Kibri a papira disi
Hori bijbelstudie di e go na fesi
Na ini na inibere pisi disi, yu abi den moro prenspari penti fu den artikel di ben kon na ini Wi Kownukondre diniwroko, di ben sori fa fu hori bijbelstudie di e go na fesi. Wi alamala e kisi a deki-ati fu kibri na inibere pisi disi èn fu gebroiki en te wi e hori bijbelstudie. Boiti dati, a sma di e teki fesi na a preikiwroko konmakandra, kan poti prakseri na wan tu penti fu na inibere pisi disi. Den dienst-opziener kan gebroiki en tu fu hori lezing te den e fisiti den difrenti bukustudie grupu.
Pisi 1: San na wan bijbelstudie?
Te yu e hori wan takimakandra nanga wan sma doronomo, awinsi yu no e taki langa, èn te yu e fruklari Bijbel penti gi a sma nanga yepi fu Bijbel èn nanga yepi fu wan fu den publikâsi di wi e gebroiki fu studeri nanga sma, dan yu e hori wan bijbelstudie. Yu kan bigin teri a sma leki wan bijbelstudie te yu studeri tu leisi nanga en baka di yu sori en fa a studie e hori, èn efu a sori leki a sma o tan studeri.—km 7/04 blz. 1.
Den publikâsi di yu kan gebroiki
◼ San Gado e aksi foe wi?
◼ Sabi di e tjari joe go na têgo libi
◼ Anbegi a wan-enkri tru Gado
◼ Yu Kan De Gado Mati! Yu kan gebroiki a brochure disi fu studeri nanga sma di no kisi so furu skoroleri noso sma di no man leisi so bun.
Pisi 2: Fa fu sreka wisrefi fu hori a bijbelstudie
Wi musu hori a studie na so wan fasi, taki wi e doro na ati fu a studenti. Disi wani taki dati wi musu sreka wisrefi bun, aladi wi e hori a studenti na prakseri.—km 8/04 blz. 1.
Fa wi musu sreka wisrefi
◼ Luku san na a nen fu kapitel noso a les, luku den ondro-edeprakseri, nanga den prenki.
◼ Suku den piki tapu den aksi di skrifi, èn hari strepi soso na ondro den moro prenspari wortu.
◼ Luku sortuwan fu den bijbeltekst yu sa leisi na a studie. Skrifi wan tu sani na a lanki fu a publikâsi di yu e studeri nanga a sma, fu sabi san a tekst e taki.
◼ Sreka yusrefi fu luku den prenspari penti baka na a kaba fu a studie.
Fiti a les na a studenti
◼ Begi gi a studenti fu a kisi yepi èn fu a kisi san a abi fanowdu.
◼ Bigin luku na fesi sortu penti a studenti kan feni muilek fu frustan noso san a kan feni muilek fu bribi.
◼ Prakseri fu disi: ’San a studenti musu kon frustan moro bun, noso na sortu spesrutu penti a musu wroko ete, so taki a kan gro na yeye fasi? Fa mi kan doro en ati?’
◼ Efu a de fanowdu, dan yu kan sreka yusrefi fu fruteri wan agersitori, fu fruklari wan penti, noso fu poti wan tu aksi di sa yepi a studenti fu frustan wan spesrutu tori noso wan tekst.
Pisi 3: Gebroiki Bijbel bun
A marki di wi wani doro te wi e hori bijbelstudie, na fu ’meki disipel’. Wi wani yepi sma fu frustan èn fu teki den leri fu Gado Wortu èn sosrefi fu fiti den leri disi na ini den libi (Mat. 28:19, 20; 1 Tes. 2:13). Fu dati ede, Bijbel musu de a moro prenspari sani di wi e gebroiki na a studie.—km 11/04 blz. 4.
Gi leri komoto fu a Wortu fu Gado
◼ Sori a studenti fa a kan feni son bijbeltekst na ini en eigi Bijbel.
◼ Leisi den bijbeltekst di e sori taki den sani di wi e bribi, na sani di skrifi na ini Bijbel, èn taki fu den tekst dati.
◼ Poti aksi. Na presi fu fruklari den bijbeltekst gi a studenti, dan meki a studenti fruklari den tekst gi yu.
