1 Kownu

2 A ten ben e doro taki David ben o dede.+ Dati meki a taigi en manpikin Salomo: 2 „Luku, mi o dede neleki fa ala tra sma na grontapu e dede te fu kaba.+ No frede.+ Sori taki yu na wan man+ èn taki yu abi deki-ati. 3 Yu musu gi yesi na Yehovah yu Gado. Yu musu du ala san a taigi yu+ èn yu musu hori den komando, den markitiki, nanga den wèt fu en.+ Arki den rai fu en sosrefi. Du ala den sani disi soleki fa a skrifi na ini a wèt di Gado ben gi Moses.+ Na so yu o man du ala sani na wan koni fasi, awinsi pe yu e go. 4 Dan Yehovah o du ala san a pramisi fu du gi mi.+ A ben taigi mi: ’Efu den manpikin fu yu+ e du ala sani soifri+ leki fa mi taki+ èn den e du dati nanga den heri ati+ èn nanga ala den krakti, dan nowan sma na ini yu famiri o lasi a grani fu tron kownu fu Israel.’+

5 Yu srefi sabi heri bun san Yoab, a manpikin fu Seruya, du nanga mi.+ Yu sabi san a du nanga Abner,+ a manpikin fu Ner èn nanga Amasa,+ a manpikin fu Yeiter.+ A kiri den tu legre-edeman disi fu Israel na wan ten di ala sani ben e waka bun. Di a kiri den, dan a brudu+ fu den kon na tapu a leribuba di ben tai na en mindribere èn na tapu den susu di a ben weri. 6 Meki a koni fu yu tyari yu+ èn no meki na owru man disi saka go na ini Grebi+ na ini freide.+

7 Yu musu sori den manpikin fu a Gilead man Barsilai,+ bun-ati. Meki den sidon nyan nanga yu na wán tafra, makandra nanga den sma di gwenti nyan nanga yu,+ bika di mi ben abi fu lon gi yu brada Absalom,+ den man disi ben kon yepi mi.+

8 Simei+ e tan krosibei fu yu. A man disi na a manpikin fu Gera, wan man fu a dorpu Bahurim+ na ini a kontren fu a lo fu Benyamin. A dei di mi ben e go na Mahanayim,+ a fluku mi èn a taki wan lo ogri-ati sani fu hati mi.+ Na en ben kon miti mi na Yordan-liba,+ soso fu mi kan sweri gi en na Yehovah taki mi no ben o kiri en nanga feti-owru.+ 9 Yu na wan koni man+ èn yu sabi san yu musu du nanga Simei. Yu no musu libi en so, ma yu musu strafu en.+ Kiri a man disi. No meki a tan libi teleki a kon owru+ èn dede te fu kaba.”+

10 Baka dati David dede. Ne den beri en na ini a Foto fu David.+ 11 Ala nanga ala David ben tiri leki kownu fu Israel fotenti yari langa.+ Na ini Hebron+ a tiri seibi yari+ èn na ini Yerusalem a tiri dritenti na dri yari.+

12 Ne Salomo go sidon na tapu a kownusturu fu en papa David+ fu tiri na presi fu en. Safrisafri a kownukondre fu en ben kon moro tranga.+

13 Baka wan pisi ten Adonia, a manpikin fu Hagit, go na Batseiba,+ a mama fu Salomo. Batseiba aksi Adonia: „Na bun tyari yu kon dyaso?”+ Adonia piki en: „Iya, na bun tyari mi kon.” 14 Dan Adonia taki: „Mi wani aksi yu wan sani.” Ne Batseiba taigi en: „Yu kan taki.”+ 15 Dan Adonia taki: „Yu sabi taki na mi ben musu tiri a kownukondre. Ala sma na ini Israel ben wani taki mi ben musu tron kownu.+ Ma sani waka tra fasi. Now mi brada tron kownu, bika na dati Yehovah ben taki.+ 16 Ma mi wani aksi yu wan sani. Mi e begi yu fu yepi mi.”+ Batseiba piki en: „Yu kan taki.” 17 Ne Adonia taki: „Mi e begi yu fu taigi Kownu Salomo fu gi mi a Sunem uma+ Abisak+ leki wefi. Mi sabi taki a o du san yu aksi en.” 18 Ne Batseiba taki: „A bun! Mi srefi o go taki nanga Kownu gi yu.”

19 Sobun, Batseiba go na Kownu Salomo fu go aksi en a sani di Adonia ben wani.+ Wantewante Kownu opo tanapu.+ Dan a waka go miti Batseiba èn a boigi gi en.+ Baka dati a go sidon na tapu en kownusturu èn a meki sma poti wan sturu leti na en reti-anusei+ fu meki en mama sidon. 20 Dan Batseiba taki: „Wan pikin sani mi wani aksi yu fu du gi mi. Mi e begi yu, du san mi o aksi yu.” Ne Kownu taigi en: „Mi mama, yu kan taki. Mi o du san yu aksi mi.” 21 Batseiba taki: „Meki yu brada Adonia teki a Sunem uma Abisak leki wefi.” 22 Ne Kownu Salomo piki en mama: „Fu san ede yu e aksi mi fu meki Adonia trow nanga a Sunem uma Abisak? Dan moro betre yu aksi mi fu meki a tron kownu tu+ (bika en na mi brada èn a owru moro mi).+ Yu no wani aksi mi fu meki Priester Abiatar+ nanga Yoab,+ a manpikin fu Seruya,+ tron kownu tu?”

