Filipisma

4 Sobun, mi lobi brada, tanapu kánkan+ leki bakaman fu Masra, soleki fa mi ben taigi unu kaba. Unu na mi brada di mi lobi èn di mi e angri fu si. Unu e gi mi prisiri èn unu na a pai* di mi kisi.+

2 Mi e begi Eyodia nanga Sentike fu meki a denki fu den kruderi nanga makandra+ te den e du a wroko fu Masra. 3 Iya, yu di e wroko makandra nanga mi èn di mi kan frutrow,+ mi wani aksi yu tu fu tan yepi den uma disi di strei makandra nanga mi+ gi a bun nyunsu, makandra nanga Kleimens èn nanga den trawan di wroko nanga mi tu.+ A nen fu den+ skrifi na ini a buku fu libi.+

4 Prisiri ala ten fu Masra ede.+ Ete wan tron mi o taki: Prisiri!+ 5 Meki ala sma kon sabi taki unu de klariklari fu fiti unsrefi na ala fasi.+ Masra de krosibei.+ 6 No broko un ede nanga nowan sani,+ ma begi Gado ala ten, begi en fayafaya+ èn taki en tangi tu. Na so a o kon sabi san unu wani aksi en,+ 7 dan a freide fu Gado+ di bigi moro iniwan sani di libisma man frustan, o kibri un ati+ nanga un frustan nanga yepi fu Krestes Yesus.

8 Te fu kaba, un brada, tan prakseri ala sani di tru, ala sani di seryusu, ala sani di reti, ala sani di krin,+ ala sani di e meki sma sori lobi, ala sani di sma e taki bun fu den, ala sani di bun nanga ala sani di warti fu sma prèise den.+ 9 Du ala den sani di mi ben leri unu, sosrefi den sani di unu ben teki leki a tru leri, di unu ben kon yere fu mi èn di unu ben e si mi e du.+ Dan a Gado fu freide+ o de nanga unu.

10 Leki futuboi fu Masra, mi e prisiri trutru, bika te fu kaba unu ben du wan sani gi mi baka.+ Aladi unu ben e prakseri mi, unu no ben abi na okasi fu sori taki unu ben e prakseri mi. 11 Mi e taigi unu disi, ma no fu di mi de na nowtu, bika mi ben leri fu breiti nanga san mi abi, awansi fa sani e waka gi mi.+ 12 Mi sabi san a wani taki fu abi pikinso nomo+ èn san a wani taki fu abi bun furu. Awansi fa sani ben e waka gi mi, iya, na ala fasi mi kon sabi san a wani taki fu nyan mi bere furu èn san a wani taki fu de nanga angri, san a wani taki fu abi bun furu èn san a wani taki fu no abi noti.+ 13 Mi man du ala sani nanga yepi fu a sma di e gi mi krakti.+

14 Ma toku na wan bun unu du di unu yepi mi+ na a ten di mi ben de na nowtu.+ 15 Fu taki en leti, un Filipisma, baka di unu yere a bun nyunsu, iya, na a ten di mi gowe fu Masedonia, dan boiti unu, nowan gemeente yepi mi noso teki a yepi fu mi,+ 16 bika srefi di mi ben de na Tesalonika unu ben seni sani kon di mi ben abi fanowdu. A no wán leisi nomo unu du dati, ma tu leisi srefi. 17 A no presenti mi e suku fu kisi,+ ma mi wani taki unu kisi den blesi+ di o meki a pai fu unu kon moro bigi. 18 Toku mi abi ala sani di mi abi fanowdu, iya, moro leki dati srefi. Now di Epafroditus+ gi mi den sani di unu ben seni kon, mi no e mankeri noti moro. Den sani disi de leki wan switismeri,+ leki wan ofrandi di fiti+ èn di e plisi Gado. 19 We, now a Gado fu mi+ di gudu pasa marki+ o meki Krestes Yesus gi unu ala san unu abi fanowdu.+ 20 Sobun, meki Gado wi Tata kisi glori fu têgo, iya, fu ala ten.+ Amen.

21 Taki ala den santawan di de wán nanga Krestes Yesus,+ odi gi mi.+ Den brada di de nanga mi, e seni taki unu odi. 22 Ala den santawan, ma spesrutu den wan fu na oso fu Grankownu, e seni taki unu odi.+

23 Meki Masra Yesus Krestes sori unu bun-ati, fu di unu abi a yoisti fasi fu denki.+