a foto Geiser baka. A bow Lagi Bet-Horon+ tu, 18 nanga Balat+ èn a foto Tamar di ben de na ini a pisi sabana di ben de na ini a kondre, 19 nanga ala den tra foto pe a ben meki furu maksin.+ Boiti dati, a bow foto pe a poti den asiwagi+ fu en èn a bow foto gi den sma di ben e rèi asi. Na so Salomo+ bow ala san a ben wani bow na ini Yerusalem, Libanon èn na ini a heri kontren di a ben e tiri. 20 Na a ten dati Amorietsma,+ Hètsma,+ Feresietsma,+ Hefietsma,+ nanga Yeibus-sma+ ben e libi ete na ini a kondre. Den sma disi no ben de Israelsma.+ 21 Den bakapikin fu den sma disi ben e libi ete na ini a kondre, fu di den Israelsma no ben man kiri den+ alamala. Na den bakapikin fu den sma disi Salomo teki fu wroko gi en leki srafu. Te na a dei fu tide den e du a wroko dati.+ 22 Ma Salomo no meki nowan fu den Israelsma wroko gi en leki srafu.+ Na presi fu dati a meki den wroko gi en leki fetiman, futuboi, granman, kapten fu a legre, nanga edeman fu den sma di e rèi asiwagi+ èn fu den wan di ben e rèi asi. 23 Feifi hondro feifitenti edeman fu den komsarsi ben de di ben e teki fesi na ini a wroko di ben musu du gi Salomo. Den ben de fesiman fu den wrokoman.+

24 Baka dati na umapikin fu a kownu fu Egepte+ komoto na a Foto fu David+ fu go na a oso di Salomo ben bow gi en. Na a ten dati Salomo ben bow a Bigi Dan.+

25 Dri tron+ wan yari Salomo ben e tyari bron-ofrandi nanga freide-ofrandi na tapu na altari di a ben bow gi Yehovah.+ A ben e tyari smoko-ofrandi tu na tapu na altari+ di ben de na fesi Yehovah. Te fu kaba a klari na oso+ fu Gado.

26 Kownu Salomo ben abi sipi di sma ben meki gi en na Eseyon-Geiber.+ A presi disi ben de krosibei fu Elot,+ na a syoro fu a Redi Se na ini a kondre Edom.+ 27 Hiram ben abi futuboi+ di ben sabi a se bun. Te den futuboi fu Salomo ben de na se nanga den sipi fu en, dan Hiram ben gwenti fu seni den sipiman fu en go makandra nanga den futuboi fu Salomo. 28 Ibri tron baka den ben e go na Ofir+ fu tyari tinafo dusun dri hondro siksitenti na fo kilo gowtu+ kon gi Kownu Salomo.