Yob

 2 „Un arki bun san mi abi fu taki,

Èn meki den sani di mi taki, de wan trowstu gi unu.

 3 Un abi pasensi nanga mi, meki mi taki.

Baka te mi taki, dan ibriwan fu unu kan spotu mi.+

 4 Na libisma mi e fruteri den broko-ede fu mi?

Fu san ede mi no e lasi pasensi?

 5 Un drai luku mi nanga opo mofo,

Èn un poti un anu na tapu un mofo.+

 6 Bika te mi e prakseri den sani disi, dan misrefi e bruya

Èn mi skin e beifi.

 7 Fu san ede den ogri sma e tan na libi?+

Fu san ede den e libi teleki den kon owru èn fu san ede den gudu moro trawan?+

 8 Nanga den eigi ai den si fa den pikin fu den e gro kon bigi,

Èn fa den e kisi moro nanga moro bakapikin.

 9 Ala sani e waka bun na ini den oso, èn nowan sma drape e frede.+

A fonfon-tiki fu Gado no de na den tapu.

10 Den mankaw fu den abi furu pikin,

Fu di den umakaw no e lasi bere èn den e meki furu pikin.+

11 Den e seni den yongu pikin fu den go na dorosei leki wan ipi skapu.

Èn den pikin fu den e dyompodyompo fu prisiri.

12 Den e singi èn den e prei poku nanga tyengretyengre èn nanga harpu.+

Den e meki prisiri te den e yere a froiti.

13 Ala dei den e prisiri,+

Èn sondro problema den e saka go na ini Grebi.*

14 Den e taigi a tru Gado: ’Libi wi!+

Wi no wani libi na a fasi fa yu wani.+

15 Suma na a Almaktiwan, taki wi musu dini en?+

Sortu wini wi kisi di wi taki nanga en?’+

16 Ma den no man sorgu taki sani waka bun nanga den.+

Mi no arki nowan rai fu den ogri sma.+

17 Omeni leisi a pasa taki a faya fu a lampu fu den ogri sma dede?+

Omeni leisi rampu e miti den?

Omeni leisi Gado kiri den, fu di en ati bron nanga den?+

18 Yu denki taki den e tron leki drei grasi di a winti e tyari gowe,+

Èn leki aleisibuba di wan tranga winti e wai gowe?

19 Gado o meki a strafu fu den kon na tapu den pikin fu den.+

Te a o strafu den, dan den o sabi dati.+

20 Nanga den eigi ai den o si fa rampu e miti den.

Den o dringi na atibron fu na Almaktiwan.+

21 Den o man prisiri nanga den pikin fu den,

Efu den no libi langa nofo?+

22 Efu Gado srefi e krutu den heihei man,+

Den o man leri en wan sani?+

23 Den e dede aladi den abi ala sani na ini a libi,+

Den no abi nowan broko-ede, den no e frede noti,

24 Den bowtu fu den kon fatu,

Èn den bonyo fu den tranga èn gosontu.

25 Tra sma e firi brokosaka teleki den dede.

Den no feni nowan bun na ini a libi.+

26 Toku den alamala o didon na ini a doti,+

Èn woron o tapu den leki wan krosi.+

27 Mi sabi san unu e denki.

Mi sabi sortu ogri unu wani du nanga mi.+

28 Unu taki: ’Pe na oso fu den heihei man de?

Pe a tenti noso a tanpe fu den ogriwan de?’+

29 Unu no aksi den sma di gwenti waka go na difrenti presi?

Efu unu ondrosuku finifini san den taki, dan unu ben o si

30 Taki noti e pasa nanga den ogri sma te rampu kon,+

Èn taki den e kisi frulusu na a dei fu banawtu.

31 Suma abi a deki-ati fu taigi den leti na ini den fesi sortu ogri den du?+

Suma o pai den gi san den du?+

32 Sma o tyari den go na beripe,+

Èn sma o hori wakti na a grebi fu den.

33 A doti di de na den tapu o de wan switi sani gi den.+

Ala tra libisma o kon na den baka.+

Èn sma no man teri den wan di dede fosi den.

34 Sobun, na fu soso unu e pruberi fu trowstu mi.+

Den sani di unu e taigi mi, na soso lei!”