Libisma abi a sabi foe Gado fanowdoe
„Joe sa froestan a frede gi Jehovah, èn joe sa feni a sabi foe Gado.” — ODO 2:5.
1. Foe san ede wi kan taki dati a libisma ati na wan kefalek sani di Gado meki?
SO WAN 5.600.000.000 ati foe libisma e naki na a momenti disi. Ibri dei na ati foe joe e naki 100.000 tron èn a e pompoe 7.600 liter broedoe na ini a broedoe sistema foe joe di langa 100.000 kilometer. No wan tra titei e wroko moro tranga leki a kefalek sani disi di Gado meki.
2. San joe ben sa kan taki foe na ati na agersifasi?
2 So srefi 5.600.000.000 ati na agersifasi e wroko toe na grontapoe. Na ini na ati foe wi na agersifasi den firi foe wi de, den reide foe san ede wi e doe sani, nanga den lostoe foe wi. A de a presi pe den prakseri foe wi de, a presi pe wi froestan de, nanga pe wi wani de. Na ati na agersifasi kan abi bigifasi noso sakafasi, a kan brokosaka noso breiti, a kan doengroe noso leti. — Nehemia 2:2; Odo 16:5; Mateus 11:29; Tori foe den Apostel 14:17; 2 Korentesma 4:6; Efeisesma 1:16-18.
3, 4. Fa a boen njoensoe e doro na ati foe foeroe sma?
3 Jehovah Gado kan leisi na ati foe libisma. Odo 17:3 e taki: „A patoe foe smelter sani, de gi solfroe èn na onfoe de gi gowtoe, ma Jehovah na a sma di e ondrosoekoe den ati.” Tokoe, na presi foe leisi san de na ini ibri ati èn kroetoe dati nomo, dan Jehovah e gebroiki den Kotoigi foe en foe doro na ati foe sma nanga a boen njoensoe. Disi e kroederi nanga den wortoe foe na apostel Paulus: „’Ibri sma di e kari a nen foe Jehovah sa kisi froeloesoe.’ Ma fa den sa kari en efoe den no e bribi na ini en? Ma fa den sa bribi na ini en efoe den no jere foe en? Ma fa den sa jere sondro foe wan sma e preiki? Ma fa den sa preiki efoe wan sma no seni den go? Neleki fa a skrifi: ’O switi den foetoe foe den wan de di e meki a boen njoensoe foe boen sani bekènti!’” — Romesma 10:13-15.
4 Jehovah prisiri foe seni den Kotoigi foe en go na den kabapisi foe grontapoe foe „meki boen njoensoe foe boen sani bekènti” èn foe feni den wan di abi wan ati di e teki sani. Wi doro moro leki 5.000.000 Kotoigi now — wan gemiddelde foe 1 Kotoigi gi so wan 1200 sma na grontapoe. A no makriki foe doro den miljardmiljard sma na grontapoe nanga a boen njoensoe. Ma Gado e tiri a wroko disi nanga jepi foe Jesus Krestes, èn A e hari sma di abi wan opregti ati. So boen, a profeititori di skrifi na Jesaja 60:22 de troe: „A pikinwan srefi sa tron wan doesoen, èn a pikinwan sa tron wan makti nâsi. Misrefi, Jehovah, sa meki a go moro esi na ini en eigi ten.”
5. San na sabi, èn san wi kan taki foe a koni foe grontapoe?
5 A ten dati de now, èn wán sani de krin — den miljardmiljard sma na grontapoe abi sabi fanowdoe. Te joe loekoe en boen, sabi abi foe doe nanga troe tori di sma e kisi nanga jepi foe ondrofeni, foe loekoe sani, noso foe studeri. Grontapoe abi foeroe sabi. Sma ben go na fesi tapoe a kontren foe transport, gosontoe, nanga komunikâsi. Ma a de a sabi foe grontapoe di libisma abi fanowdoe troetroe? Kwetikweti! Feti, a kwinsi di sma e kwinsi makandra, siki, nanga dede e tan trobi libisma. Foeroe tron, a koni foe grontapoe kenki èn sma no kan froetrow na tapoe en.
