A Bijbel leri-buku—A moro prenspari bijbelstudie yepisani fu wi
1 Wi ben prisiri srefisrefi di wi kisi a buku San Bijbel e leri wi trutru? na a „Gi yesi na Gado” Distrikt Kongres! Den sma di ben de na a kongres ben breiti fu kisi wan fu den buku disi na a kaba fu a programa tapu satra. Fa wi sa gebroiki a nyun wrokosani disi fu gi sma leri? A buku meki spesrutu fu gebroiki en leki a moro prenspari bijbelstudie yepisani fu wi. Aladi wi sa prati a buku na ini maart fosi, toku den preikiman e kisi a deki-ati fu bigin gebroiki en wantewante fu bigin, noso fu go doro nanga wan bijbelstudie.
2 Gi den sma di e studeri kaba: Preikiman di e gebroiki a Sabi-buku noso a San Gado e aksi-brochure fu hori bijbelstudie, musu luku fa èn o ten den o bigin gebroiki a nyun buku na a studie. Efu yu bigin studeri nanga wan sma no so langa ete, dan a ben o bun fu bigin nanga a fosi kapitel fu a nyun buku. Efu yu de moro fara na ini a Sabi-buku, yu kan gebroiki a Bijbel leri-buku fu go doro nanga a studie, ma luku taki yu e bigin na a kapitel di e taki fu a srefi pisi tori na ini a Sabi-buku. Efu yu de na a kaba fu a Sabi-buku, dan yu kan bosroiti fu studeri a buku dati te na a kaba.
3 A no de fu taki dati wi alamala sabi furu sma di ben o kisi wini te den ben o studeri a Bijbel leri-buku. Fu san ede yu no e pristeri ibri sma wan bijbelstudie na ini a nyun yepisani disi di o leri den safrisafri moro fu den tru tori fu Bijbel? Fu eksempre, yu abi sma di studeri a San Gado e aksi-brochure noso a Sabi-buku kaba, ma den no gi densrefi abra èn teki dopu ete. Kande den sma disi o wani bigin studeri baka nanga yepi fu a nyun buku. Papa nanga mama kan bosroiti fu gebroiki a buku disi fu leri den pikin fu den san na a soifri sabi di abi fu du nanga a wani fu Gado.—Kol. 1:9, 10.
4 A di fu tu buku di yu kan gebroiki na wan bijbelstudie: Sani seti so, taki wan bijbelstudenti kan studeri wan tra buku te a kaba nanga a buku San Bijbel e leri wi trutru? Iya. Efu a de krin fu si taki a studenti e go na fesi safrisafri, èn taki a e kon kisi warderi gi den sani di a e leri, dan a bijbelstudenti kan studeri go doro na ini a buku Anbegi a wan-enkri tru Gado. Wi de seiker taki a Bijbel leri-buku sa de wan tumusi bun wrokosani di wi kan gebroiki te wi e du a wroko di wi kisi fu du, namku fu meki disipel.—Mat. 28:19, 20.