Panya na smeri fu na sabi fu Gado

„Tangi fu Gado, di alaten e tyari wi na ini wan fektori waka makandra nanga na Krestes èn di nanga yepi fu wi e meki na smeri fu na sabi fu en de fu si na ini ala presi!” — 2 KORENTE SMA 2:14.

1. Fu sortu smeri wi e taki dya, èn fa wan sma musu si na grani fu panya na smeri disi?

M-M-M-M! A smeri switi, boi! Yu e smeri na switi smeri? Wi no e taki dyaso fu na smeri fu bromki, ma na presi fu dati wi e taki fu wan agersi smeri di e komoto fu den moro bun buku na grontapu. Den buku disi no ben kisi den bigin soso na libisma, ma den de wan agersi bosu bromki di na Sma, di meki den switi smeri bromki tu di e moi na grontapu, meki du kon ondro krakti fu en santa yeye. A grani fu panya na smeri disi fu na sabi fu Gado, de wan diri gudu. Iya, a de wan diniwroko di warti srefisrefi — a no de wan sani di alasma e kisi, a no de wan sani di libisma ini algemeen abi wan prati na en.

2. Oten den disipri fu Krestes ben bigin fu panya wan agersi smeri, èn nanga sortu bakapisi?

² Na diri gudu disi ben gi na den disipri fu Krestes di den ben tyari den go ini wan aktief dienst gi Yehovah Gado na a dei fu Penkstri ini a yari 33 fu wi gewoon teri. Fu di den ben furu nanga santa yeye meki den ben bigin fu panya wan agersi smeri di den ben gi wan fruklari fu „den bigi wroko fu Gado” (Tori fu den Apostru 2:1-4, 11). Nanga yepi fu den na smeri fu na sabi fu Gado ben sa go na tra sma, no wawan na dyu di ben besnij na skin fasi ma so srefi na den nâsi, lo, pipri, nanga tongo fu sma di no ben besnij (Tori fu den Apostru 10:34, 35). Den tru disipri ben si na diniwroko disi leki moro warti leki ala gudu na skin fasi di libisma tyari kon na wan gi den srefi.

3. Te o fara na wroko di de na ini na panya fu na smeri fu na sabi fu Gado e du, èn sortu aksi wi musu poti gi wi srefi?

³ Ini a ten disi a bigi wroko di abi fu du nanga a panya fu na smeri fu na sabi fu Gado, e du na a heri grontapu — a e du moro bigi leki oiti a fesi ini na libisma historia. A wani taki fu gi kotoigi fu Gado kownukondre na a heri libismafamiri. A kownukondre opo now èn a de ondro Gado Kownu, Yeises Krestes di Gado poti na wroko (Mateyus 6:10; Tori fu den Apostru 1:8). Yu e si na diniwroko fu a preiki fu na Kownu nanga en Kownukondre leki wan sani di warti moro ala gudu? Yeises Krestes, di ben teki fesi ini na preiki fu na bun nyunsu fu na kownukondre dati, ben warderi en na a fasi dati èn nanga dati a ben gi na eksenpre. — Mateyus 4:17; 6:19-21.

Meki na pasi fu na fektori waka abi wan switi smeri

4. Fa Yehovah e gi en dienstknekti na grontapu skoro noya akruderi nanga 2 Korente sma 2:14, èn na sortu owru gwenti den wortu fu Paulus e sori?

⁴ Fu san-ede a dini fu Gado de wan sani di sma musu si leki wan diri sani? Wan reide de taki den wan di e dini Yehovah abi now kba na aparti grani taki Gado e tyari den ini wan bigi fektori waka. Na ini akruderi nanga na New International Version, 2 Korente sma 2:14 e taki: „Tangi fu Gado, di alaten e tyari wi ini wan fektori waka ini Krestes èn nanga yepi fu wi e panya na smeri fu na sabi fu en na ala presi [„e sorgu taki na sabi di wi abi fu en e panya neleki wan switi smeri na ini a heri grontapu!” Phillips].” A gersi taki den wortu dati fu na apostru Paulus e sori tapu wan owru gwenti fu na hori fu fektori waka.a

5, 6. (a) San ben feni presi ini den fektori waka ini na owru Rome, èn san na switi smeri ben wani taki gi difrenti sma? (b) Fa na agersitori na ini 2 Korente sma 2:14-16 kan kobroiki na yeyefasi?

