Fa den o yere?
1. Fu san ede a kan muilek fu du a preikiwroko, èn fu san ede wi e tan preiki?
1 Fu di a dei fu Yehovah e kon krosibei heri esi, meki a de tumusi prenspari fu yepi furu tra sma fu kon kisi soifri sabi fu Gado, èn fu den sani di a o du gi libisma (Yoh. 17:3; 2 Petr. 3:9, 10). A sani disi kan muilek son leisi, fu di furu sma no wani arki noso kande den e spotu wi fu di wi e du a preikiwroko (2 Petr. 3:3, 4). Toku wi abi ala reide fu bribi taki furu sma de ete na ini a kontren fu wi, di sa teki a bun nyunsu te den yere dati. Fa den sma disi o yere efu wan sma no preiki gi den?—Rom. 10:14, 15.
2. Fa na eksempre fu na apostel Paulus e gi wi deki-ati?
2 Te wi e kisi gens: Fu di furu sma de ete di de klariklari fu arki a boskopu fu Gado Kownukondre, meki wi no musu tapu fu preiki. Filipi ben de a fosi foto na ini Europa, pe na apostel Paulus ben preiki a bun nyunsu. Di sma ben fruteri lei fu en èn fu Silas, dan sma fon den nanga tiki, èn den poti den na ini strafu-oso (Tori. 16:16-24). Ma a hati sani dati di Paulus ondrofeni, no ben meki taki a frede èn tapu nanga a preikiwroko. Di a go na a tra preikiwaka fu en na ini a foto Tesalonika, dan ’Gado gi en a deki-ati fu fruteri sma a bun nyunsu fu Gado’ (1 Tes. 2:2). Na eksempre fu Paulus e sori fu san ede wi ’no e tapu’ fu preiki a bun nyunsu.—Gal. 6:9.
3. San meki taki son sma di no ben wani arki fosi, e denki tra fasi now?
3 Furu sma di no ben wani arki someni yari langa, e denki tra fasi now fu a boskopu fu wi. Kande den e denki tra fasi, fu di den abi moni problema, fu di den siki, fu di wan famiriman fu den dede, noso kande den e broko den ede nanga den sani di e pasa na grontapu (1 Kor. 7:31). Sonwan fu den yonguwan di ben e kisi gens fu den papa nanga mama, tron bigisma èn den wani arki. Te wi e tan preiki, dan den sma disi e kisi na okasi fu „kari a nen fu Yehovah” bifo a lati tumusi.—Rom. 10:13.
4. Fu san ede wi e „tan” preiki?
4 „Tan” preiki: A lobi di wi abi lobi gi Gado èn gi tra sma, e meki taki wi e „tan” du a wroko di wi abi fu preiki èn fu meki disipel, neleki fa den apostel ben du dati na ini a fosi yarihondro (Tori. 5:42). Furu sma na ini a ten disi e „soktu èn e geme fu ala den tegu sani” di e pasa now (Esek. 9:4). Den sma disi e kisi trutru howpu èn frulekti te den yere a bun nyunsu! Srefi te furu sma no wani arki, toku Bijbel e gi wi a dyaranti taki Yehovah e prisiri nanga a muiti di wi e meki.—Hebr. 13:15, 16.