23 Dan Kownu Salomo sweri na Yehovah. A taki: „Meki Gado strafu mi èn meki a du moro leki dati srefi,+ efu Adonia no lasi en libi, fu di a aksi mi a sani disi.+ 24 Na Gado poti mi leki kownu.+ Na en meki taki mi e tiri leki kownu na presi fu mi papa David+ èn taki na den bakapikin fu mi o tiri leki kownu fu ala ten.+ Neleki fa a de seiker taki Yehovah de na libi,+ na so a de seiker taki Adonia o dede tide.”+ 25 Wantewante Kownu Salomo seni Benaya,+ a manpikin fu Yoyada, fu go du a sani disi. Di a feni Adonia, a kiri en.+

26 Kownu taigi Priester Abiatar:+ „Na dede yu ben musu dede,+ ma mi no o kiri yu tide, fu di wan ten ben de taki yu ben e tyari a santa kisi fu a Moro Hei Masra Yehovah,+ di yu ben de nanga mi papa David.+ Boiti dati, di mi papa ben e pina, yu ben e pina tu.+ Sobun, go na Anatot+ pe den gron fu yu de!” 27 Sobun, Salomo puru Abiatar leki priester fu Yehovah. Na so den sani di Yehovah ben taki dati den ben o pasa nanga na osofamiri fu Eli+ na Silo,+ pasa tu.

28 Di Absalom ben de na libi, Yoab+ no horibaka gi en,+ ma a ben e horibaka gi Adonia.+ Sobun, di Yoab kon yere san Salomo taki, a lowe go na a tenti+ fu Yehovah, dan a grabu den tutu fu na altari hori.+ 29 Now sma go taigi Kownu Salomo: „Yoab lowe go na a tenti fu Yehovah èn a de drape leti na sei na altari.” Dati meki Salomo seni Benaya, a manpikin fu Yoyada, go drape. A taigi en: „Go kiri en!”+ 30 Sobun, Benaya go na a tenti fu Yehovah èn a taigi Yoab: „Disi na san Kownu taki: ’Kon na dorosei.’” Ma Yoab taki: „Kwetikweti! Leti dyaso+ mi o dede.” Ne Benaya go taigi Kownu san Yoab taigi en. A taki: „Na so-so-so Yoab taki èn na so-so-so a piki mi.” 31 Kownu taigi Benaya: „Du san a taki èn kiri en. Dan yu musu beri en. Na so yu musu puru a brudu-paiman+ di Yoab tyari kon na tapu mi nanga na osofamiri fu mi papa di a kiri den sma fu soso.+ 32 Yehovah o pai en+ fu a kiri di a kiri tu reti-ati man di ben bun moro en.+ Nanga feti-owru a kiri Abner,+ a manpikin fu Ner, di ben de legre-edeman fu Israel,+ èn Amasa,+ a manpikin fu Yeiter, di ben de legre-edeman fu Yuda.+ A du disi sondro fu mi papa David ben sabi.+ 33 Fu di Yoab kiri den man dati, meki en nanga den bakapikin fu en musu pai gi dati fu ala ten.+ Ma fu ala ten, Yehovah o meki sani waka bun gi David,+ gi den bakapikin fu en, gi en heri famiri èn gi en kownukondre.”+ 34 Ne Benaya, a manpikin fu Yoyada, gowe go kiri Yoab.+ Na a oso pe Yoab ben e tan na ini a sabana, na drape Benaya beri en. 35 Dan Kownu meki Benaya,+ a manpikin fu Yoyada, tron legre-edeman+ na presi fu Yoab. Kownu gi Priester Sadok a wroko fu Abiatar.+

36 Te fu kaba Kownu seni kari Simei,+ dan a taigi en: „Bow wan oso na Yerusalem èn tan libi drape. Yu no musu komoto na ini a foto go na wan tra presi. 37 Sabi taki na dede yu o dede+ efu yu komoto na ini a foto èn efu yu abra Kidron-lagipresi.+ Efu yu dede, dan na yu suku en.”+ 38 Ne Simei taigi Kownu: „A bun. Mi lespeki Kownu, mi o du ala sani di yu taki.” Sobun, Simei tan na Yerusalem wan heri pisi ten.

39 Ma baka dri yari tu srafu+ fu Simei lowe go na Akes,+ a manpikin fu Maka, di ben de kownu fu Gat.+ Ne sma kon taigi Simei: „Luku, den srafu fu yu de na Gat.” 40 Wantewante Simei opo. A poti wan sadri na tapu en buriki, dan a go na a foto Gat fu suku den srafu fu en di ben go na Akes. Sobun, Simei gowe go teki den srafu fu en na Gat. 41 Ne sma go taigi Salomo: „Simei komoto na Yerusalem, dan a go na Gat. Ma now a drai kon baka.” 42 Dati meki Kownu seni kari+ Simei, dan a taigi en: „Mi ben meki yu sweri na fesi Yehovah, taki yu no ben o komoto na ini a foto go na tra presi. Mi ben warskow yu+ tu taki na dede yu ben o dede efu yu ben o gowe libi a foto. Na yu srefi ben agri nanga mi, a no so?+ 43 We, dan fu san ede yu no du san yu ben sweri na fesi Yehovah?+ Fu san ede yu no du san mi ben taigi yu fu du?”+ 44 Kownu Salomo taigi Simei tu: „Yu sabi heri bun sortu ogri yu du nanga mi papa David.+ Dati meki Yehovah o meki yu pai fu ala den ogri disi.+ 45 Ma Kownu Salomo o kisi blesi+ èn Yehovah o meki a kownukondre fu David tan fu ala ten.”+ 46 Ne Kownu taigi Benaya, a manpikin fu Yoyada, fu go kiri Simei. Dati meki Benaya go na dorosei, dan a kiri Simei.+

Na so Salomo kon kisi ala makti+ na ini a kondre.