⁵ Ini na ten di Rome ben de wan Republiek, dan wan fu den moro bigi grani di na Senaat ben kan gi wan edeman fu legre di ben wini wan feti ben de, fu gi en primisi fu hori wan fesa fu na wini fu en nanga yepi fu wan diri fektori waka. Dan na waka fu den Rome sma ben buweigi en srefi safrisafri na abra na Via Triumphalis èn baka dati na tapu na kronkron pasi go na loktu na a tenpri fu Yupiter a tapu na Pikin-bergi fu na Capitool. Den kownu, den granman nanga den edeman fu legre di den ben kisi ini na orloku, makandra nanga den pikin èn den dienstknekti fu den, den ben tyari na keti, nofotron nanga soso skin, fu lagi den èn fu gi den syen.

⁶ Dan te na grupu sma ben waka psa na ini a foto Rome, dan na pipri ben trowe bromki na fesi na fetiwagi fu na winiman, èn wierook di den ben bron ben furu na heri pasi di den ben waka psa nanga wan switi smeri. Na switi smeri disi ben wani taki grani èn wan moro seiker libi gi den srudati di wini. Ma na smeri dati ben wani taki dede gi den strafuman di no ben kisi pardon èn di den ben sa kiri na a kba fu na waka. Disi e iti leti na tapu na yeye fasi fa Paulus e kobroiki na eksenpre na ini 2 Korente sma 2:14-16. Na prenki e sori tapu Paulus nanga konpe Kresten leki borgru fu Gado di e gi den srefi ini a dini fu en, „ini kompani fu Krestes”, di alamala e waka na ini na fektori waka fu Gado èn di Gado e tyari ini wan bigi fektori waka psa wan pasi di e smeri switi.

Wan libi-smeri ofu wan dede loktu

7, 8. (a) Fa Kotoigi fu Yehovah e panya na switi smeri fu na sabi fu Gado? (b) Fa den wan di e kisi frulusu e du tapu na panya di den Kotoigi e panya na agersi smeri? (c) Fa den wan di o kisi pori e du tapu dati?

⁷ Fu di Yehovah Kotoigi e prati den beibri waarheid fu Gado Kownukondre ondro Krestes na ala sei, meki den e meki na switi smeri fu na sabi fu na bun-ati Gado, di na waarheid fu en ben meki den kon fri fu falsi relisi, kon de fu si. Ini wan fektori waka den e go na fesi ini a diniwroko fu Yehovah. Den ofrandi fu a diniwroko fu den leki Kotoigi fu en èn en Kownu de leki switi smeri gi Yehovah. Na so wi kan frustan san na apostru ben wani taki di a ben taki: „Gi Gado wi na wan switi smeri fu Krestes a mindri den di e kisi frulusu èn a mindri den di e kisi pori; gi den lastiwan wan smeri di e komoto fu dede go na dede, gi den fosiwan wan smeri di e komoto fu libi go na libi [„wan libi-smeri di e tyari libi kon”, The New English Bible; „na smeri fu na libi srefi di e gi kowru-ati”, Phillips].” — 2 Korente sma 2:15, 16.

⁸ Sma di de eerlek èn di abi wan safri-ati yeyefasi, e si o switi na smeri fu na sabi fu Yehovah de so leki en Kotoigi e panya dati. Gi den sortu sma dati na kotoigiwroko abi na smeri fu gosontu nanga libi, fu waarheid di de na libi èn di e gi libi. Den e gi Yehovah nanga en Kownu, di den e moksi den srefi na den na ini na fektori waka fu den, tangi èn e bari nanga wan tranga sten: „Frulusu wi abi fu taki tangi na wi Gado, di sidon na tapu na kownusturu èn na a Pikin Skapu” (Openbaring 7:10). Den e hari na (loktu) fu Kownukondre waarheid kon na ini den, di de wan switi libi-smeri di e tyari sma go na libi. Ma Satan èn den ogri yeye fu en pori na smeri di den wan di anga na falsi relisi man fu smeri, so taki den e tapu den noso èn na wan heimemre-fasi e weigri na waarheid. Na waarheid èn na preiki fu na waarheid na wan kotrow fasi e panya wan dede smeri di e tyari dede kon gi „den wan di e kisi pori”. Ofu so leki na New International Version e taki en: „Gi en wi de wan dede loktu.” Phillips’ vertaling e taki en so: „Gi den lastiwan a gersi wan dede smeri fu kisi pori.”

9. Sortu aksi Paulus e poti now, fa yu ben sa piki dati, èn fu san-ede?

⁹ „Èn suma de nofo bekwaam gi den sani disi?”, na apostru e aksi morofara (2 Korente sma 2:16). Dati wani taki: „Èn suma ben sa kan de bekwaam gi wroko leki disi?” (The Jerusalem Bible) „Èn suma fiti gi so wan diniwroko?” (Weymouth) Na beibri piki de: Yehovah Kotoigi! Fu san-ede? Bika soso den sma di gi den srefi abra èn di de eerlek, opregti, èn di no e feti baka wini gi den srefi èn di e taki na waarheid krin èn sondro fu degedege ini a tori fu falsi relisi, abi na bekwaamfasi fu du na wroko disi, di de ini a panya fu na smeri fu na sabi fu Gado. — Kolose sma 1:3-6, 13; 2 Timoteyus 2:15.

