Pisi 1: Hori bijbelstudie di e go na fesi
San na wan bijbelstudie?
1 Na heri grontapu, a pipel fu Gado e hori sowan siksi milyun bijbelstudie ibri mun. Te wi e gi leri na wan bun fasi, dan wi kan yepi den bijbelstudenti disi fu go na fesi teleki den gi densrefi abra na Gado èn teki dopu, èn wi kan yepi den fu kon „koni nofo fu leri tra sma” (2 Tim. 2:2). Yu wani yepi a studenti fu yu fu go na fesi na a fasi dati? Bigin nanga a Kownukondre diniwroko disi, wi sa poti wan tu artikel di sa taki fu prenspari sani di wi kan du, so taki wi kan hori bijbelstudie di e go na fesi.
2 O ten wi kan taki dati wan sma na wan bijbelstudie: Te yu e hori wan takimakandra nanga wan sma doronomo èn te yu e fruklari Bijbel penti gi a sma nanga yepi fu Bijbel èn nanga yepi fu wan fu den publikâsi di wi e gebroiki fu studeri nanga sma, dan yu e hori wan bijbelstudie. Disi de so awansi yu e hori a studie na a mofodoro fu a sma, noso na telefon. Yu kan bigin teri a sma leki wan bijbelstudie te yu studeri tu leisi nanga en baka di yu sori en fa a studie e hori, èn efu a sori leki a sma o tan studeri.
3 Furu sma e gebroiki a San Gado e aksi-brochure nanga a Sabi-buku fu studeri nanga trawan. Baka te yu kaba studeri den buku disi nanga a sma, dan yu kan gebroiki na Anbegi Gado-buku fu go doro nanga a studie. Disi yu kan du spesrutu efu yu e si taki a sma e go na fesi, awansi na safrisafri, èn taki a sma e kon frustan den sani di a e leri. Yu kan gebroiki a brochure Yu Kan De Gado Mati! fu studeri nanga sma di no kisi furu skoroleri èn di no man leisi so bun.
4 A bijbelstudie wroko yepi milyunmilyun sma fu tron trutru disipel fu Yesus Krestes (Mat. 28:19, 20). Te yu e fiti den rai di yu sa kisi na ini den tra artikel di e kon èn di e taki moro fara fu a tori disi, dan yu sa man hori bijbelstudie di e go na fesi.