Deuteronomium

4 We, Israel, arki den wèt nanga den komando di mi o leri unu. Un musu gi yesi na den, so taki unu kan tan na libi,+ èn so taki unu kan teki a kondre di Yehovah, a Gado fu den afo fu unu, gi unu. 2 Un musu gi yesi na den komando fu Yehovah un Gado di mi e taigi unu. Un no musu poti moro komando gi unsrefi èn un no musu puru nowan fu den tu.+

3 Un sabi a tori fu a Bâal fu Peor, a no so? Nanga un eigi ai un si san Yehovah du nanga ibri sma di go dini a Bâal fu Peor.+ Yehovah un Gado kiri den alamala.+ 4 Ma fu di unu tai hori+ na Yehovah un Gado, meki unu de na libi ete. 5 Mi gi unu wèt+ nanga komando,+ soleki fa mi Gado Yehovah taigi mi fu du. Un musu gi yesi na den te unu de na ini a kondre di unu o teki abra. 6 Efu unu tan gi yesi na den wèt èn unu e du san den taki, dan den pipel di yere fu den wèt disi sa si taki unu koni+ èn taki unu abi sabi.+ Den o taki: ’A no de fu taki dati a bigi pipel disi koni èn den sabi sani.’+ 7 Bika sortuwan fu den bigi pipel+ abi gado di e poti prakseri na den, neleki fa Yehovah wi Gado e poti prakseri na wi? Ala ten te wi e begi, a e arki wi.+ 8 Sortu bigi pipel abi wèt nanga komando di bun moro ala den wèt di mi gi unu tide?+

9 Ma un musu waka nanga koni èn luku bun+ taki unu no frigiti den sani di unu si.+ Un musu memre den un heri libi langa.+ Un musu fruteri un pikin nanga un granpikin+ fu 10 a dei di un ben e tanapu na fesi Yehovah un Gado na Horeb.+ A dei dati Yehovah taigi mi: ’Tyari a pipel kon makandra gi mi, dan den musu arki san mi abi fu taigi den.+ Den musu leri fu lespeki+ mi ala den dei di den e libi na grontapu. Meki den leri den pikin fu den fu du dati tu.’+

11 Dati meki unu kon tanapu krosibei na a futu fu a bergi. Wan bigi faya ben e bron na tapu a bergi èn a ben doro te na hemel. Dungru wolku ben de èn ala sani ben kon dungru pikapika.+ 12 Ne Yehovah bigin taki nanga unu èn unu yere en sten na ini a faya.+ Na soso a sten+ unu ben e yere, ma unu no ben si noti.+ 13 Dan Gado fruteri unu a frubontu+ fu en èn a taigi unu fu gi yesi na dati. Iya, a gi unu den Tin Komando.*+ Baka dati a skrifi den na tapu tu plata ston.+ 14 Na a ten dati Yehovah taigi mi fu leri unu den wèt nanga den komando fu en. Un musu gi yesi na den te unu abra go na ini a kondre di o de fu unu.+

15 Un musu luku bun,+ bika di Yehovah taki nanga unu na mindri fu a faya na Horeb, unu no ben si nowan sma+ na a dei dati, a no so? 16 Sobun, unu no musu du sani di o abi takru bakapisi gi unu.+ Un no musu meki nowan popki fu anbegi en èn nowan tra sani di gersi wan man noso wan uma,+ 17 wan meti na grontapu,+ wan fowru di e frei na loktu,+ 18 wan sani di e kroipi na gron, noso wan fisi+ na ini a watra di de na grontapu. 19 Te unu luku go na hemel èn unu e si a son, a mun, den stari, nanga ala tra sani na hemel di Yehovah un Gado meki gi ala sma na grontapu,+ dan un no musu kisi a firi fu boigi gi den fu anbegi den.+ 20 Na unu Yehovah puru na ini a kondre Egepte di ben de leki wan onfu pe sma e smèlter isri.+ Tide na a dei, a meki unu kon tron en spesrutu pipel.+

21 Na fu unu ede Yehovah ati bron nanga mi.+ Dati meki a sweri taki mi no o abra Yordan-liba fu go na ini a bun kondre di Yehovah un Gado gi unu.+ 22 Na ini a kontren disi mi o dede.+ Mi no o abra Yordan-liba. Ma unu o abra a liba èn unu o teki a bun kondre disi abra. 23 Sorgu taki unu no frigiti a frubontu di Yehovah un Gado meki nanga unu.+ Un no musu meki nowan popki di gersi wan fu den sani di Yehovah un Gado taigi unu fu no meki.+ 24 Bika Yehovah un Gado de leki wan faya di e bron sani krinkrin.+ A de wan Gado di wani taki sma anbegi en wawan.+