10. Fu san-ede den kerkileriman no de bekwaam gi na wroko di abi fu du nanga na panya fu na smeri fu na sabi fu Gado?

¹⁰ Den kerkileriman fu na krestenhèit, di nanga ala prisiri wani abi wan bun nen na a grontapu disi, no de bekwaam èn no fiti gi na diniwroko disi pe gridifasi no de na ini. Fu san-ede? Fu di den no e doro na marki di Paulus wortu, di e kon now, e tyari kon a krin: „Wi a no seriman fu na wortu fu Gado so leki furu sma, ma nanga opregtifasi, iya, leki sma di Gado seni, ondro Gado ai, makandra nanga Krestes, wi e taki” (2 Korente sma 2:17). Ofu so leki na New International Version e taki en: „Kontrari nanga so furu sma wi no e waka seri na wortu fu Gado fu feni wini. Kontrari fu dati, ini Krestes wi e taki nanga opregtifasi na Gado fesi, leki sma di Gado seni.”

11, 12. (a) Fu san-ede den Kotoigi a no „seriman fu na Wortu fu Gado”, ala di den e teki bijdrage? (b) San den Kotoigi fu Yehovah e pristeri, di e kenki fu na falsi fasi fu na Krestendom di furu sma e bai?

¹¹ Na Gado seni Yehovah Kotoigi, èn den e du na kotoigi wroko fu den ondro Gado ai. Ala di den e gi sma di abi belangstelling warti buku nanga tra publikâsi di e fruklari Gado Wortu èn den e teki friwani bijdrage gi na Kownukondre-preikiwroko na a heri grontapu, toku dati a no a waka seri ofu fu falsi na Wortu fu Gado. Te yu luku en bun dan den sortu bijdrage dati de soso wan yepi fu kan panya na sabi fu Gado go na trawan baka.

¹² Furu sma na ini a ten disi nanga sabi ofu sondro fu sabi bai wan fasi fu na krestendom di falsi, fu di a e fiti na den gridi lostu fu den èn a no e tapu pasi gi na fasi fu libi fu den. Den e bribi taki Gado e teki den fu di den e taki taki den abi lobi gi en na ini den ati. Ma te a e sori taki den sani di den e bribi èn a fasi fa den e tyari den srefi de kontrari Gado Wortu, den e drai na Beibri poti na den fasi fu kisi leti èn fu poti den eigi prakseri moro hei leki na yoisti fasi fu frustan na beibri (Mateyus 15:8, 9; 2 Petrus 3:16). Ma Yehovah Kotoigi e pristeri na soifri waarheid fu na beibri, di no falsi, èn e tyari na so wan fasi wan switi smeri kon a doro di de wan sani di Gado nanga den tru anbegiman fu en e teki. Na so wan fasi den e yagi puru ala relisi gwenti nanga sani di e tapu pasi gi sma fu kisi na tru sabi fu Gado.

13. Suma, boiti den salfu kresten, de na ini na fektori waka fu Gado, èn san den e du na ala presi pe den e go?

¹³ Fu de na ini na fektori waka fu Gado ini kompani fu Krestes de trutru wan grani di sani no de fu teki gersi nanga en èn pe no wawan salfu kresten e nyan bun fu en, ma so srefi na „bigi ipi” fu „tra skapu” now kba, bika na fektori fu na Kownukondre de krosibei (Openbaring 7:4, 9; Yohanes 10:16). Ala di wi e fruwakti moro wini fu wi Kownu di e wini, wi e panya na ala sei pe wi e go na sabi fu Gado di e gi libi leki wan switi smeri, ofu leki diri switi smeri, gi den wan di ati e angri fayafaya fu kisi waarheid nanga regtfardikifasi. Fa a de wan grani gi den wan di de bekwaam gi na spesrutu wroko disi! — Yohanes 17:3; Kolose sma 3:16, 17.

Den kisi makti fu panya wan switi smeri

14. Fu san-ede den wan di e panya na smeri fu na sabi fu Gado, no abi wan papira fu libisma fanowdu di e gi den na makti fu du dati?

