Hori bun bijbelstudie na sma mofodoro èn nanga yepi fu telefon
1. Fu san ede wi e hori bijbelstudie nanga sma?
1 A de wan prisiri sani fu bigin wan bijbelstudie nanga wan sma! Ma te wi feni wan sma di wani studeri Bijbel, dan dati na soso a bigin. A marki fu a studie na fu yepi a sma fu kon tron wan tru disipel fu Krestes (Mat. 28:19, 20). San kan yepi wi fu doro a marki disi?
2. Fa bijbelstudie e hori na sma mofodoro èn nanga yepi fu telefon, èn fu san ede a sani disi e wroko bun?
2 Sma di no abi ten: Sma na ini a ten disi abi so furu sani fu du, taki den no abi ten gi tra sani. Na son presi, furu sma no de klariklari fu gebroiki wan heri yuru fu studeri Bijbel. Fu man yepi den sma disi, wi kisi deki-ati fu bigin èn fu hori wan bijbelstudie na den sma mofodoro noso nanga yepi fu telefon. Na ini a bigin, wi kan hori den studie disi syatu, èn wi kan taki fu wan tu bijbeltekst nomo nanga yepi fu wán noso tu paragraaf fu wan buku, soleki a Bijbel leri-buku. A de fu prèise taki now furu preikiman e hori bijbelstudie nanga sma na den mofodoro, noso nanga yepi fu telefon!
3. Fu san ede wi musu pruberi fu hori a bijbelstudie moro langa te wi e studeri nanga wan sma na en mofodoro?
3 Ma wi musu tan hori syatu bijbelstudie na a mofodoro fu sma fu ala ten? Nôno. Aladi a de wan koni sani fu no tan tumusi langa na a fosi studie, toku Wi Kownukondre diniwroko fu yuni 1990, bladzijde 10 e taki: „Efu a bijbelstudie e go moi kaba èn a belangstelling fu na ososma gro, dan a studie ben sa kan hori pikinso moro langa.” Disi na wan tumusi prenspari sani. Fu gi wan eksempre: Wan pikin di e dede fu angri, musu kisi pikinso-pikinso nyanyan fosi, teleki a e kisi ensrefi baka fu man nyan na a yoisti fasi. Ma yu denki taki a o kon tranga, èn taki a o gro na a yoisti fasi efu a e kisi pikinso-pikinso nyanyan nomo ala ten? We, na so a de fanowdu taki wan bijbelstudenti e kisi wan moro langa bijbelstudie èn taki a e du dati doronomo, so taki a kan gro kon tron wan lepi futuboi fu Gado.—Hebr. 5:13, 14.
4. Sortu wini a abi te wi e hori bijbelstudie na ini sma oso?
4 Oso-bijbelstudie: A moro bun fu studeri nanga sma na ini den oso, noso na wan tra presi di fiti. Disi sa meki en moro makriki gi a studenti fu leri sani, èn a sa yepi en fu kon frustan san Gado Wortu wani taki (Mat. 13:23). Boiti dati, a leriman o man fiti a studie moro bun na a situwâsi fu a studenti. Sosrefi, te a studie e hori moro langa, dan a studenti kan ondrosuku Gado Wortu moro fini, èn dati sa tranga a bribi fu en.—Rom. 10:17.
5. San yu kan du fu meki taki a studie e hori na ini na oso fu a sma, na presi fu en mofodoro?
5 San yu kan du fu meki taki a studie e hori na ini na oso fu a sma, na presi fu en mofodoro? Baka wan tu syatu studie, yu kan aksi a studenti efu a no wani studeri moro langa. Noso sondro fu aksi en dati langalanga, yu kan aksi: „Yu abi ten tide fu sidon taki makandra fu a tori disi?” Noso yu kan aksi en: „Omeni ten yu wani gebroiki tide fu taki fu a tori disi?” Efu a studenti no wani studeri na ini oso, dan yu musu tan go doro nanga den syatu studie na en mofodoro. Na wan tra ten, te dati fiti, dan yu kan pruberi baka fu hori a studie na ini a sma oso.
6. Nanga sortu marki wi musu du wi diniwroko, èn fa a rai na ini na artikel disi kan yepi wi fu doro a marki dati?
6 Te wi e tan suku sma di warti, dan wi no musu frigiti fu san ede wi e hori bijbelstudie nanga sma. A marki fu wi na fu yepi opregtisma fu gi densrefi abra na Yehovah èn fu tron dopu futuboi fu en. Meki Yehovah blesi a muiti di wi e meki fu du wi diniwroko nanga a marki disi na prakseri.—2 Tim. 4:5.