Sakaria
10 „Aksi Yehovah fu gi unu alen na a bigin fu a yari te alenten doro.
Na Yehovah e meki den dungru wolku di e tyari alen kon.
Na en e meki alen fadon
èn na en e meki n’nyan gro na den gron gi ala sma.
èn den dren fu den no wani taki noti.
Awinsi san den e du, den no man trowstu sma.
Dati meki a pipel e wakawaka lontu leki skapu di lasi pasi
èn den e pina fu di den no abi skapuman.
3 Mi ati e bron srefsrefi nanga den skapuman.
Mi o aksi frantwortu na den fesiman di e pina mi pipel.*
Yehovah di e tiri den legre poti prakseri now na den sma fu Yuda di de leki skapu fu en.
A meki den kon de leki a tranga asi fu en di a e rèi te a e go feti.
4 Na fu Yuda na edeman* e kmoto.
Na fu en a tiriman* e kmoto di e horbaka gi en.
Na fu en a bo e kmoto di sma e gebroiki fu feti.
Iya, na fu en ala den fesiman* kmoto.
5 Den o kon de leki srudati
di e trapu a tokotoko na strati te den e go feti.
Den o go feti, bika Yehovah de nanga den.
Den feanti fu den di e rèi na tapu asi o kisi syen.
6 Mi o meki den sma fu Yuda kon tranga
èn mi o ferlusu den sma fu Yosef.
Mi o tyari den go baka na den kondre
èn mi o sori sar’ati gi den.
A o de leki noiti mi ben drai baka gi den,
bika mi na Yehovah den Gado èn mi o piki den.
7 Den sma fu Efrayim o kon de leki wan tranga srudati.
Den o prisiri neleki te den dringi win.
Den manpkin fu den o si den sani disi èn den o prisiri,
iya, den ati o prisiri fu Yehovah ede.
8 ’Mi o froiti kari den èn mi o tyari den kon na wán.
Mi o ferlusu den èn den o kon furu.
Ala ten den o de nanga furu sma.
9 Awinsi mi panya den leki siri na mindri den pipel,
den o memre mi na den fara presi.
Den nanga den manpkin fu den o kisi krakti baka èn den o drai kon baka.
10 Mi o puru den na Egepte èn mi o tyari den kon baka.
Mi o puru den na Asiria èn mi o tyari den kon na wán.
Mi o tyari den go na a kontren fu Gilead nanga Libanon.
Drape srefi nofo presi no o de gi den.
11 Te a se wani tapu pasi gi den, mi o psa na ini a se,
dan mi naki den skwala fu en.
Ala a watra fu Nijl-liba o kon drei.
Mi o puru bigifasi gi Asiria
èn mi o puru a kownutiki fu Egepte.
12 Na mi, Yehovah, o meki den kon tranga
èn den o libi na wan fasi di e gi mi nen glori’, na so Yehovah taki.”