Kibri a papira disi
Wan tu takimakandra di yu kan gebroiki na ini a preikiwroko
Fa fu gebroiki a papira disi
Furu fu den takimakandra di e kon now, de fu feni na ini wan fu den owru Wi Kownukondre Diniwroko. Gebroiki so furu fu den leki yu wani te yu e preiki, èn luku fa a e go. Kibri a papira disi èn gebroiki en te yu e sreka yusrefi gi a preikiwroko.
Efu yu e hori en syatu, dan yu kan hari wan sma prakseri, so taki a wani sabi moro fu Gado Wortu. Poti wan spesrutu aksi èn leisi syatu san Bijbel e taki. Yu kan pruberi fu gebroiki den eksempre disi:
„Te yu e prakseri a ten di e kon, dan yu e denki taki sani o waka bun noso yu e denki taki sani o kon moro ogri? [Gi okasi fu piki.] Bijbel ben taki kaba fu den ogri sani di wi e si na ini a ten disi, èn sosrefi fa sani o waka.”—2 Tim. 3:1, 2, 5; Odo 2:21, 22.
„Ini a ten disi sma e broko den ede srefisrefi fu di den no sabi fa fu feni bun datrayepi. Yu sabi taki Gado pramisi fu lusu ala den problema di siki e tyari kon?”—Yes. 33:24; Openb. 21:3, 4.
„Yu ben sabi taki Bijbel e taki na fesi taki, te fu kaba wán tirimakti nomo o tiri a heri grontapu?”—Dan. 2:44; Mat. 6:9, 10.
„Fa yu e prakseri taki sani ben o de efu Yesus Krestes ben o tiri grontapu?”—Ps. 72:7, 8.
„Furu sma e pina, bika trawan e desko den fu di den na wan man noso wan uma, fu di den abi wan tra bribi, noso fu di den skin blaka noso weti. Fa yu denki taki Gado e feni en taki sma e desko trawan?”—Tori. 10:34, 35.
„Wi sabi taki Yesus Krestes ben du furu wondru di a ben de na grontapu. Efu yu ben man aksi en fu du ete wan wondru, sortuwan yu ben o aksi en fu du gi yu?”—Ps. 72:12-14, 16.
„Furu sma kon weri kaba fu arki problema. Den wani yere fa problema o lusu. Ma pe wi kan feni trutru lusu gi den problema fu wi?”—2 Tim. 3:16, 17.
„Ini a Wi Tata Begi, yu e begi taki a Kownukondre musu kon. Yu sabi san a Kownukondre dati wani taki?”—Openb. 11:15.
Aksi di yu kan poti fu bigin wan takimakandra
Den aksi disi teki puru fu wan tu tori di skrifi na ini a Redeneren-buku. Den poti a nomru fu a bladzijde pe a piki de fu feni na ini a buku:
Fu san ede wi e kon owru èn fu san ede wi e dede? (90)
San e pasa nanga sma baka te den dede? (91)
Fu san ede wi kan bribi ini Gado? (172)
Gado e broko en ede trutru nanga den sani di e pasa nanga libisma? (174)
Gado na wan trutru sma? (174)
Ala bun sma e go na hemel? (195)
Wan sma musu go na hemel fu kan abi wan trutru koloku tamara? (196)
Fu san ede a prenspari fu sabi Gado en nen èn fu gebroiki en tu? (213)
A de trutru so taki Yesus Krestes na Gado? (228)
San Gado Kownukondre o du? (244)
San na a marki fu a libi? (264)
San kan yepi sma fu meki a trowlibi fu den waka moro bun? (207)
Gado e feni ala kerki bun? (359)
Fa wan sma kan sabi sortu kerki bun? (365)
Omeni makti Satan abi na ini a grontapu disi? (380)
Fu san ede Gado e gi pasi taki pina de? (269)
Fu san ede so furu ogridu de? (179)
Suma e tiri a grontapu disi? Na Gado noso Satan? (428)
Eksempre fu pristeri a San Gado e aksi-brochure
„Sondro tweifri yu e agri nanga mi taki furu sma e bribi na ini Gado. Ala sma di e bribi na ini Gado e agri taki A e aksi wan sani fu wi. Ma sma no e agri nanga makandra te den e taki fu a sani di Gado e aksi fu wi.” Baka dati, pristeri a sma a San Gado e aksi-brochure, go na les 1, èn taki fu dati.