6. Ini a tori foe broedoe, fa joe kan teki a sabi foe Gado gersi nanga a koni foe grontapoe?
6 Foe gi wan eksempre: Toe jarihondro pasa, a ben de a gwenti foe meki a broedoe foe sma lon foe di sma ben denki taki a ben dresi sma. Den ben meki a broedoe foe George Washington, a fosi presidenti foe den Verenigde Staten, lon doronomo na ini den lasti joeroe foe en libi. Na a ten dati a ben taki: „Meki mi dede gowe safri; mi no man tan moro langa.” A ben abi leti, bikasi a srefi dei dati — 14 december 1799 — a dede. Na ini a ten disi, na presi foe meki a broedoe lasi, den e poti krakti na tapoe a poti di den e poti broedoe na ini a libisma skin. Ala toe fasi hebi nanga problema di e tjari dede kon. Ma someni langa kaba Gado Wortoe taki: „Tan farawe . . . foe broedoe” (Tori foe den Apostel 15:29). Ala ten a sabi foe Gado abi reti, wi kan froetrow en, èn a de njoen bodoi.
7. Ini a tori foe kweki pikin-nengre, fa joe kan teki a soifri sabi foe bijbel gersi nanga a koni foe grontapoe?
7 Loekoe wan tra eksempre foe a koni foe grontapoe di wi no man froetrow. Foeroe jari langa, den psycholoog gi leki rai foe kweki pikin na wan fri fasi, ma wan foe den man di ben horibaka gi dati ben taki baka ten taki disi ben de wan misteik. A Doisri Filologische Associatie ben taki wan ten dati a kweki di sma e kweki pikin na wan fri fasi, de „frantiwortoe na wan sortoe fasi gi den problema di wi abi now nanga jongoesma”. Kande a koni foe grontapoe e degedege leki fa a winti e tjari en go-kon, ma a soifri sabi foe den Boekoe foe bijbel no e kenki. Bijbel e gi rai foe gi pikin leri èn a rai disi de ini balansi. „Gi joe manpikin tranga leri èn a sa gi joe rostoe èn en sa gi foeroe prisiri gi joe sili”, na so Odo 29:17 e taki. So wan sortoe tranga leri moesoe gi nanga lobi, bika Paulus ben skrifi: „Oenoe, papa, no tanteri den pikin foe oenoe, ma tan kweki den na ini a tranga leri èn a serjoesoe froemane foe Jehovah.” — Efeisesma 6:4.
„A sabi foe Gado”
8, 9. Fa joe ben sa tjari kon na krin gi wan sma san Odo 2:1-6 e taki foe a sabi di libisma abi fanowdoe troetroe?
8 Ala di Paulus ben de wan man di teki skoro, tokoe a ben taki: „Efoe wan sma na oen mindri e denki taki a koni na ini a seti foe sani disi, dan meki a tron wan don man, so taki a kan kon koni. Bika a koni foe a grontapoe disi na don sani gi Gado” (1 Korentesma 3:18, 19). Gado wawan kan gi a sabi di libisma abi troetroe fanowdoe. Odo 2: 1-6 e taki foe disi: „Mi manpikin, efoe joe e teki mi wortoe èn e kibri den gebod foe mi leki wan goedoe na joe, foe joe poti prakseri nanga joe jesi na koni, so taki joe kan beni joe ati go na a koni foe si sani krin; efoe boiti dati, joe e bari kari gi a froestan srefi èn joe e opo joe sten srefi gi a koni foe si sani krin, efoe joe e tan soekoe en leki solfroe, èn joe e tan soekoe en leki goedoe di kibri, dan na ini a kefal dati joe sa froestan a frede gi Jehovah, èn joe sa feni a sabi foe Gado. Bika Jehovah srefi e gi koni; na en mofo sabi nanga a koni foe si sani krin e komoto.”
9 Den wan di a boen ati foe den e boeweigi den, e poti prakseri na tapoe koni, foe di den e gebroiki a sabi di Gado gi den, na wan joisti fasi. Den e boigi den ati foe den go na a koni foe si sani krin, èn e ondrosoekoe finifini den sani di den e leri. Foe taki en leti, den e soekoe froestan, noso e soekoe a man di den man si fa afersi foe wan tori abi foe doe nanga makandra. Den wan di abi opregti ati, e doe disi neleki den e diki solfroe èn e soekoe goedoe di kibri. Ma sortoe bigi goedoe den wan feni di e opo na ati foe den? A de „a sabi foe Gado”. San na dati? Foe taki en makriki, a de a sabi di wi e feni na ini Gado Wortoe, bijbel.
