Waka baka Jehovah foe di joe abi opregti broko-ede nanga trawan
1 Jehovah na a moro bigi eksempre foe wan sma di e sori opregti broko-ede nanga trawan. Leki na Universeel Soeverein a sabi heri boen èn e broko en ede nanga sani di libisma di a meki, abi fanowdoe (1 Petr. 5:7). Jesus ben gi den bakaman foe en deki-ati foe sori den eigifasi foe en Tata, di e meki son opo èn na alen fadon na tapoe den regtfardiki èn onregtfardiki sma (Mat. 5:45). Joe kan waka baka Jehovah te joe e sori opregti broko-ede nanga trawan — foe di joe de klariklari foe prati a Kownoekondre boskopoe nanga ibri sma di joe e miti. Te joe sabi finifini san de na ini den brochure di wi sa gebroiki ini a diniwroko na ini juli, dan dati sa meki joe de na ini wan boen posisi foe gi jeje jepi na trawan. Den rai di e kon now e gi wan toe idea fa joe kan sreka joesrefi gi a fosi fisiti èn baka dati, fa foe meki gobaka tapoe a joisti ten na sma di abi belangstelling.
2 Te wi e pristeri a brochure „Bekommert God zich werkelijk om ons?” (Troetroe Gado e broko en ede nanga wi?), joe ben kan taki:
◼ „Oiti joe aksi joesrefi foe san ede Gado e gi pasi meki libisma e njan pina efoe troetroe a e broko en ede nanga den? [Gi okasi foe piki.] A brochure disi no e gi a piki soso tapoe wan fasi di e gi satisfaksi, ma a e sori toe taki Gado pramisi foe poeroe ala den ogri di libisma tjari kon tapoe densrefi èn tapoe a tanpresi foe en na grontapoe.” Leisi paragraaf 23 tapoe bladzijde 27. Sori a prenki na ondro en èn leisi Psalm 145:16 foe paragraaf 22. Pristeri a brochure. Efoe na ososma teki en, poti wan aksi di joe kan piki na a tra fisiti, soleki: „Joe ben sa wani sabi fa Gado sa meki en prakseri kon troe, foe tjari blesi kon gi a libisma famiri èn foe kenki grontapoe kon tron wan paradijs?”
3 Te joe e go baka na den wan na soema joe ben libi a brochure „Bekommert God zich werkelijk om ons?”, dan joe ben sa kan opo wan tra takimakandra na so wan fasi:
◼ „Di mi ben kon a lasti leisi, wi ben loekoe taki Gado troetroe e broko en ede nanga wi èn taki na en prakseri foe poeroe ala den ogri di libisma tjari tapoe ensrefi èn tapoe a tanpresi foe en na grontapoe.” Opo a brochure go na a prenki tapoe bladzijde 2 nanga 3 èn taki: „Wi ben tapoe a takimakandra foe wi nanga na aksi: Fa Gado sa meki a prakseri foe en kon troe foe tjari blesi kon gi a libisma famiri èn foe kenki grontapoe kon tron wan paradijs? San joe e prakseri?” Gi okasi foe piki. Drai go na bladzijde 17 èn leisi paragraaf 2 nanga Danièl 2:44. Baka dati, leisi paragraaf 12 tapoe bladzijde 18. Aksi na ososma efoe a ben sa wani foe doe pisi 9 foe a brochure nanga joe. Efoe a ben sa wani, studeri a pisi dati nanga en.
4 Djaso wan fasi de di joe ben kan gebroiki foe pristeri a brochure „Wanneer iemand die u dierbaar is, sterft.” (Te wan lobiwan foe joe dede). Sori a fesisei foe en èn taki:
◼ „Tide wi e tjari a brochure disi di gi trowstoe nanga howpoe na miljoenmiljoen sma di lasi den lobiwan na ini dede. Joe aksi joesrefi oiti sortoe howpoe de gi den dede wan? [Gi okasi foe piki.] Bijbel e sori krinkrin a pramisi foe Gado foe wan opobaka.” Leisi Johanes 5:28, 29. Opo a brochure èn taki foe den penti di e sori ini a lasti paragraaf tapoe bladzijde 28 èn a fosi paragraaf tapoe bladzijde 31. Sori den prenki di e kroederi nanga dati. Pristeri a brochure. Joe kan opo a pasi gi wan gobaka foe di joe e aksi: „Fa wi kan de seiker taki, te foe kaba, dede sa poeroe gowe krinkrin?”