„Ini a ten disi furu problema de na ini na osofamiri libi. Oiti yu aksi yusrefi san kan yepi sma fu abi wan koloku osofamiri libi?” Baka di a sma piki, fruteri en taki Gado sori na ini Bijbel san kan yepi sma trutru fu abi wan koloku osofamiri. Leisi Yesaya 48:17. Go na les 8 fu a San Gado e aksi-brochure. Taki fu wan tu fu den bijbeltekst di kari na ini a brochure, èn di e gi ibri memre fu na osofamiri bun rai. Leisi den aksi na a bigin fu a les. Aksi a sma efu a wani leisi den piki.
„A brochure disi e meki sma kon sabi den prenspari leri fu Bijbel heri bun. Tapu ibri bladzijde yu sa feni piki tapu aksi di dangra libisma furu hondrohondro yari kaba. Fu eksempre: San na a prakseri di Gado abi nanga grontapu?” Go na les 5 èn leisi den aksi na a bigin fu a les. Aksi na ososma sortu wan fu den aksi e hari en prakseri moro furu, leisi a (den) paragraaf di abi fu du nanga na aksi dati, èn suku den tekst di fiti. Taigi en taki den bun piki tapu den tra aksi de fu feni tu na a srefi makriki fasi. Aksi en efu yu kan kon baka fu taki nanga en fu wan tra aksi.
„Fu san ede yu denki taki someni ogridu e pasa na skoro? Yu denki taki na ogridu disi e pasa fu di papa nanga mama no e gi den pikin fu den nofo leri? Noso a kan de wan tra sani, soleki a krakti di Didibri abi tapu sma?” Gi okasi fu piki. Efu a sma e taki dati a e kon fu di Didibri abi krakti tapu sma, leisi Openbaring 12:9, 12. Sori en san Didibri e du fu meki a libi na grontapu kon moro bruya. Baka dati, go na les 4 fu a San Gado e aksi-brochure èn aksi a sma efu oiti a ben aksi ensrefi pe Didibri komopo. Leisi den tu fosi paragraaf èn fruteri a sma san den paragraaf disi wani taki. Ma efu yu e aksi a sma fu san ede so furu ogridu e pasa na den skoro, èn a e piki taki „papa nanga mama no e gi den pikin fu den nofo leri”, dan leisi 2 Timoteyus 3:1-3. Sori en sortu sani kan meki taki a problema disi kon moro ogri. Baka dati, go na les 8 fu a San Gado e aksi-brochure, leisi paragraaf 5 èn go doro nanga a takimakandra.
„Yu denki taki a de wan bun sani fu fruwakti taki a Mekiman sa sori wi fa fu abi wan bun osofamiri libi?” Baka di a sma piki, sori en a San Gado e aksi-brochure. Go na les 8, èn fruteri en taki a les disi abi Bijbel gronprakseri gi ibri memre fu na osofamiri. Aksi en efu yu kan sori en fa fu gebroiki a brochure makandra nanga Bijbel so taki a man abi moro furu wini fu disi.
„Te yu e prakseri ala den problema di wi e kisi na ini a ten disi, yu e denki taki begi kan yepi wi trutru? [Gi okasi fu piki.] Furu sma e taki dati begi e gi den krakti. [Leisi Filipisma 4:6, 7.] Ma toku a kan taki wan sma e feni taki a e begi fu soso. [Go na les 7 fu a San Gado e aksi-brochure.] A brochure disi e sori fa begi kan yepi wi trutru.”
