Esekièl
22 Baka dati Yehovah taigi mi: 2 „Manpikin fu libisma, yu o krutu+ den sma fu a foto disi di lobi kiri trawan?+ Yu de srekasreka fu krutu den? Yu o fruteri den sortu tegu sani den du?+ 3 Yu musu taki: ’Disi na san a Moro Hei Masra Yehovah taki: „Yu na wan foto di e kiri yu eigi sma.+ Yu o du dati teleki yu ten doro+ fu kisi krutu. Fu di yu meki fisti gado na ala sei, meki yu no de krin.+ 4 Yu sondu fu di yu kiri sma.+ Yu meki fisti gado. Na fu dati ede yu no krin.+ Den sani di yu du meki taki yu no abi furu ten moro. Dyonsro yu o kisi strafu. Dati meki mi o meki yu tron wan spotupopki gi den pipel fu grontapu. Sma fu ala kondre o wisiwasi yu.+ 5 Yu na wan foto di abi porinen èn di e du wan lo bruya sani. Dati meki den kondre di de krosibei fu yu nanga den wan di de farawe fu yu o wisiwasi yu.+ 6 Luku, ibriwan fu den edeman+ fu Israel di de na ini yu, Yerusalem, e gebroiki en makti fu kiri sma.+ 7 Den pina den papa nanga mama di e libi na ini yu.+ Den bedrigi den trakondre sma di de na ini yu.+ Na ini yu den du ogri nanga den pikin di no abi papa èn nanga den uma di den masra dede kaba.”’”+
8 „’Yu wisiwasi den santa presi fu mi èn yu no sori lespeki gi den Sabat fu mi.+ 9 Na ini yu sma de di e taki ogri-ati lei fu trawan fu kan kiri den.+ Den go nyan den ofrandi di sma e tyari gi den falsi gado na tapu den bergi fu yu.+ Leti na ini yu den du ogri sondro fu syen.+ 10 Den sma disi e libi nanga a wefi fu den papa.*+ Den didon nanga uma di no krin, fu di den uma abi den munsiki. Na so den gi den uma syen.+ 11 Wan man du wan tegu sani nanga a wefi fu en mati.+ Sondro fu syen wan man doti a wefi fu en manpikin, fu di a go didon nanga en.+ Na ini yu wan man didon nanga en sisa, iya, na umapikin fu en eigi papa. Na so a gi en syen.+ 12 Den teki tyuku fu kiri sma na ini yu.+ Yu aksi sma rente+ èn yu meki moni na den tapu.+ Na wan ogri-ati fasi yu e bedrigi den mati fu yu,+ fu kan meki moni na den tapu.+ Boiti dati, yu frigiti mi’,+ na so a Moro Hei Masra Yehovah taki.
13 ’Luku, mi e tegu+ gi a kruka fasi fa yu e meki moni.+ Mi no lobi en srefisrefi taki yu e kiri den sma di e libi na ini yu.+ 14 Yu o abi deki-ati,+ noso yu o abi nofo krakti te mi o du wan sani nanga yu?+ Na mi, Yehovah, taki so èn na mi o du en.+ 15 Mi o panya yu go na den pipel èn mi o yagi yu go na tra kondre.+ Mi o pori den sani fu yu di e meki taki yu no krin.+ 16 Yu o kisi bigi syen èn ala den pipel fu grontapu o si dati. Yu sa musu fu sabi taki mi na Yehovah.’”+
17 Baka dati Yehovah taigi mi: 18 „Manpikin fu libisma, den Israelsma kon de leki doti skuma.+ Den alamala de leki kopro, blik, isri, nanga loto na ini wan onfu. Iya, den kon de leki furu doti skuma di e kon na tapu te sma e smèlter solfru.+
19 Dati meki a Moro Hei Masra Yehovah taki: ’Fu di unu kon de leki furu doti skuma,+ meki mi e tyari unu kon na wán na ini Yerusalem.+ 20 Neleki fa sma e poti solfru, kopro, isri,+ loto, nanga blik na ini wan onfu èn den e wai+ a faya fu meki den smèlter,+ na so mi o tyari unu kon na wán fu puru atibron na unu tapu. Mi o blo fu meki unu smèlter. 21 Mi o tyari unu kon na wán èn mi o blo na un tapu fu puru atibron na unu tapu.+ A o de leki wan faya di o smèlter unu na ini a foto.+ 22 Neleki fa sma e smèlter solfru na ini wan onfu, na so unu o smèlter na ini a foto. Unu sa musu fu sabi taki na mi, Yehovah, puru atibron na unu tapu.’”+
23 Ne Yehovah taigi mi: 24 „Manpikin fu libisma, taigi en: ’Yu na wan kondre di no krin èn wan kondre pe alen no fadon na a ten di a kisi krutu.+ 25 Den profeiti di e libi drape span anu makandra fu du ogri.+ Den tyari densrefi neleki wan lew di e meki babari èn di e priti tra meti.+ Den e swari sma.+ Doronomo den e teki den gudu èn den diri sani fu tra sma.+ Den meki taki den uma na ini a kondre di den masra dede kaba, kon moro furu.+ 26 Srefi den priester di e libi drape no hori a wèt fu mi.+ Den e tan doti den santa presi fu mi.+ Den no sabi+ san santa èn san no santa.+ Den no leri sma a difrenti na mindri san krin èn san no krin.+ Den no hori den Sabat fu mi.+ Den e pori mi nen.+ 27 Den granman di e libi na ini a kondre, e gi sma mankeri leki ogri busidagu di e priti tra meti.+ Den e kiri sma fu kan meki moni na wan kruka fasi.+ 28 Den profeiti tapu den sondu fu den granman, neleki te sma e ferfi wan skotu kon weti.+ Den e fruteri den granman fisyun di no o kon tru+ èn den e lei gi den te den e koti luku.+ Den e taki: „Disi na san a Moro Hei Masra Yehovah taki”, aladi a no Yehovah taki so. 29 A pipel fu a kondre span anu makandra fu bedrigi sma.+ Nanga tranga den fufuru sma sani tyari gowe,+ den pina den mofinawan nanga den pôti sma.+ Den bedrigi den trakondre sma èn den no krutu sani na wan reti fasi.’+
30 ’Mi ben e luku suma fu den ben o meki a ston skotu kon bun baka+ èn suma ben o tanapu na mi fesi na a olo fu a skotu,+ so taki mi no ben o meki a kondre kisi pori.+ Ma mi no feni nowan sma. 31 Dati meki mi o krutu den.+ Na atibron fu mi o de leki wan faya di o kiri den.+ Mi o strafu den gi den ogri di den du’,+ na so a Moro Hei Masra Yehovah taki.”