Aksi di opo kon

◼ Wan sisa di e hori wan Bijbelstudie na a mofodoro fu wan sma musu weri wan sani fu tapu en ede te a e wroko nanga wan preikiman di de wan brada?

Te wan sisa e hori wan Bijbelstudie ibri wiki èn wan brada di de wan Kownukondre preikiman de nanga en na a studie, dan a sisa musu weri wan sani fu tapu en ede (1 Kor. 11:3-10). A Waktitoren fu 15 yuli 2002 bladzijde 27 e taki: „Te yu luku en bun, dan disi na wan seti di sreka na fesi kaba fu gi leri, pe a sma di e hori a studie e teki fesi fu gi trawan leri. Efu sani de so, dan a studie e hori soleki fa sani musu pasa na wan gemeente konmakandra. Efu wan umasma di de wan dopu kotoigi e hori so wan studie èn wan mansma di de wan dopu Kotoigi de drape, dan a fiti taki a sisa weri wan sani fu tapu en ede.” A musu du disi awansi a e hori a Bijbelstudie na ini wan sma oso, na wan sma mofodoro, noso na wan tra presi.

Ma efu a sisa no bigin studeri ete na a mofodoro fu a sma, dan a no abi fu tapu en ede te wan brada di de wan preikiman de nanga en. Disi de so, srefi efu na wan gobaka a e tyari fu sori a sma fa wi e hori wan Bijbelstudie, noso te a e taki nomo fu wan tori di de na ini wan fu den buku di wi e studeri nanga sma. Nofo tron a de so taki baka wan pisi ten te wi tyari wan tu gobaka, wi e bigin trutru nanga wan Bijbelstudie na a mofodoro fu wan sma. Fu dati ede wan sisa musu luku a situwâsi fosi èn luku o ten a fiti fu weri wan sani fu tapu en ede.