„Wi e taki nanga den sma fu wi birti èn wi e aksi den fu san ede so furu difrenti sortu kerki de na grontapu, aladi wan Bijbel nomo de. San yu e denki? Fu san ede so furu bruya de? [Gi okasi fu piki. Go na les 13 fu a San Gado e aksi-brochure, èn leisi den aksi na a bigin fu a les.] Yu sa kisi bun piki tapu den aksi dati te yu e leisi a les disi.”
Baka di yu pristeri wan sma A Waktitoren nanga Ontwaakt!, aksi en efu yu kan leisi wan syatu paragraaf gi en. Efu yu e kisi na okasi fu du dati, go na les 5 fu a San Gado e aksi-brochure. Sori en den aksi di de na a bigin fu a les, èn aksi en fu arki so taki a man feni a piki tapu a fosi aksi te yu e leisi a fosi paragraaf. Baka di yu leisi a paragraaf, poti na aksi èn arki san a e taki. Aksi a sma efu a wani a brochure. Efu a teki en, seti sani fu go baka fu arki fa a o piki den tu tra aksi.
Wan tu eksempre fu pristeri a Sabi-buku
Hori a Bijbel ini yu anu èn bigin a takimakandra nanga den wortu disi: „Tide wi e sori ala sma na ini yu strati wan tekst fu Bijbel. A tekst e taki . . . ” Leisi Yohanes 17:3 èn aksi a sma: „Yu si san na a pramisi efu wi abi a yoisti sortu sabi? [Gi okasi fu piki.] Ma pe wan sma kan feni a sabi dati?” Baka di a sma piki, sori en a Sabi-buku èn taki: „A buku disi e taki fu a sabi di e tyari sma go na têgo libi. A e du dati fu di a e piki den sani di sma gwenti aksi fu Bijbel.” Sori en den nen fu den kapitel fu a buku, èn aksi a sma efu oiti a ben prakseri fu wan fu den tori disi.
„Oiti yu aksi yusrefi efu Gado e broko en ede trutru nanga kruktudu èn nanga a pina di wi e si na ala sei noso di wisrefi e ondrofeni? [Gi okasi fu piki.] Bijbel e gi wi a dyaranti taki Gado lobi wi èn taki a o yepi wi te wi de na ini banawtu.” Leisi wan tu pisi fu Psalm 72:12-17. Go na kapitel 8 fu a Sabi-buku èn fruteri a sma taki a kapitel e gi wan moi piki tapu wan aksi di milyunmilyun sma poti. Na aksi dati na: „Fu san ede Gado e gi pasi meki pina de?” Efu a kan, taki fu den pisi fu Bijbel ini paragraaf 3 te nanga 5, noso du dati te yu go baka na a sma.
„Furu fu wi lasi wan lobiwan fu wi na ini dede. Oiti yu aksi yusrefi efu wi o si den baka? [Gi okasi fu piki.] Yesus ben sori sma taki den lobiwan fu wi kan kon na libi baka. [Leisi Yohanes 11:11, 25, 44.] A du dati hondrohondro yari na fesi. Ma toku a sani disi e sori wi san Gado pramisi taki a sa du gi wi.” Go na a prenki na tapu bladzijde 85 fu a Sabi-buku, èn leisi san skrifi na a prenki. Baka dati, sori en a prenki na tapu bladzijde 86, èn taki fu en. Poti wan aksi gi en so taki yu kan tyari wan gobaka, fu eksempre: „Yu wani sabi fu san ede sma e kon owru èn fu san ede den e dede?” Go baka na en fu taki fu kapitel 6.