25 Un no musu du sani di o abi takru bakapisi gi unu,+ awinsi unu e tan na ini a kondre wan langa ten kaba èn unu abi pikin nanga granpikin. Un no musu meki nowan popki+ èn nowan tra sani fu anbegi dati. Un no musu du wan sani di Yehovah un Gado+ no feni bun èn di e meki en ati bron. 26 Tide ala sma na hemel nanga grontapu musu sabi+ taki efu unu du wan fu den ogri disi, dan fu tru, unu o dede wantewante na ini a kondre di unu o teki na abrasei fu Yordan-liba. Unu no o libi langa na ini a kondre. Na dede unu o dede.+ 27 Yehovah o panya unu na mindri ala den tra pipel.+ Wan tu fu unu nomo o tan abra+ na mindri den pipel pe Yehovah o yagi unu go. 28 Te un de na mindri den pipel, unu o abi fu dini gado+ di libisma meki fu udu nanga ston,+ gado di no man si, yere, nyan, noso smeri.+

29 Te unu de drape èn unu e suku Yehovah un Gado, dan unu o feni en trutru,+ bika nanga un heri ati èn nanga un heri libi* unu o suku en.+ 30 Te ala den sani di mi taki pasa nanga unu èn unu de na ini bigi banawtu, dan unu o drai go baka na Yehovah un Gado+ èn unu o abi fu gi yesi na en.+ 31 Bika Yehovah un Gado na wan Gado di abi sari-ati.+ A no o gowe libi unu, a no o kiri unu, èn a no o frigiti a frubontu+ di a meki nanga den afo fu unu.

32 Grantangi, aksi now fa a ben de fositen,+ fosi unu ben de na libi. Yu kan aksi iniwan sma fu a wan sei fu grontapu te na a tra sei. Sensi a dei di Gado meki libisma na grontapu,+ noiti ete wan sma du so wan bigi sani, èn noiti sma yere taki so wan sani pasa kaba.+ 33 Wan tra pipel de di tan na libi di den yere a sten fu Gado na ini wan faya, neleki fa unu yere dati?+ 34 Nanga un eigi ai unu si fa Yehovah un Gado tyari tesi kon,+ fa a du bigi sani+ nanga wondru,+ fa a feti,+ fa a gebroiki en makti nanga krakti,+ èn fa a du sani di e meki sma frede,+ soso fu puru unu na ini katibo na Egepte, so taki unu ben kan tron en pipel. Oiti unu yere taki a pruberi fu du so wan sani gi wan tra pipel? 35 Na unu Yehovah sori den sani disi, so taki unu kan sabi taki en na a tru Gado.+ Nowan trawan no de, boiti en.+ 36 Komoto fu hemel a taki nanga unu fu leri unu fa unu musu tyari unsrefi. Na grontapu a meki unu si a bigi faya fu en, èn unu yere en sten na ini a faya.+

37 Toku unu tan na libi, fu di a ben lobi den afo fu unu. Dati meki a teki den bakapikin fu den leki en pipel,+ èn nanga en bigi krakti a tyari unu komoto na Egepte.+ A heri pisi ten dati a tan poti prakseri na unu. 38 A yagi pipel di bigi èn tranga moro unu, so taki a kan tyari unu go na ini a kondre fu den. A gi unu a kondre soleki fa unu srefi e si tide.+ 39 Tide na a dei un sabi heri bun taki Yehovah na a tru Gado na hemel èn na grontapu.+ Nowan tra Gado de.+ No frigiti dati noiti. 40 Un musu tan gi yesi na den wèt+ nanga den komando fu en di mi e fruteri unu tide. Efu unu du dati, dan ala ten sani o waka bun gi unu nanga den pikin fu unu,+ èn unu sa libi langa na ini a kondre di Yehovah un Gado gi unu.”+

41 Na a ten dati, Moses sori den Israelsma dri foto na a sei fu Yordan-liba pe son e opo.+ 42 Wan sma di ben kiri wan trawan ben kan lowe go na wan fu den foto disi, efu a no ben kiri a trawan fu espresi+ èn efu a no ben abi bita-ati gi a trawan na a ten dati.+ Sobun, a ben musu lowe go na wan fu den foto disi fu tan na libi.+ 43 Den sma fu a lo fu Ruben ben kan lowe go na a foto Beiser+ na ini a sabana fu a bergikontren. Den sma fu a lo fu Gad ben kan lowe go na a foto Ramot+ na ini Gilead. Den sma fu a lo fu Manase+ ben kan lowe go na a foto Golan+ na ini Basan.

44 Disi na den wèt+ di Moses gi den Israelsma. 45 Disi na den rai,+ den komando+ nanga den wèt+ di Moses taigi den Israelsma di den komoto na Egepte. 46 Na a ten dati den ben de na ini a birti fu Yordan-liba, na a lagipresi di de na fesi Bet-Peor.+ Bet-Peor de na ini a kondre fu Sihon, a kownu fu den Amorietsma di ben e tan na Hesbon.+ Moses nanga den Israelsma ben wini a kownu dati di den komoto fu Egepte.+ 47 Den teki a kondre fu en èn a kondre fu Kownu Ok+ fu Basan. Den tu kownu disi ben e tiri den Amorietsma di ben tan na ini a birti fu Yordan-liba, na a sei pe son e opo. 48 Den Amorietsma ben e tan na ini a heri kontren fu Arower+ di de na a syoro fu a liba na Arnon-lagipresi, te na Sion-bergi di den e kari Hermon-bergi+ tu. 49 Boiti dati, den ben e tan na a heri kontren fu Araba+ di de na owstusei fu Yordan-liba, te na a se fu Araba+ na a futu fu Pisga-bergi.+