¹⁴ Ma a de so taki den wan di e panya na smeri fu na sabi fu Gado nanga en Kownukondre, abi wan diploma fanowdu fu libisma ofu wan papira di e gi den makti? Nôno! Wi kisi makti kba, ofu den poti wi na wroko kba, leki Kotoigi gi na Moro Heiwan fu na universum. Sobun sondro pikinso degedege wi kan hari go na ini a preikiwroko èn panya na smeri fu na bun nyunsu fu Gado Kownukondre. Hori na prakseri taki Yehovah e tyari wi. Yeises ben du en diniwroko awinsi „sondari ben taki sani kontrari en” (Hebrew sma 12:3). Toku na bericht fu Yeises aktiviteit ini na preikiwroko, so leki wi e feni en na ini a beibri, e tan leki wan tru sani di skrifi, èn a wroko fu en ini na velddienst e rikomanderi en èn e taki bun fu en taki a de wan tru dinari fu Yehovah Gado.

15. Fa na apostru Paulus ben sori taki tru Kresten no abi „brifi [fanowdu] di e rikomanderi den”?

¹⁵ Na ini en ten na apostru Paulus ben kakafutu gi so wan sortu situwâsi fu di a ben tyari na buweisi kon a fesi di e kon now: „Wi e bigin fu rikomanderi wi srefi baka? Ofu wi abi so leki sonwan kande brifi di e rikomanderi wi gi unu ofu di unu abi fanowdu fu unu? Unu srefi na wi bribi, di skrifi na tapu wi ati èn di ala sma sabi èn e leisi. Bika a de krin taki unu de wan brifi fu Krestes, di wi leki bedinari skrifi, a no skrifi nanga enki, ma nanga yeye fu wan libi Gado, no na tapu ston tafra, ma na tapu tafra fu libisma skin, na tapu ati.” — 2 Korente sma 3:1-3.

16. Sortu brifi Yehovah Kotoigi e prisenteri leki getuigschrift taki den kisi a diniwroko fu den fu Gado?

¹⁶ Grontapu tirimakti no e erken na gi di Gado gi wi makti leki Yehovah Kotoigi. Ma meki na wroko fu wi di abi fu du nanga na panya fu na smeri fu na sabi fu Yehovah, taki gi en srefi! Na wroko disi no kan figi puru, ala di son sma e weigri fu leisi na getuigschrift disi fu wi diniwroko. Kerkileriman e presenteri den papira fu den di den kisi fu kerkitiriman èn di e gi den reti fu du a wroko fu den. Ma den sortu papira disi de soso wan pisi papira, a wortu fu libisma. Yehovah Kotoigi no e sori wawan tapu na Wortu fu Gado, ma den srefi de wan libilibi getuigschrift. Den memre fu na bigi ipi fu tra skapu, di na bun nyunsu fu na Kownukondre ben doro na den, ben tyari so srefi kon makandra na a reti-anusei fu a Kownu fu Yehovah (Mateyus 25:33, 34). Ala den sma disi de wi brifi di e rikomanderi wi, wan brifi di wi leki Yehovah Kotoigi, awasi pe wi de, e tyari tapu wi ati nanga ini wi yeye èn di wi kan sori nanga furu frutrow. Den wan di e teki wan bosroiti na a sei fu Gado universeel soevereiniteit èn di abi wan prati fu dini Gado makandra nanga Yehovah Kotoigi, na densrefi de wan papira di e rikomanderi den èn di ala sma musu fu e leisi èn musu fu de bekenti nanga den.

17. Fa wi „brifi fu Krestes” skrifi, èn fu san-ede Paulus ben taki taki dati skrifi tapu ati?

¹⁷ A no de fu taki taki a e meki den wan di e anga na a falsi relisi e kisi bigi atibron èn e dyarusu te den e leisi na brifi dati. Toku na bigi ipi tra skapu di e gro dei fu dei de wan rikomanderi brifi di komoto fu Yeises Krestes, na Tumusi Bun Herder, di e kobroiki ala Kotoigi fu Yehovah ini en tyari-kon-makandra-wroko di e du na wan vrede fasi. Wi na a skrifitiki fu en, ofu na libisma wrokosani, di a e kobroiki fu skrifi na brifi disi. Na brifi no skrifi nanga enki — wan sani di no kan figi puru —  ma nanga yepi fu èn nanga a wrokokrakti ofu yeye fu Gado, di e wroko na ini wi. A no de so leki a ben de ini a tori fu Moses, di na wèti fu den Tin Gebod ben skrifi nanga finga fu Gado na tapu tu stontafra. Na brifi fu wi skrifi na tapu tafra fu skin fu libisma ati, fu di na yeye diniwroko fu wi e tyari wan kenki kon na ini den sma di e ontfanga na bun nyunsu di e smeri switi.