10. San wi moesoe doe foe njan boen foe wan boen gosontoe na jejefasi?
10 A sabi foe Gado de gosontoe, a no e degedege, a e gi libi. A e jepi foe kisi gosontoe na jejefasi. Paulus ben gi Timoteus tranga: „Tan hori a model foe gosontoe wortoe di joe ben jere foe mi, nanga a bribi nanga lobi di abi foe doe nanga Krestes Jesus” (2 Timoteus 1:13). Wan tongo di sma e taki abi wan model foe wortoe. Na a srefi fasi, a „soifri tongo” foe waarheid foe den Boekoe foe bijbel, abi „a model foe gosontoe wortoe” di gron na tapoe a thema foe bijbel, a regtfardiki foe a soevereiniteit foe Jehovah nanga jepi foe a Kownoekondre (Sefanja 3:9). Wi moesoe hori a model disi foe gosontoe wortoe na ini wi froestan nanga ati. Foe no kisi wan ati-siki na agersifasi èn foe tan gosontoe na jejefasi, wi moesoe fiti bijbel na ini wi aladei libi èn wi moesoe meki boen gebroiki foe den sani na jejefasi di Gado e seti nanga jepi foe „a getrow èn koni srafoe” (Mateus 24:45-47; Titus 2:2). Meki wi memre ala ten baka, dati gi wan boen gosontoe na jejefasi, wi abi a sabi foe Gado fanowdoe.
11. San na wan toe reide foe san ede libisma abi a sabi foe Gado fanowdoe?
11 Prakseri tra reide foe san ede den miljardmiljard sma na grontapoe abi a sabi foe Gado fanowdoe. Den alamala sabi fa grontapoe nanga libisma doe kon? Nôno, den no sabi. Ala libisma sabi a troe Gado nanga en Manpikin? Den sabi wan sani foe den strei di Satan ben tjari kon na fesi ini a tori foe a soevereiniteit foe Gado èn a soifri retifasi foe libisma? Agen a piki na, nôno. Ala sma sabi foe san ede wi e kon owroe èn e dede? Ete wan tron wi moesoe taki, nôno. Ala sma di e libi na grontapoe sabi taki Gado Kownoekondre e tiri now, èn dati wi e libi na ini den lasti dei? Den sabi taki den ogri jeje krakti de? Den abi sabi di den kan froetrow, foe a fasi fa den kan abi wan kolokoe osofamiri libi? Èn a moro bigi groepoe foe sma sabi taki a de a prakseri foe wi Mekiman taki den sma di e gi jesi sa kisi wan kolokoe libi na ini a Paradijs? A piki na tapoe den aksi disi na so srefi, nôno. Dan, a de krin taki libisma abi a sabi foe Gado fanowdoe.
12. Fa wi kan anbegi Gado „nanga jeje èn nanga waarheid”?
12 Libisma abi a sabi foe Gado fanowdoe toe, foe den sani di Jesus ben taki na ini begi tapoe a lasti neti foe en djaso na grontapoe. A moesoe ben naki na ati foe den apostel srefisrefi, di den ben jere Jesus e taki: „Disi wani taki têgo libi, foe den e teki sabi na ini den foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). Te wan sma e fiti a sabi disi, dan disi na a wan-enkri fasi fa wan sma kan anbegi Gado boen. „Gado na wan Jeje, èn den wan di e anbegi en, moesoe anbegi en nanga jeje èn nanga waarheid”, na so Jesus ben taki (Johanes 4:24). Wi e anbegi Gado „nanga jeje” te wi ati di foeroe nanga bribi èn nanga lobi, e boeweigi wi foe doe sani. Fa wi e anbegi en „nanga waarheid”? Foe di wi e studeri en Wortoe èn e anbegi en akroederi a waarheid foe en — „a sabi foe Gado” — di a tjari kon na krin.
