A di fu tu brifi gi den Tesalonikasma

1 Mi, Paulus, di de nanga Selfanus* nanga Timoteyus, e skrifi a brifi disi gi a gemeente fu den Tesalonikasma di de wán nanga Gado wi P’pa èn nanga Masra Yesus Krestes:

2 Meki Gado a P’pa nanga Masra Yesus Krestes sori unu bun-ati èn meki a freide fu den de nanga unu.

3 Wi abi fu taki Gado tangi gi unu ala ten, brada nanga sisa. A fiti fu du disi, fu di a bribi fu unu e gro moro nanga moro èn fu di a lobi di ibriwan fu unu abi gi makandra e kon moro tranga. 4 Dati meki wi e prèise unu na den tra gemeente fu Gado, fu di unu e hordoro èn fu di unu no lasi bribi awinsi sma e du ogri nanga unu noso e pina unu. 5 Disi e sori taki Gado e koti krutu na wan reti fasi. A e meki taki unu warti fu go na ini a Kownukondre fu Gado. Na fu a Kownukondre ede unu e pina.

6 Sobun, fu di Gado e du san reti, meki a o strafu den sma di e pina unu. 7 Te Masra Yesus o sori ensrefi kmoto fu hemel na ini wan bigi faya, makandra nanga den makti engel fu en, dan unu di e pina o kisi ferlekti makandra nanga wi. 8 Na a ten dati, a o puru atibron tapu den sma di no sabi Gado èn tapu den sma di no e gi yesi na a bun nyunsu di e taki fu wi Masra Yesus. 9 A strafu di den sma disi o kisi, na taki a o puru den na pasi fu têgo. Masra no o luku den moro na wan ai èn a no o yepi den nanga a bigi krakti fu en. 10 Disi o psa te Masra o kon fu kisi glori makandra nanga den santawan fu en èn te ala den sma di abi bribi o ferwondru. Fu di unu ben bribi den sani di wi ben taigi unu, meki unu o de na mindri den sma disi.

11 Fu dati ede wi e tan begi gi unu taki a Gado fu wi feni taki unu warti fu kisi a libi gi san a kari unu. Meki a du ala den bun di a wani du gi unu nanga a krakti fu en èn meki a sorgu taki den sani di unu e du fu di unu abi bribi, abi bun bakapisi. 12 Na so unu kan meki taki a nen fu wi Masra Yesus kisi glori èn taki unu kan kisi glori fu en ede, fu di a Gado fu wi nanga Masra Yesus Krestes sori unu bun-ati.