18. Sortu bakapisi e meki den wan di e ontfanga na bun nyunsu tron wan brifi di e rikomanderi sma?

¹⁸ A wroko fu wi fu na Wortu fu Gado naki na ati fu den sma di ontfanga na bun nyunsu èn tyari wan kenki kon na ini den, di de krin fu si. A bosroiti fu den fu dini Gado, sori taki a no de wan bosroiti di den teki tapu a momenti, fu di wan evangeliumpreikiman ben wiki wan faya kon ini den fu di a wroko tapu den firi. A bosroiti fu den de morofuru wan sori fu den kenki di tyari kon ini den libi tapu a gron fu beibri waarheid di de krin fu si. Lobi gi na tru Gado, Yehovah, e buweigi den fu ’puru na owru sma di den de nanga en bidrigi lostu èn weri na nyun sma ’, di „e sori na froktu fu na yeye” (Efese sma 4:20-24; Galasia sma 5:22, 23). Na bakapisi e meki den tron fu dati-ede wan brifi di e rikomanderi den. A e taki wan moro krin tongo leki sortu brifi tu di skrifi nanga anu èn di komoto fu wi ofu wan organisâsi di sma ai kan si èn di ben sa kan seni wi.

19. San Paulus e fruteri fu den eigifasi fu den „dinari fu wan nyun frubontu”, èn sortu krakti a wroko fu den ben abi tapu na bigi ipi?

¹⁹ Na ini 2 Korente sma 3:4-6 Paulus e go doro: „Tangi now fu na Krestes meki wi abi so wan frutrow ini Gado. No taki fu wi srefi wi de nofo bekwaam fu si wan sani leki a e komoto fu wi srefi, ma taki wi de nofo bekwaam e kon fu Gado, di meki wi trutru nofo bekwaam fu de dinari fu wan nyun frubontu.” Ala di soso den wan di de wan pisi fu na salfu fikapisi de „dinari fu na nyun frubontu”, toku a wroko fu den ben abi krakti tapu na bigi ipi fu tra skapu, èn a sa abi krakti ete tapu wan heri ipi fu den sortu tra skapu dati di musu tyari kon makandra ete. Disi na a frutrow di ala Kotoigi fu Yehovah abi na ini Yehovah Gado nanga yepi fu Krestes Yeises. Na fikapisi nanga tangi e gi na bigi ipi tra skapu deki-ati fu teki prati nanga den heri ati na a diniwroko fu ’a skrifi fu brifi’ di Yeises ben taki fu en a fesi na ini Mateyus 24:14 nanga Mateyus 28:19, 20.

20. (a) San na bericht ini na Yaribuku e sori ini na tori fu den wan di e panya na smeri fu na sabi fu Gado? (b) San wi alamala kan taki fu wi bekwaamfasi gi na diniwroko, skrifi fu brifi?

²⁰ Disi den du tu, so leki a bericht na ini na Yaribuku 1990 e sori, pe e sori taki Yehovah Kotoigi e panya na smeri fu na sabi fu Gado na ini 212 kondre. A nomru fu den de moro leki 3.787.000 fayafaya preikiman, èn soso kba na a yari di psa den ben kobroiki so wan 835.000.000 yuru na a preiki fu na bun nyunsu disi fu na Kownukondre. Na a Avondmaal fu Masra di ben hori a yari di psa 9.479.064 sma ben de. Na salfu fikapisi so bun leki den memre fu na bigi ipi fu tra skapu kan taki: „Taki wi de nofo bekwaam, e kon fu Gado”. Ofu so leki The Jerusalem Bible e taki en: „Ala wi bekwaamfasi e kon fu Gado.”

21. San wi alamala musu e du, èn fu san-ede?

²¹ Panya fu dati-ede, na switi smeri, fu na sabi fu Gado, di e gi libi na ini ibri presi! Furu na loktu fu unu gemeente kontren nanga na smeri fu na sabi fu Yehovah. Dan en leki teyokrasiya legre Edeman di e wini, sa tyari yu ini en fektori waka ala di ala en Kotoigi e go na fesi ini na disiten diniwroko fu glori!

[Foetoewortoe]

San yu ben sa piki?

◻ Sortu agersitori Paulus e kobroiki na ini 2 Korente sma 2:14-16?

◻ Sortu bakapisi na panya fu na smeri fu na sabi fu Gado abi tapu trawan?

◻ Suma wwan de bekwaam gi na wroko disi, èn fu san-ede?

◻ Fu san-ede libisma di e panya na smeri no abi brifi fanowdu di skrifi nanga anu èn di e rikomanderi den?