◼ No meki a tori kon muilek gi a studenti. No pruberi fu fruklari ibri pisi fu wan bijbeltekst. Taki soso fu den sani di de fanowdu fu tyari a tori kon na krin.
◼ Sori a studenti fa fu gebroiki den sani di a leri. Yepi a studenti fu si fa a kan gebroiki den bijbeltekst na ini en eigi libi.
Pisi 4: Fa fu yepi a studenti fu sreka ensrefi
Furu tron wan studenti di e leisi a les na fesi, di e hari strepi na ondro den piki, èn di e denki fa fu gi piki nanga en eigi wortu, e go na fesi moro esi na yeye fasi. Fu dati ede, te yu seti sani fu studeri Bijbel nanga a sma ibri wiki, dan sreka wan les makandra nanga en fu sori en fa a kan sreka ensrefi. Furu tron a bun fu sreka wan heri kapitel noso les makandra nanga a studenti.—km 12/04 blz. 1.
Fa fu hari strepi èn skrifi sani na ini yu buku
◼ Sori a studenti fa a kan feni den yoisti piki tapu den aksi di skrifi.
◼ Sori a studenti yu eigi buku di yu e gebroiki fu studeri nanga en, so taki a kan si fa yu hari strepi soso na ondro den moro prenspari wortu noso pisi fu a paragraaf.
◼ Yepi a studenti fu si fa ibri tekst di kari e horibaka gi wan penti di e kon na krin na ini a paragraaf. Sori en fa a kan skrifi wan tu sani na a lanki fu en eigi buku di a e gebroiki fu studeri.
Luku san na den edepenti èn luku syatu san yu ben leri
◼ Sori a studenti taki a kan luku a nen fu a kapitel noso les, sosrefi den ondro-edeprakseri, nanga den prenki bifo a e bigin fu sreka ensrefi.
◼ Gi a studenti a deki-ati fu luku den prenspari penti baka, te a kaba sreka ensrefi.
Pisi 5: Luku o furu yu man du na a studie
Efu wan sma di e hori wan studie wani sabi o furu a kan du ibri leisi nanga a studenti, dan a abi fu luku a situwâsi fu a studenti èn omeni a studenti man leri. A musu luku tu san na a situwâsi fu ensrefi, èn a koni di a abi fu gi leri.—km 1/05 blz. 1.
Meki a studenti kon kisi wan tranga bribi
◼ A de moro prenspari fu yepi a studenti fu frustan wan pisi tori bun, leki fu studeri wan lo sani nanga en na ini wan syatu pisi ten.
◼ Teki ala ten di de fanowdu fu yepi a studenti fu frustan san a e leri èn yepi en fu bribi den sani di a e leri.
◼ Teki nofo ten fu luku den prenspari bijbeltekst di e horibaka gi den sani di a studenti e leri.
Hori yusrefi na a thema fu a studie
◼ Efu a studenti wani fu taki furu fu afersi di abi fu du nanga ensrefi, dan kande a sa de fanowdu fu seti sani so, taki unu e taki fu den tori dati baka a studie.
◼ No taki tumusi fu tra sani di no abi fu du nanga a studie. Taki wanwan leisi fu tra sani di no abi fu du nanga a studie èn fu ondrofenitori, so taki yu no e hori a studenti na baka fu kisi a soifri sabi fu den prenspari Bijbel leri.
Pisi 6: San yu kan du te wan bijbelstudenti poti wan aksi
Te wan bijbelstudie e waka bun kaba, dan a moro bun fu poti prakseri na Bijbel leri wan fru wan, na presi fu dyompo fu a wan tori go na a trawan. Disi e yepi a studenti fu kisi soifri sabi moro nanga moro, so taki a kan go na fesi na yeye fasi.—km 2/05 blz. 6.
Abi a koni fu si sani krin
◼ Furu tron a de so taki yu kan gi piki wantewante tapu den aksi, te den abi fu du nanga a pisi tori di unu e luku.
◼ Efu den aksi no abi noti fu du nanga a pisi tori di unu e studeri, noso efu yu musu ondrosuku a tori fosi, dan unu kan luku dati na wan tra ten. Kande a ben o bun fu skrifi den sortu aksi dati.
◼ Efu wan studenti e feni en muilek fu agri nanga wan spesrutu Bijbel leri, dan luku na ini tra publikâsi di e taki finifini fu a tori dati.
