Hori bijbelstudie di e go na fesi
1 Na hori foe wan bijbelstudie de wan foe den sani di e gi moro satisfaksi ini na kristen diniwroko foe wi. A wani taki namkoe, dati wi e skrifi tapoe ati (2 Kor. 3:2, 3). Fa a de wan sani di e pai foe si fa sma nanga soema wi e studeri, e teki sabi ini den, e poti bijbel gronprakseri ini den libi èn e tjari den libi kon ini kroederi nanga Jehovah regtvaardiki markitiki!
2 Ma kow wi taki dati joe no e si na go na fesi di joe ben sa wani si — den sma di joe e leri no e tjari so esesi kenki kon leki joe ben sa wani, èn kande na belangstelling foe den e gwe na wan tra sé. Kande joe moe ondrosoekoe joe égi bekwaamheid foe leri sma. A studie ben kan hori tapoe wan moro moi fasi èn di e meki a sma go na fesi? Den rai di e kon now kande de wan jepi.
Praktis rai foe leri sma
3 Sreka na fesi de wan toemsi prenspari sani. Disi wani taki dati joe abi den ede prakseri foe na les krin ini joe froestan èn joe abi den tekst foe na bijbel ondro joe makti.
4 Sabi moe tjari kon abra tapoe na sma di wi e leri tapoe wan eenvoudig, logis fasi. Efoe disi e psa tapoe wan switi lobifasi sondro foe de formeel, dan wan fasi e kon pe na sma di e leri no e de nanga wan span èn so a sa man foe teki a leri. A de sosrefi toe prenspari dati na ibri fisiti a de leri praktis punt di abi waarde gi en persoonlek. A moe firi dati a libi foe en e kon moro goedoe èn dati a de kon tanapoe ini wan moro krosbé matifasi nanga Gado.
5 A kan de sosrefi toe boen foe leri na sma di joe e leri fa a moe studeer. Disi wani taki foe eksempre dati joe e jepi en foe si den edeprakseri ini na stof èn foe a strepi den moro prenspari wortoe ofoe pisi foe zin. Jepi en foe taki den sani di e komoto wantronwantron foe en ati, foe di a de taki den sani nanga en égi wortoe na presi dati a lési san skrifi. Efoe joe kweki ini na sma di joe e leri wan lostoe foe kon sabi moro foe a tori di tra lési joe sa taki nanga en, dan a sa gridi moro foe sreka ensrefi a fesi èn a so fasi go moro esi na fesi.
6 Te joe doro na ati foe na sma, dan disi sa jepi en foe froestan fa na sani di a de studeer abi foe doe nanga en égi libi. Foe doro ati foe sma, Jezus ben gebroiki aksi di ben meki den sma di ben arki en moe teki prakseri. Loekoe eksempre foe disi ini Matteus 16:13-16; 17:24-27 èn Lukas 10:25-27. Gebroiki gersi tori na wan konifasi soleki Jezus ben sori disi de ook toe wan boen sani. Loekoe pikinso toe fa gersitori kan tjari wan punt kon krin na fesi. — Loekoe Joe kan libi foe tégo ini wan paradijs na grontapoe, blz. 36, par. 5.
7 Sontron djens de wan sani di e tapoe a go na fesi foe wan sma di e studeer a bijbel (2 Tim. 3:12). Nofotron na djens disi e kon foe na sé foe en égi oso- ofoe famiriman ofoe foe sma foe en wrokope. A de toemsi prenspari dati joe sreka a sma di joe e leri a fesi tapoe sowan ferfolgoe. Meki a si fa disi ben taki na fesi (Matt. 10:34-39; Luk. 21:16-19). Jepi en foe teki na joisti fasi na fesi foe ferfolgoeman (Matt. 5:43-48; Rom. 12:17). Te a ferfolgoe e go doro, jepi en dan foe hori doro foe di joe e poti en prakseri na tapoe eksempre ini na bijbel foe sma di ben hori doro. — Job 1:20-22; Odo 27:11.
8 Bifo joe kan hori wan studie di e go na fesi, dan joe moe feni wan sma di wani foe studeer. Efoe nownow joe no e hori wan bijbelstudie, foe san-ede joe no ben sa taki pikinso nanga prékiman di abi wel wan studie foe leri foe den fa joe kan opo sowan studie? Joe ben sa kan go na wan studie foe si fa na prékiman e hori na studie. Disi kan jepi joe foe hori na studie na tapoe wan fasi dati a de go na fesi, foe di joe e meki gebroiki foe boen taktik foe leri sma. Aksi ini begi Jehovah ofoe a wani jepi joe foe opo wan studie èn go wroko ini kroederi nanga joe begi. Go na ala belangstelling di joe e miti. Son sma ini na gemeente di koni foe opo studie, kande wani foe gi jepi foe di den wani gi joe abra wan toe foe den studie foe den na tra sma. Sondro degedege foeroe njoen studie kan opo nanga jepi foe wi njoen Tégo libi-boekoe, di wi e presteri ini februari nanga maart. Efoe wi tjari den rai di gi djaso kon ini praktijk, dan den sma nanga soema wi e studeer kande sa go esesi na fesi èn go dini Jehovah.