5 Pe joe ben libi a brochure na baka „Wanneer iemand die u dierbaar is, sterft”, kande joe wani gebroiki a pristeri disi na a gobaka:
◼ „Di wi ben taki a lasti leisi, wi ben taki foe a toemoesi moi howpoe foe wan opobaka. A brochure di mi ben libi gi joe na baka, e froeteri foe san ede wi kan de seiker taki, te foe kaba, Gado sa poeroe dede krinkrin. Joe no ben e feni taki den pramisi foe Gado e gi trowstoe nanga seikerfasi?” Gi okasi foe piki. Baka dati, drai go na bladzijde 31 ini a brochure èn leisi a di foe toe nanga a di foe dri paragraaf, makandra nanga Openbaring 21:1-4. Poti krakti tapoe a fanowdoe di wi abi foe njan boen foe a libi sondro foe dede oiti. A de na a belangstelling di a sma sori nanga den situwâsi tapoe a momenti dati, di sa meki taki joe kan pristeri wan bijbelstudie ini a Sabi-boekoe noso poti wan tra aksi foe opo a pasi gi wan tra fisiti.
6 Joe ben sa kan taki a sani di e kon now te joe e pristeri a brochure „Wat is het doel van het leven? — Hoe kunt u het vinden?” (San na a marki foe a libi? — Fa joe kan feni dati?):
◼ „Foeroe sma aksi densrefi san na a marki foe a libi? Den aksi densrefi: ’Foe san ede mi de djaso? Pe mi e go? Fa a tamara foe mi sa de?’ Pe joe e denki wi kan feni den piki? [Gi okasi foe piki.] Loekoe san bijbel e taki. [Leisi Psalm 36:9.] A no de reidelek foe taki dati a Mekiman foe libisma de na ini a moro boen posisi foe froeteri wi foe san ede wi de djaso? [Gi okasi foe piki.] A brochure disi e sori a toemoesi moi prakseri di Gado abi gi wi.” Drai go na den bladzijde 20 nanga 21, èn leisi na ondro-edeprakseri èn taki foe a prenki; pristeri a brochure baka dati. Efoe a teki en, aksi: „Fa wi kan de seiker taki a de a prakseri foe Gado ete gi libisma foe libi foe têgo na ini wan paradijs na grontapoe?” Meki wan mofo foe go baka.
7 Efoe a brochure „Wat is het doel van het leven? — Hoe kunt u het vinden?” ben libi na baka, joe ben kan taki wan sani leki disi te joe e drai go baka:
◼ „Na a lasti fisiti foe mi, mi ben prisiri srefisrefi foe taki nanga joe fa bijbel e sori taki, a libi foe sma troetroe abi wan marki.” Sori a prenki tapoe bladzijde 31 èn aksi: „Fa wi kan de seiker taki a de a wani foe Gado ete taki libisma moesoe libi foe têgo na ini wan paradijs na grontapoe?” Leisi paragraaf 3 tapoe bladzijde 20. Taki foe den penti na ondro na ondro-edeprakseri „Nog steeds Gods voornemen” tapoe bladzijde 21. Drai go na a bakasei foe a brochure èn leisi foe a pristeri foe wan oso-bijbelstudie sondro foe pai gi dati. Sori a Sabi-boekoe èn aksi a sma foe sori en fa wi e gebroiki en leki wan jepi foe studeri bijbel.
8 A diniwroko foe wi moesoe sori na opregti belangstelling di wi abi foe jepi den wan di abi wan opregti ati „[foe] kon kisi wan soifri sabi foe waarheid” (1 Tim. 2:4). Foe dati ede, meki ten na ini a velddienst schema foe joe foe go baka na ibri sma na soema joe libi a brochure na baka. A sori di joe e sori troetroe broko-ede nanga den, kan abi leki bakapisi taki joe e jepi den wan di e geme èn e soktoe foe den tegoe sani di falsi relisi e doe, foe kon tron sma di kan kisi a marki foe tan na libi (Esek. 9:4, 6). So srefi, joe sa ondrofeni a prisiri èn a satisfaksi di e kon foe a sabi di joe sabi taki joe e waka baka Jehovah foe di joe abi opregti broko-ede nanga trawan. — Teki gersi Filipisma 2:20.