Yob

39 Yu sabi o ten den bergikrabita e meki den pikin na den stonbergi?+

Yu sabi o ten den dia e meki den pikin+ nanga furu pen?

 2 Yu sabi omeni mun den de nanga bere fosi den meki wan pikin?

Yu sabi o ten den e meki den pikin?

 3 Den e beni te den e meki den pikin.

Baka dati den no abi pen moro.

 4 Den pikin fu den e kon stampu èn den e gro kon bigi na ini a sabana.

Dan den e gowe èn den no e drai kon baka.

 5 Suma meki den sabanaburiki+ lon fri na ini a sabana?

Suma lusu den titei fu den buriki di sma no e kweki?

 6 Mi gi den a sabana

Èn den e tan na presi pe a gron sowtu.+

 7 A sabanaburiki e lafu te a e yere sma e meki dyugudyugu na ini den foto.

A no e yere a babari fu den wan di e luru fu kisi en.+

 8 A e wakawaka na den bergi fu suku nyanyan.+

A e suku iniwan grun grasi+ di de.

 9 Yu man basi wan mankaw fu a sabana?+

A o tan na ini yu kawpen na neti?

10 Yu man tai en na wan titei èn seni en fu meki pikin gotro na ini yu gron?

A o waka na yu baka na ini yu gron fu drai a doti+ gi yu?

11 Yu o frutrow en, fu di a abi someni krakti?

Yu o libi en fu du a hebi wroko fu yu?

12 Yu kan frutrow na en tapu taki a o tyari a nyanyan fu den gron kon,

Èn taki a o tyari na aleisi fu yu go na a presi pe den e masi aleisi?

13 Wan uma-stroisifowru e naki nanga den frei fu en, fu di a e prisiri?

Noso a abi den frei nanga den wiwiri fu wan bigi fowru?*+

14 A e libi den eksi fu en na ini wan olo na gron,

Èn a doti e meki den tan waran.

15 A e frigiti taki wan sma futu kan masi den

Èn taki wan tra meti kan trapu na den tapu.

16 A no e sorgu den pikin fu en na wan lobi-ati fasi. A e du leki den no de fu en.+

A no e broko en ede taki ogri kan miti den pikin fu en. Sobun, ala muiti di a e du na fu soso.

17 Gado meki a frigiti iniwan koni sani.

A no gi en wan pikinso frustan srefi.+

18 Te a e lon èn a e naki nanga den frei fu en,

A e lafu na asi nanga a sma di e rèi na tapu.

19 Yu man gi wan asi krakti?+

Yu man poti moi langa wiwiri na en bakaneki?

20 Yu man meki a dyompo leki wan sprenka?

Te a e tanapu so hei èn a e blo hebi, yu musu fu frede en.+

21 A e prisiri te a e stampu+ nanga ala en krakti na a lagipresi.

Dan a e lon go miti den fetisani.+

22 A e lafu te a e si ogri. A no e frede.+

A no e wai gi nowan feti-owru.

23 Na en seibere wan peirikokro e seki.

Na en seibere na isri fu wan peiri èn wan lansri e brenki.

24 A e stampu fu prisiri èn a e nyan doti.

A no e bribi taki na wan tutu a yere.

25 Ma te a yere a tutu trutru, a e bari fu prisiri

Fu farawe a man smeri a feti kaba,

Èn a e yere a babari fu den edeman nanga den srudati di e go na a feti.+

26 Na yu koni so fu meki a pikin aka bradi en frei go na a winti fu zuidsei,

So taki a man opo go na loktu?

27 Na yu taigi a bigi aka+ fu frei so hei?

Na yu e sorgu taki a e bow en nesi so hei?+

28 Na yu e meki taki a e tan na wan stonbergi? Na yu e meki taki a e sribi na neti

Na a moro hei pisi fu a stonbergi pe nowan sma kan kon?

29 Na drape a e sidon e luku teleki a si wan sani fu nyan.+

A e tan luku fu si sani di de bun fara.

30 Den pikin fu en e dringi brudu.

Pe den dedewan de, na drape a de tu.”+