Ala sma ben de nanga bigi prisiri nanga a kon na doro foe a njoen boekoe na a distriktkongres
A njoen boekoe e poti krakti na tapoe a sabi foe Gado
1 Fa wi alamala ben de nanga prisiri foe a heri programa di wi ben kisi na a distriktkongres 1995 foe wi, di pasa! Tapoe satra bakadina, a prisiri foe wi ben pasa marki di wi ben jere taki den ben meki a kon na doro foe a njoen boekoe, a Sabi di e meki joe kisi têgo libi, bekènti èn a bodoi di abi foe doe nanga a boekoe di den ben gi baka dati. Den miljardmiljard sma na grontapoe abi sabi fanowdoe di soso Gado kan gi—sabi foe Gado nanga foe en Manpikin, Jesus Krestes.—Odo 2:1-6; Joh. 17:3.
2 A takiman ben taki nanga faja troetroe foe wan toe pisi foe a boekoe! Den span edeprakseri, den prenki di praktis, a positief fasi fa a e pristeri waarheid, den makriki aksi, èn na a kaba foe ibri kapitel, wan boksoe nanga a nen „Ondrosoekoe a sabi foe joe” de na mindri den sani di sa hari ala sma prakseri di e leisi en. Ma spesroetoe den bijbelstudie foe wi sa kisi wini, te den e leri den fondamenti bijbel leri gawgaw.
3 Na ini a kaba foe den lasti taki tapoe satra nanga sonde, den ben gi wi deki-ati foe hori wan osofamiri studie nanga jepi foe a njoen boekoe disi. Kande nownow wi kon sabi san skrifi na inisei kaba. Sondro degedege, joe taki toe foe den penti di joe abi na prakseri foe gebroiki, te joe e pristeri a njoen boekoe disi na ini a velddienst.
4 Penti foe loekoe baka: Kande joe e memre taki di a takiman ben pristeri a taki „Foe san ede libisma abi a sabi foe Gado fanowdoe”, a takiman ben poti krakti na tapoe wan lo penti, di abi na ini toe den wan di e kon now: (1) Te joe e gebroiki a boekoe disi foe hori studie, a no sa joisti foe gebroiki tra bodoi di no de na ini a boekoe, foe di a ben kan meki den edepenti lasi gowe; poti prakseri na tapoe, foe tjari kon na krin nomo san a boekoe e sori na ini ibri kapitel. (2) Den kapitel no langa so, so taki moro foeroe joe sa man foe doe wán kapitel ibri leisi te joe e studeri. (3) Na a kaba foe ibri kapitel den aksi na ini a boksoe nanga a nen „Ondrosoekoe a sabi foe joe” sa gi wan krin èn sjatoe loekoe baka.
5 Fa foe gebroiki en te joe e hori bijbelstudie: Foeroe preikiman aksi efoe a boen foe djompo go na a njoen boekoe disi, te den e hori den bijbelstudie. Efoe joe de fara kaba nanga a boekoe di joe e gebroiki now, a ben sa boen foe kaba a studie nanga a poeblikâsi dati. Efoe dati no de so, dan a ben sa boen foe drai go na a Sabi-boekoe. Efoe joe ben gebroiki wan brochure noso wan traktaat foe bigin wan bijbelstudie, sori tapoe a njoen boekoe na a ten te a e fiti èn gebroiki en te joe e hori a studie. Moro bodoi fa foe gebroiki a Sabi-boekoe sa kon na ini Wi Kownoekondre Dienst foe den moen di e kon.
6 Jehovah gi wi a njoen boekoe disi foe jepi wi foe leri trawan foe a sabi di e meki joe kisi têgo libi. Now wi moesoe sreka wisrefi boen foe dorodoro kan abi wan prati na ini a wroko di moesoe doe ete.