No tapoe foe meki a boen njoensoe bekènti
1 Den fosi kresten ben si a diniwroko foe den leki wan serjoesoe sani. Lukas ben froeteri: „Ibri dei na ini a tempel èn oso-foe-oso den ben tan go doro sondro foe tapoe foe gi leri èn foe meki a boen njoensoe foe a Krestes, Jesus, bekènti” (Tori. 5:42). Noti, no wan froefolgoe srefi, ben kan tapoe den! (Tori. 8:4) Ibri dei den ben taki foe waarheid nanga tra sma.
2 Fa a de nanga wi? Aksi joesrefi: ’Mi e froestan a tranga fanowdoe foe a ten? Mi abi a firi foe tan go doro sondro foe tapoe foe meki a boen njoensoe bekènti?’
3 Disiten eksempre foe sma di e preiki sondro foe tapoe: Wan sisa di ben abi polio, ben libi foe wan isri fokofoko. A no ben man foe go na a Kownoekondre zaal noso foe go na wan bigi konmakandra. Ma a ben doe foeroe foe meki a boen njoensoe bekènti. Na ini a pisi ten foe 37 jari di a ben libi foe na isri fokofoko, a ben man jepi 17 sma foe kon sabi waarheid! Fa a ben doe dati? Ala di a no ben man go na den doro foe sma, tokoe a ben feni wan fasi foe gi okasi kotoigi ibri dei na den sma di ben kon na ini kontakti nanga en.
4 Den brada foe wi na Bosnia ben abi foe kakafoetoe gi orlokoe èn a pina di den ben pina foe di den ben lasi sani. Ma tokoe doronomo den e go doro foe preiki gi tra sma. Na Sarajevo den preikiman abi wan gemiddelde foe 20 joeroe ibri moen, te den e taki nanga tra sma foe a boen njoensoe, èn ibriwan foe den abi wan gemiddelde foe toe bijbelstudie. Ala di den de na ini wan toemoesi ogri situwâsi, tokoe den e preiki èn e gi leri na sma sondro foe tapoe.
5 So srefi den jongoewan e sori wan faja gi a diniwroko. Sma ben poti wan osofamiri di de Kotoigi na Rwanda, na ini wan kamra pe sroedati ben sreka densrefi foe kiri den. Na osofamiri ben aksi primisi foe begi fosi. Den ben kisi a primisi, èn a jongoe oemapikin, Debora, ben begi tranga: „Jehovah, a wiki disi Papa nanga mi ben prati feifi tijdschrift. Fa wi o go baka na den sma disi foe leri den waarheid èn foe jepi den foe kisi libi?” Bikasi foe a tranga bribi èn a lobi foe en gi a diniwroko, den no ben kiri na osofamiri.
6 Na ini a ten disi, a de fanowdoe foe soekoe okasi foe gi kotoigi na tra sma èn foe soekoe den wan di „abi a joisti jejefasi gi têgo libi” (Tori. 13:48). Akroederi a situwâsi foe a kontren, den gemeente owroeman e sreka sani foe gi kotoigi leki groepoe na tapoe ten di e fiti, awansi na mamanten, na bakadina, noso na mofoneti. Den artikel na ini Wi Kownoekondre Dienst èn den pisi na tapoe wi Diniwroko-konmakandra, kring-konmakandra, nanga distriktkongres e gi rai biten èn e gi deki-ati foe teki prati na den difrenti fasi foe gi kotoigi foe a Kownoekondre. Boiti dati, den kring-opziener nanga distrikt-opziener e leri preikiman foe gi kotoigi na strati, den e sori den fa foe wroko na ini bisnis kontren, èn den e sori den tra fasi fa den kan gi kotoigi na ala presi pe sma de foe feni. Ala den sani disi e poti krakti na tapoe disi: No tapoe foe meki a boen njoensoe bekènti!
7 Den apostel foe Jesus ben froeklari sondro frede: „Wi no kan tapoe foe taki foe den sani di wi si èn jere.” Fa den ben kan horidoro ala di den ben abi ala den gens disi? Den ben aksi Jehovah foe jepi den, èn dati a ben doe, èn „den alamala, ben kon foeroe nanga santa jeje èn den ben taki a wortoe foe Gado sondro frede” (Tori. 4:20, 29, 31). A no ala sma e kisi toemoesi aparti ondrofenitori na ini a diniwroko, ma efoe troetroe wi wani foe meki a boen njoensoe bekènti sondro foe tapoe èn efoe wi e doe moeiti foe doe dati ibri dei, dan Jehovah sa jepi wi.