„Oiti yu aksi yusrefi fu san ede libisma wani libi moro langa?” Baka di a sma gi piki, go na kapitel 6 fu a Sabi-buku èn leisi paragraaf 3. Taki-go-taki-kon fu den tekst di kari drape. Sori a sma den tu aksi di de na a kaba fu a paragraaf, èn aksi en efu a wani abi a piki tapu den aksi disi. Efu a wani dati, dan go doro nanga den tra paragraaf.
„Wi e aksi sma efu den e bribi a sani disi . . . ” Leisi Genesis 1:1. Aksi a sma: „Yu feni taki a sani disi di skrifi dyaso bun?” Efu a sma feni en bun, dan taki: „Mi tu. Ma yu e denki taki, fu di Gado meki ala sani, dan en na a Sma di meki ogridu e pasa?” Baka di yu arki a piki di a sma gi, leisi Preikiman 7:29. Opo a Sabi-buku, kapitel 8, èn leisi paragraaf 2. Efu na ososma no e agri nanga san skrifi na Genesis 1:1, dan gi en deki-ati fu ondrosuku den buweisi di e sori taki wan Mekiman de.—Luku a Redeneren-buku, bladzijde 383-385.
„Na ini a ten disi den gronprakseri di abi fu du nanga a fasi fa wi musu libi, e kenki doronomo. Yu no e agri fu dati ede taki wi abi wan sani fanowdu di e gi wi bun rai na ini a libi? [Gi okasi fu piki.] Aladi Bijbel na a moro owru buku di de, toku a e gi bun rai gi a libi ini a ten disi èn gi wan koloku osofamiri libi.” Baka dati, go na kapitel 2 fu a Sabi-buku, leisi paragraaf 10 èn a fosi lin fu paragraaf 11. Taki tu fu 2 Timoteyus 3:16, 17.
„Yu wani sabi san o pasa nanga wi èn nanga grontapu? [Gi okasi fu piki.] Wi kan gebroiki wán wortu nomo fu taki fu den sani di Bijbel e taki fu a tamara fu wi. A wortu dati na Paradijs! Na ini a paradijs Gado ben poti den tu fosi libisma di a ben meki. Luku a prenki disi di e sori wi fa a ben de.” Go na bladzijde 8 fu a Sabi-buku èn leisi paragraaf 9 di abi na ondro-edeprakseri „A libi na ini a Paradijs”. Taki dan fu den penti na ini paragraaf 10 èn leisi a tekst fu Yesaya 55:10, 11, di kari drape. Aksi efu yu kan go doro nanga paragraaf 11-16, pe skrifi fa a libi sa de na ini a Paradijs di meki kon bun baka.
Te yu e go baka na den sma di yu ben gi A Waktitoren nanga Ontwaakt!, dan yu kan taki disi:
„A lasti leisi di mi ben de dya, mi ben breiti taki mi ben kan libi A Waktitoren gi yu. Kande yu ben si taki a heri nen fu a tijdschrift na: „A Waktitoren — A e bariwroko gi Yehovah Kownukondre”. Tide mi wani fruteri yu san na a Kownukondre disi èn san a o du gi yu nanga yu osofamiri.” Baka dati go na les 6 fu a San Gado e aksi-brochure. Leisi a les èn taki nanga a sma fu disi so langa a abi a ten fu du dati.
„No so langa pasa mi ben kon na yu, èn mi libi A Waktitoren nanga Ontwaakt! gi yu. Den tijdschrift disi e meki sma kisi moro lespeki gi Bijbel èn gi a rai di Bijbel e gi wi so taki wi kan tyari wisrefi bun. Fu di mi e feni taki a prenspari taki ala sma musu frustan Gado Wortu, meki mi kon baka fu sori yu wan sani di sa yepi yu fu du dati.” Sori en a San Gado e aksi-brochure noso a Sabi-buku, èn taki dati yu ben sa wani studeri nanga en.
