Yeremia
12 Yehovah, yu na wan reti-ati+ Gado. Srefi te mi e krutu nanga yu fu wan tori noso fu a fasi fa yu e koti krutu, yu e du san reti. Ma fu san ede sani e waka bun gi den ogri sma?+ Fu san ede den bedrigiman no abi broko-ede? 2 Yu prani den èn den teki rutu. Den e gro moro nanga moro èn den e meki froktu. Doronomo den e taki fu yu, ma den ati* de farawe fu yu.+ 3 Ma yu sabi mi heri bun,+ Yehovah. Yu e si mi èn yu e ondrosuku mi ati. Yu si taki mi ati de nanga yu trutru.+ Sobun, poti den na wan sei leki skapu di sma o tyari go srakti.+ Poti den aparti fu kiri den wan dei. 4 O langa a kondre o drei gowe ete?+ O langa den bon na ini den gron o drei?+ Nowan meti noso fowru de moro,+ fu di den sma fu a kondre ogri srefisrefi. Den taki: „A no o si san o pasa nanga wi.”
5 Dan Gado taigi mi: „Di yu strei lon nanga libisma, yu kon weri. We dan fa yu o man strei lon nanga asi?+ Na ini a kondre pe sani e waka bun yu no e frede.+ Ma fa yu o du te yu de na mindri den bigi grangran na sei Yordan-liba?+ 6 Yu eigi brada èn srefi den sma fu yu papa osofamiri e bedrigi yu.+ Den e bari sani gi yu. No frutrow den, soso fu di den e taigi yu bun sani.+
7 Mi gowe libi mi oso.+ Mi gowe libi mi gudu.+ Mi meki feanti teki mi lobi pipel tyari gowe.+ 8 Mi e si mi gudu leki wan lew na busi. A opo en sten gi mi. Dati meki mi no wani si en na ai kwetikweti.+ 9 Mi e si mi gudu+ leki wan aka di abi furu kloru. Tra aka e kon na en tapu fu nyan en.+ Ala un busimeti, kon makandra. Un kon nyan.+ 10 Furu skapuman+ pori mi droifidyari.+ Den trapu ala sani na mi gron.+ Den meki mi moi+ gron tron wan brokopresi na ini a sabana. 11 Sma meki a tron wan brokopresi.+ A drei gowe. Mi e si en leki wan brokopresi.+ A heri kondre tron wan brokopresi, ma nowan sma e poti prakseri na dati.+ 12 Na ala den pasi pe furu sma e waka na ini a sabana, sma kon fu pori a kondre. A feti-owru fu Yehovah e kiri sma fu a wan sei fu a kondre te na a tra sei.+ Nowan sma e firi korostu. 13 Den sai aleisi, ma den koti soso maka.+ Den wroko so tranga taki den kon siki, ma den no o feni nowan wini fu dati.+ Yehovah ati e bron nanga den trutru èn a no o meki nyanyan gro na den gron fu den. Dati meki den e syen.”
14 Yehovah taki: „Ala den ogri pipel lontu mi+ di e du ogri nanga a kondre di mi gi mi pipel Israel,+ mi o rutu puru na den kondre.+ Boiti dati mi o rutu den sma fu Yuda puru na den mindri.+ 15 Baka te mi rutu den puru mi o sari den baka+ èn mi o tyari den kon baka. Iya, mi o tyari ibriwan fu den kon baka na den eigi kondre èn na den eigi gron.”+
16 „Fosi, den ben leri mi pipel fu meki sweri na ini a nen fu Bâal.+ Ma efu den leri fu waka a pasi fu mi pipel èn efu den e meki sweri na ini mi nen,+ dan den o de leki mi pipel tu. Iya, efu den e taki: ’Mi e sweri na a libi fu Yehovah!’, dan sani o go bun nanga den na mindri mi pipel. 17 Ma efu den no gi yesi, dan mi o rutu den puru èn mi o figi den puru”,+ na so Yehovah taki.