◼ Efu a studenti no kisi na overtoigi ete, dan libi a tori gi wan tra leisi èn go doro fu studeri nanga en.
Abi sakafasi
◼ Efu yu no sabi a piki tapu wan aksi, dan no gi wan piki soleki fa yusrefi e prakseri fu sani.
◼ Leri a studenti safrisafri fa a kan ondrosuku sani.
Pisi 7: Begi na a studie
A blesi fu Yehovah de prenspari, efu yu wani taki a bijbelstudenti e go na fesi na yeye fasi. Fu dati ede, a de wan yoisti sani fu bigin èn fu tapu nanga wan begi te yu e studeri nanga sma.—km 3/05 blz. 4.
Fa fu bigin nanga begi na wan studie
◼ Nofo tron wi kan begi na a fosi leisi te wi o studeri nanga wan sma di e bribi na ini Gado kaba.
◼ Ma nanga tra sma, a de fanowdu fu gebroiki koni fu si o ten wi kan bigin begi nanga den.
◼ Yu kan gebroiki Psalm 25:4, 5 nanga 1 Yohanes 5:14 fu sori fu san ede a de fanowdu fu begi.
◼ Yu kan gebroiki Yohanes 15:16 fu sori taki wi musu begi Yehovah na ini a nen fu Yesus Krestes.
Fu san yu kan begi
◼ A fiti fu prèise Yehovah leki a Sma fu pe a leri komoto.
◼ Sori nanga den wortu di yu e taki, dati yu e broko yu ede trutru nanga a studenti.
◼ Sori taki yu e warderi na organisâsi di Yehovah e gebroiki.
◼ Aksi Yehovah fu blesi a muiti di a studenti e meki fu libi akruderi den sani di a e leri.
Pisi 8: Tyari den studenti kon na a organisâsi
A marki di wi abi te wi e hori bijbelstudie no de wawan fu leri sma den sani di Bijbel e leri, ma wi wani yepi den studenti tu fu kon tron wan pisi fu a Kresten gemeente. Ibri wiki te wi e studeri nanga sma, dan wi musu gebroiki wan tu miniti fu fruteri a studenti wan tu sani fu na organisâsi fu Yehovah.—km 4/05 blz. 8.
Gemeente konmakandra
◼ Fruteri a studenti fa ibri gemeente konmakandra e hori. Na a fosi studie, yu kan bigin gi en wan kari fu kon na den konmakandra.
◼ Fruteri a studenti wan tu moi penti di kon na krin na den konmakandra.
◼ Gi a studenti deki-ati fu kon na a Memrefesa, na den bigi konmakandra, èn na a gemeente te a kring-opziener o fisiti wi.
◼ Gebroiki den fowtow na ini den publikâsi fu wi fu meki den studenti si fa sani e waka na den konmakandra.
◼ Gi den deki-ati fu leisi a brochure Jehovah’s Getuigen—Wie zijn zij? Wat geloven zij? (Yehovah Kotoigi—Suma na den? San den e bribi?)
Gebroiki den video fu meki a studenti kisi warderi
◼ Jehovah’s Getuigen—De organisatie achter de naam
◼ Onze gehele gemeenschap van broeders
◼ Verenigd door Goddelijk onderwijs
◼ Tot de einden der aarde
Pisi 9: Sreka a studenti fu gi kotoigi te a e kisi na okasi
Te den bijbelstudenti e bigin poti bribi na ini den sani di den e leri, dan den sa wani taki fu den sani dati.—km 5/05 blz. 1.
Gi den deki-ati fu gi kotoigi
◼ A abi mati nanga famiriman di a ben sa kan aksi fu kon sidon arki na a studie?
◼ A de so taki wan sma na en wrokope, na skoro, noso tra sma di a sabi ben sori taki den wani sabi moro fu a bun nyunsu?
Leri den fu fruteri trawan san den e bribi
◼ Na son pisi fu a studie, yu kan aksi a studenti: „Fa yu ben o gebroiki Bijbel fu fruklari a tru tori disi gi yu famiri?”
◼ Yepi a studenti fu kon frustan taki a de prenspari fu abi lespeki èn fu taki nanga switifasi te a e taki nanga trawan fu Gado èn fu den sani di A abi na prakseri.