Efu yu e pristeri wan fu den moro owru buku di abi 192 bladzijde, dan yu kan pruberi fu bigin so:
„Sma feni taki a prenspari fu kisi bun skoroleri. Ma san yu e prakseri? Sortu leri wan sma musu kisi efu a wani de trutru koloku èn efu a wani taki sani musu waka bun nanga en na ini a libi? [Gi okasi fu piki. Baka dati leisi Odo 9:10, 11.] A buku disi [kari a nen fu a buku di yu e pristeri] na wan buku di e gi sma Bijbel leri. A e sori go na a wan-enkri sani di kan gi wi sabi di e tyari wi go na têgo libi.” Sori a sma wan spesrutu eksempre na ini a buku èn gi en deki-ati fu leisi en.
Tra buku noso brochure
Yu kan feni tra eksempre fu wroko nanga tra buku nanga brochure na ini na Index van Wachttoren-publikaties na ondro:
Aanbiedingen (Den pristeri)
Gerangschikt naar publicatie (Den nen fu den buku noso brochure)
Bigin wantewante nanga wan bijbelstudie
Fu man bigin wantewante nanga wan bijbelstudie, pruberi fu gebroiki wan fu den fasi disi:
„Yu sabi taki wan tu miniti nomo sari kaba fu feni a piki tapu wan prenspari Bijbel aksi? Fu eksempre, . . . ” Baka dati, yu kan poti wan fu den aksi di de na a bigin fu wan fu den les fu a San Gado e aksi-brochure, èn di yu denki taki o hari a prakseri fu a sma.
„Mi kon na yu fu sori yu fa wi e studeri Bijbel nanga sma. Yu no abi fu pai gi a bijbelstudie disi. A e teki sowan feifi miniti nomo fu sori yu fa wi e du dati. Yu abi feifi miniti?” Efu a abi a ten dati, dan yu kan gebroiki les 1 fu a San Gado e aksi-brochure fu sori en fa a studie e go. Leisi wan noso tu tekst nomo gi en. Aksi en baka dati: „O ten yu o abi sowan 15 miniti so taki wi kan taki fu a tra les?”
„Furu sma abi wan Bijbel, ma den no sabi taki Bijbel e fruteri wi den sani di wi alamala wani sabi. Wan fu den sani disi na fa a tamara fu wi o de. Efu yu e gebroiki a yepisani disi [a San Gado e aksi-brochure noso a Sabi-buku] wan yuru so na ini wan wiki, dan na ini wan tu mun nomo yu kan frustan den prenspari sani fu Bijbel. Mi ben sa prisiri fu sori yu fa wi e du disi.”
„Mi kon dyaso fu aksi yu efu yu wani wan bijbelstudie. Yu no abi fu pai gi dati. Efu a kan, dan mi wani sori yu na ini wan tu miniti nomo fa osofamiri e studeri Bijbel makandra na ini moro leki 200 kondre. Wi kan taki fu iniwan fu den tori disi. [Sori en den nen fu den kapitel na ini a Sabi-buku.] Sortuwan e hari yu prakseri?” Wakti meki a sma teki wan fu den. Go na a kapitel di a sma teki, èn bigin a studie nanga a fosi paragraaf.
„Mi e gi sma Bijbel les. Den no abi fu pai gi dati èn mi abi ten gi moro studenti. A buku disi o yepi wi fu studeri Bijbel. [Sori en a Sabi-buku.] A studie e teki wan tu mun nomo èn yu o kisi a piki tapu aksi soleki: ’Fu san ede Gado e gi pasi meki pina de? Fu san ede wi e kon owru èn fu san ede wi e dede? San e pasa nanga den lobiwan fu wi di dede? Fa wi kan kon krosibei na Gado?’ Mi kan sori yu nanga wan fu den les fa wi e studeri nanga sma?”
Efu yu feni wan pristeri kaba di yu kan gebroiki heri bun fu yepi sma di wani sabi moro, tan gebroiki en! Kenki a pisi nomo di yu o taki te yu o pristeri a publikâsi fu a mun.