Aksi di opo kon

◼ Sortu tu buku wi musu studeri nanga den bijbelstudenti fu wi?

A Bijbel leri-buku na a moro prenspari buku di wi e gebroiki fu bigin wan bijbelstudie èn fu studeri go doro nanga sma. Aladi a no fowtu fu gebroiki wan tra publikâsi, soleki wan traktaat di fiti, fu bigin wan bijbelstudie, toku wi musu du muiti fu bigin studeri a Bijbel leri-buku nanga sma so esi leki a kan. Furu sma kisi bun bakapisi di den gebroiki a Bijbel leri-buku fu bigin bijbelstudie.

Te yu kaba studeri a Bijbel leri-buku nanga wan studenti èn a e go na fesi, dan yu musu studeri na Anbegi Gado-buku nanga en (Kol. 2:7). Bladzijde 2 fu a buku dati e sori fu san ede a buku disi meki: „Bijbel e gi ala sma di lobi Gado, a deki-ati fu ’frustan krin . . . [san na] a langa nanga a hei’ fu den warti tru tori fu en (Efeisesma 3:18). Na fu dati ede a buku disi meki. Wi howpu taki a sa yepi yu fu gro na yeye fasi. A sa yepi yu tu fu sreka yusrefi moro bun fu waka a smara pasi di e gi yu na okasi fu kisi libi na ini a regtfardiki nyun grontapu fu Gado.”

Efu wan studenti doro den marki fu teki dopu fosi a kaba studeri den tu buku, dan a musu studeri go doro teleki a kaba a di fu tu buku. Srefi efu a bijbelstudenti dopu kaba, a preikiman di e studeri nanga en kan teri den yuru fu a studie, a kan teri a sma leki gobaka, èn a kan teri en leki wan bijbelstudie. Efu wan tra preikiman e go makandra nanga a sma di e hori a studie èn a e teki prati na a studie, dan a kan teri a yuru sosrefi.