A di fu tu brifi gi den Korentesma

3 A de fanowdu taki wi musu sori baka suma na wi? Noso wi musu gi unu brifi pe sma e prèise wi? Noso na unu musu gi wi den sortu brifi dati? 2 Unu srefi de leki den brifi fu wi di skrifi na tapu wi ati. Ala sma sabi den èn ala sma man leisi den. 3 Bika unu e sori taki unu na wan brifi fu Krestes di wi leki dinari skrifi. A no skrifi nanga enki, ma nanga a yeye fu wan libilibi Gado. A no skrifi na tapu plata ston, ma na tapu libisma ati.

4 We, na Krestes meki taki wi man taki disi nanga ala frutrow na ini Gado. 5 A no fu wan sani ede di wi du meki wi fiti fu du a wroko disi, ma na Gado meki taki wi fiti fu du dati. 6 Na en meki taki wi fiti fu de dinari fu wan nyun frubontu. Wi a no dinari fu wan wèt di skrifi, ma dinari fu a yeye. Bika a wèt di skrifi e tyari dede kon, ma a yeye e gi libi.

7 Boiti dati, a wèt di e tyari dede kon èn di ben skrifi na tapu ston, ben kon nanga so wan glori, taki den Israelsma no ben man luku a fesi fu Moses di a glori fu Gado ben de fu si na tapu en fesi. Ma a glori dati no ben o tan. 8 We, dan wan moro bigi glori o de fu si te a yeye e du en wroko, a no so? 9 Bika efu a wèt ben abi glori aladi a ben e krutu sma, dan wan moro bigi glori o de fu si te retidu e du en wroko. 10 Fu taki en leti, srefi a wèt di ben abi glori fosi, no abi glori moro, fu di wan moro bigi glori de. 11 Bika efu a wèt di no ben o de moro, kon nanga glori, dan a frubontu di e tan, o abi moro bigi glori.

12 We, fu di wi abi so wan howpu, meki wi no e frede srefisrefi fu taki. 13 Wi no e du leki Moses di ben e tapu en fesi nanga wan duku, so taki den Israelsma no ben o si san ben o pasa te fu kaba nanga a wèt di no ben o de moro. 14 Ma den no ben man frustan sani krin, bika te na a dei fu tide a srefi duku e tapu den frustan te den e leisi na owru frubontu. A duku komoto soso nanga yepi fu Krestes. 15 Fu taki en leti, te na a dei fu tide wan duku e tapu na ati fu den te den e leisi den buku fu Moses. 16 Ma te den e drai go na Yehovah, dan a duku e komoto. 17 Yehovah na a Yeye èn pe a yeye fu Yehovah de, drape sma de fri. 18 Neleki wan spikri, wi e skèin a glori fu Yehovah di de fu si na tapu wi fesi di no tapu nanga wan duku. Wi alamala e kenki kon gersi en, so taki wi e skèin moro nanga moro glori. Disi e pasa soifri soleki fa Yehovah, a Yeye, wani.