13. Sortoe sani di pasa, skrifi na Tori foe den Apostel 16:25-34, èn san wi kan leri foe dati?
13 Ibri jari, doesoendoesoen sma e bigin foe anbegi Jehovah. Tokoe a de so, taki wi moesoe studeri bijbel gi wan langa ten nanga sma di abi belangstelling, noso wi kan jepi opregti sma moro esi foe kon so fara taki den kan teki dopoe? We, loekoe san ben pasa nanga a waktiman foe a strafoe-oso nanga en osofamiri, soleki fa a kari na Tori foe den Apostel 16:25-34. Paulus nanga Silas ben de na strafoe-oso na Filipi, ma mindrineti wan bigi gronseki ben opo den doro foe a strafoe-oso. Foe di a waktiman ben prakseri taki ala den strafoeman ben lowe èn taki a ben sa kisi hebi strafoe, meki a ben wani kiri ensrefi, ma Paulus ben taigi en taki den alamala ben de drape. Paulus nanga Silas „ben taki a wortoe foe Jehovah nanga en, makandra nanga ala den sma na ini en oso”. A waktiman dati nanga en osofamiri ben de heiden èn den no ben abi sabi foe den Santa Boekoe foe bijbel. Ma tokoe, na ini a wán neti dati, den ben tron sma di ben bribi. Boiti dati, „wantewante en nanga ala den wan di ben de foe en, ben teki dopoe”. Den situwâsi dati no ben de gewoon situwâsi, ma den njoenwan ben leri fondamenti waarheid èn baka dati den ben leri tra sani na den gemeente konmakandra. Wi moesoe man doe wan srefi sortoe sani na ini a ten disi.
A kotiwroko bigi!
14. Foe san ede a de fanowdoe foe hori moro èn boen bijbelstudie na ini wan moro sjatoe pisi ten?
14 A ben sa de wan heri boen sani efoe Jehovah Kotoigi ben kan hori moro èn boen bijbelstudie na ini wan moro sjatoe pisi ten. Disi de troetroe fanowdoe. Foe eksempre, na den kondre foe Owstoe Europa, den abi foe poti den nen foe sma di wani bijbelstudie, tapoe wan lijst foe wakti te den kan kisi bijbelstudie. Disi de so na tra presi toe. Na ini wan foto na a Dominikan Republiek, feifi Kotoigi ben abi someni sma di ben aksi den foe studeri, taki den no ben man hori ala den bijbelstudie. San den ben doe? Den ben gi den wan di abi belangstelling, deki-ati foe fisiti den konmakandra na ini a Kownoekondre zaal èn kon tapoe wan lijst foe sma di e wakti foe kisi bijbelstudie. Na so a de na foeroe presi na heri grontapoe.
15, 16. San wi ben kisi foe prati a sabi foe Gado moro esi, èn san na wan toe troe tori foe a sani disi?
15 Boen bigi kontren — bigi gebied gi a kotiwroko — e opo gi Gado en pipel. Ala di Jehovah, „a Masra foe a Kotiwroko”, e seni moro wrokoman go, tokoe foeroe de foe doe ete (Mateus 9:37, 38). Foe dati ede, foe prati a sabi foe Gado moro esi, a ’getrow srafoe’ gi wi wan sani di e taki wantewante foe spesroetoe bodoi so taki bijbel studenti kan go na fesi na jejefasi ibri tron te den e kisi leri. A de wan njoen poeblikâsi di wi kan gebroiki foe hori wan oso-bijbelstudie moro esi — kande na ini wan toe moen srefi. Èn wi kan tjari en makriki na ini wi boekoetas, na ini a pikin tas foe wi, noso na ini wi krosi saka srefi! Den hondrohondro doesoendoesoen sma di ben de na den „Prisiri Prèiseman”-distriktkongres foe Jehovah Kotoigi, ben prisiri foe kisi a njoen boekoe disi di abi 192 bladzijde èn di abi leki nen Sabi di e tjari joe go na têgo libi.
16 Skrifiman na ini difrenti kondre ben sreka materiaal di den ben poti makandra heri boen, èn baka ten den ben klari a wroko foe meki a Sabi-boekoe. Foe dati ede, a boekoe moesoe abi sani na ini di e hari a prakseri foe sma na heri grontapoe. Ma, a sa teki langa bifo a njoen poeblikâsi disi tjari kon na doro na ini den tongo foe sma na heri grontapoe? Nôno, bikasi wi kan vertaal wan boekoe di abi 192 bladzijde moro esi leki den moro bigi boekoe. Na ini oktober 1995, a Skrifi Komte foe a Tiri Skin ben feni en boen foe vertaal a boekoe disi foe Ingrisitongo go na ini moro leki 130 tongo.
