Pisi 7: Hori bijbelstudie di e go na fesi

Begi na a studie

1. (a) Fu san ede a fiti fu bigin èn fu tapu wan bijbelstudie nanga begi? (b) Fa wi kan bigin begi na wan bijbelstudie?

¹ A blesi fu Yehovah de prenspari, efu yu wani taki bijbelstudenti e go na fesi na yeye fasi (1 Kor. 3:6). Fu dati ede, a de wan yoisti sani fu bigin èn fu tapu nanga wan begi te yu e studeri nanga sma. Nofo tron wi kan du disi na a fosi leisi te wi o studeri nanga wan sma di e bribi na ini Gado. Nanga tra studenti, a de fanowdu kande fu gebroiki koni fu si o ten wi kan bigin begi na a studie. Yu kan gebroiki Psalm 25:4, 5 èn 1 Yohanes 5:14 fu yepi a studenti frustan fu san ede a de fanowdu fu begi. Gebroiki sosrefi Yohanes 15:16 fu fruklari fu san ede a de prenspari fu begi Yehovah nanga yepi fu Yesus Krestes.

2. Te wan sisa e go na wan studie makandra nanga wan brada di dopu, noso nanga wan mansma di de wan preikiman di no dopu ete, dan suma musu begi?

² Suma musu begi na wan bijbelstudie? Efu wan brada di dopu e go makandra nanga wan sisa na wan studie, dan a brada musu begi, èn a sisa kan hori a studie aladi a e tapu en ede nanga wan sani (1 Kor. 11:5, 10). Na a tra sei, efu wan Kownukondre preikiman, na wan mansma di no dopu ete, èn a e go makandra nanga wan sisa na wan studie, dan a sisa musu begi. Na ini a situwâsi disi a sisa musu tapu en ede nanga wan sani te a e begi èn sosrefi te a e hori a studie.

3. Fu sortu sani di fiti wi kan taki te wi e begi na wan bijbelstudie?

³ Fu san yu kan begi: Te yu e begi na wan bijbelstudie, dan yu no musu begi tumusi langa, ma yu musu begi fu spesrutu sani. Boiti taki yu e suku Gado en blesi gi a studie, èn yu e taki en tangi gi den tru tori di un leri, dan a fiti tu fu prèise Yehovah leki a Sma fu pe a leri komoto (Yes. 54:13). Wi kan gebroiki wortu tu di e sori taki wi e broko wi ede trutru nanga a studenti, èn wortu di e sori taki wi e warderi na organisâsi di Yehovah e gebroiki (1 Tes. 1:2, 3; 2:7, 8). Te wi e begi Yehovah fu blesi a muiti di a studenti e meki fu libi akruderi den sani di a e leri, dan dati kan yepi en fu si o prenspari a de fu de wan „sma di e du san a wortu e taki”.​—Yak. 1:22.

4. Sortu wini a abi fu bigin èn fu tapu wan bijbelstudie nanga begi?

⁴ Fu begi na wan bijbelstudie abi furu wini. A e tyari Gado en blesi kon (Luk. 11:13). A e sori o seryusu a de fu studeri Gado Wortu. Te a studenti e arki den begi fu wi, dan a e leri fa fu begi (Luk. 6:40). Boiti dati, begi di e komoto fu wan ati di furu nanga lobi gi Gado èn di e sori tangi gi den tumusi moi fasi fu en, kan yepi a studenti fu kisi wan tranga banti nanga Yehovah.

Sani di yu kan fruteri fu den tijdschrift

A Waktitoren 15 feb.

„Son leisi, wi e yere tori pe sma e taki dati wan wondru pasa. [Kari wan eksempre.] Son sma e bribi taki den sani disi pasa trutru. Tra sma no e bribi den sani disi. A tijdschrift disi e ondrosuku efu den wondru di kari na ini Bijbel ben pasa trutru èn efu den sortu wondru dati e pasa na ini a ten disi.” Leisi Yeremia 32:21.

Ontwaakt! 22  feb.

„Na ini owruten, Gado ben gi pikin a komando fu gi grani na den mama èn sosrefi na den papa. [Leisi Exodus 20:12.] Yu denki taki mama e kisi grani na wan fasi di fiti na ini a ten disi? [Gi a sma na okasi fu piki.] A tijdschrift disi e sori san na den tyalensi di mama e ondrofeni na ini difrenti kondre èn fa den e handri te den e kisi fu du nanga den tyalensi dati.”

A Waktitoren 1 mrt.

„Yu denki taki grontapu ben o de wan moro bun presi efu ala sma ben o handri akruderi a rai disi? [Leisi Romesma 12:17, 18. Baka dati, gi a sma na okasi fu piki.] A de wan sari taki son leisi sma e kisi kesekese nanga makandra. A tijdschrift disi e sori fa wi kan gebroiki a rai fu Bijbel fu lusu trobi èn fa wi kan kon abi vrede baka nanga makandra.”

Ontwaakt! 8 mrt.

„Ibri yari, moro nanga moro stroom de fanowdu. Yu kan prakseri san ben o pasa efu wan dei a stroom di wi abi fanowdu, no ben o de moro? [Gi a sma na okasi fu piki.] A tijdschrift disi e sori fa sma kon kisi moro stroom na wan fasi di no e doti grontapu. A tijdschrift disi e sori sosrefi suma na a Sma fu pe ala krakti e komoto.” Leisi Yesaya 40:26.