◼ Studenti kan gebroiki a brochure Jehovah’s Getuigen—Wie zijn zij? Wat geloven zij?, fu meki mati nanga famiriman frustan taki a bribi fu wi nanga den sani di wi e du, komoto fu Bijbel.
Pisi 10: Leri den studenti fu du na oso-fu-oso preikiwroko
Te den owruman kon si taki wan bijbelstudenti doro den markitiki fu tron wan preikiman di no dopu ete, dan a studenti dati kan bigin go makandra nanga a gemeente na ini a publiki diniwroko.—km 6/05 blz. 1.
Sreka makandra nanga a studenti
◼ Sori a nyun preikiman pe a kan feni eksempre di o sori en fa fu pristeri publikâsi.
◼ Yepi en fu suku wan fu den makriki eksempre di e sori fa fu bigin wan takimakandra di e hari sma prakseri na ini a kontren drape.
◼ Gi en deki-ati fu gebroiki Bijbel na ini en diniwroko.
◼ Oefen makandra nanga en. Sori en fa a kan gi piki na wan koni fasi tapu den sani di sma gwenti fu taki.
Preiki makandra
◼ Meki a studenti luku fosi fa yu e hori a takimakandra di unu ben sreka na fesi.
◼ Hori na prakseri fa a studenti de èn san a man du. Son leisi a kan de bun fu meki a hori wan pisi nomo fu a takimakandra.
◼ Yepi a nyun preikiman fu kon kisi a gwenti fu teki prati na a preikiwroko.
Pisi 11: Yepi nyun preikiman fu tyari gobaka
Efu a studenti wani fu tyari wan gobaka, dan na a fosi leisi te a e miti a sma a musu bigin sreka sani fu go baka na a sma. Gi a studenti deki-ati fu sori taki a e broko en ede trutru nanga den sma nanga suma a e taki. Leri en safrisafri fa a kan meki den ososma taki fa den e denki, fa a kan arki san den e taki, èn fa a kan si sortu broko-ede den abi.—km 7/05 blz. 1.
Sreka unsrefi fu go baka
◼ Luku baka fu san unu ben taki a fosi leisi nanga na ososma, èn sori a studenti fa a kan suku wan pisi tori di o hari a prakseri fu na ososma.
◼ Sreka unsrefi fu hori wan syatu takimakandra, pe a studenti o leisi wan bijbeltekst èn sosrefi wan paragraaf na ini wan publikâsi.
◼ Sreka wan aksi di unu kan poti na a kaba fu a takimakandra.
Go baka wantewante
◼ Gi a studenti deki-ati fu go baka wantewante na ala den sma di sori taki den wani sabi moro.
◼ Yepi a studenti fu si taki a de fanowdu fu horidoro na ini a muiti di a e meki fu miti den sma na oso.
◼ Sori a nyun preikiman fa a kan meki mofo fu go baka na a sma, èn yepi en fu kon frustan o prenspari a de fu drai go baka na a sma soleki fa a ben pramisi.
Pisi 12: Yepi nyun preikiman fu bigin hori bijbelstudie
A de tumusi prenspari taki yu e du neleki Yesus, fu di yu de wan bun eksempre na ini yu diniwroko. Te a studenti fu yu e luku na eksempre di yu e gi na ini a diniwroko, dan a sa frustan taki a marki fu tyari gobaka, na fu bigin bijbelstudie.—km 8/05 blz. 1.
Aksi sma efu den wani studeri
◼ Sori a studenti taki a no de fanowdu furu tron fu fruklari finifini fa a studie e hori.
◼ Furu tron, a moro bun fu sori na ososma fa a studie e hori, kande fu di yu e luku wán noso tu paragraaf fu a publikâsi di unu o studeri.
◼ Luku wan fu den eksempre baka di e sori fa fu bigin bijbelstudie èn oefen dati tu.—km 8/05 blz. 8; km 1/02 blz. 6.
Leri nyun preikiman fu de leriman
◼ Gi a studenti deki-ati fu gi en nen fu go na a Theokrasia Diniwroko-skoro.
◼ Seti sani so taki a nyun preikiman kan go na tra bijbelstudie makandra nanga yu, èn meki a taki wan tu sani na a bijbelstudie.