17. Sortoe sani moesoe meki en moro makriki foe gebroiki a Sabi-boekoe?
17 Den spesroetoe sani na ini ibri kapitel foe a Sabi-boekoe moesoe sorgoe taki den studenti moesoe man go na fesi esi-esi. A boekoe e pristeri bijbel waarheid na wan fasi di e bow sma. A no e taki foeroe foe den falsi kerki leri. A fasi fa a skrifi na wan krin fasi èn a logis fasi fa den bodoi seti, moesoe meki a de wan makriki sani foe hori bijbelstudie èn foe jepi den sma foe froestan a sabi foe Gado. Boiti den tekst di den teki skrifi, tra tekst de di den studenti kan soekoe te den e sreka densrefi gi a takimakandra. Efoe a ten e gi okasi foe dati, dan den kan leisi den na a ten foe a studie, ala di a no ben sa de wan koni sani foe taki foe tra sani di no skrifi na ini a boekoe, di ben kan meki den edepenti no de so krin moro. Na presi foe dati, den sma di e hori bijbelstudie moesoe proeberi foe abi a koni foe si sani krin èn moesoe meki a studenti froestan san a boekoe e sori na ini ibri kapitel. Disi wani taki dati a sma di e hori a studie moesoe studeri fajafaja fosi, so taki en e froestan den edepenti krinkrin srefisrefi.
18. Sortoe rai wi e kisi ini a tori foe fa foe gebroiki a Sabi-boekoe?
18 Fa a boekoe Sabi di e tjari joe go na têgo libi kan meki a wroko foe meki disipel go moro esi? Wi kan studeri a boekoe disi di abi 192 bladzijde na ini wan sjatoe pisi ten, te joe teki en gersi tra boekoe. Èn den sma di „abi a joisti fasi gi têgo libi”, moesoe man foe leri nofo foe a studie disi, so taki den kan gi densrefi abra na Jehovah èn teki dopoe (Tori foe den Apostel 13:48). So boen, meki wi gebroiki a Sabi-boekoe boen na ini a diniwroko. Efoe wan bijbelstudenti studeri a moro bigi pisi foe wan tra boekoe kaba, dan a ben sa boen foe klari a boekoe dati. Na a tra sei, wi e kisi leki rai foe kanti go abra na a Sabi-boekoe. Baka te wan sma klari nanga a njoen poeblikâsi disi, dan wi no e kisi a rai foe studeri ete wan boekoe nanga a srefi studenti. Den sma di e teki waarheid èn e hori densrefi na dati, kan kisi moro sabi te den e kon na den konmakandra foe Jehovah Kotoigi èn te densrefi e leisi bijbel nanga den difrenti tra kresten poeblikâsi toe. — 2 Johanes 1.
19. Bifo wi hori wan bijbelstudie foe a Sabi-boekoe, foe san ede a ben sa de wan jepi foe loekoe sjatoe san skrifi tapoe bladzijde 175 te nanga 218 foe a boekoe Georganiseerd om onze bediening te volbrengen?
19 A Sabi-boekoe ben skrifi nanga a prakseri foe jepi wan sma foe kan gi piki tapoe ala den aksi di den owroeman e loekoe baka nanga den preikiman di no dopoe èn di wani foe teki dopoe leki Jehovah Kotoigi. Foe dati ede, bifo joe kenki boekoe na den bijbelstudie di joe abi now, wi e rikomanderi taki joe e loekoe den aksi tapoe bladzijde 175 te nanga 218 foe a boekoe Georganiseerd om uw bediening te volbrengen.a Disi sa jepi joe foe poti krakti na tapoe den aksi disi na den bijbelstudie foe a Sabi-boekoe.
20. San joe e prakseri foe doe nanga a boekoe Sabi di e tjari joe go na têgo libi?
20 Na ala presi, sma moesoe jere a boen njoensoe. Ija, libisma abi a sabi foe Gado fanowdoe, èn Jehovah abi den Kotoigi foe en foe meki sma kon sabi dati. Now wi abi wan njoen boekoe di wi lobi-ati Tata na hemel gi wi nanga jepi foe a getrow èn koni srafoe. Joe sa gebroiki en foe leri sma waarheid èn foe gi grani na a santa nen foe Jehovah? Seiker Jehovah sa blesi joe, ala di joe e doe ala moeiti foe jepi foeroe sma foe kisi a sabi di e tjari sma go na têgo libi.
[Foetoewortoe]
a Di a Watchtower Bible and Tract Society of New York, Inc., tjari kon na doro.
San joe ben sa piki?
◻ San joe ben sa kan taki foe na ati na agersifasi?
◻ San na a sabi foe Gado?
◻ Foe san ede libisma abi a sabi foe Gado fanowdoe?
◻ Sortoe njoen boekoe de foe kisi, èn fa joe e prakseri foe gebroiki en?
[Prenki na tapoe bladzijde 22]
Foeroe reide de foe san ede den miljardmiljard sma na grontapoe abi a sabi foe Gado fanowdoe