Tan preiki
1 Son leisi wi kan feni taki wi e wroko ibri tron baka na ini a kontren fu wi, èn taki wi e wroko en finifini aladi furu sma no e arki wi. Ma prenspari reide de fu san ede wi musu tan preiki.—Mat. 28:19, 20.
2 Meki ala sma yere: Yesus ben taki na fesi dati a Kownukondre preikiwroko ben o de wan prenspari sani di e sori taki wi e libi na ini a ten fu „a kaba fu a grontapu sistema disi”. Boiti dati, a ben taki tu dati a bun nyunsu ben o preiki „so taki sma fu ala kondre kan yere dati” (Mat. 24:3, 14). Te sma e si fa wi e preiki a Kownukondre bun nyunsu, dan dati na wan bun kotoigi gi den. Baka te wi gowe libi a kontren, dan a kan de so taki son sma e taki ete fu wi. Srefi efu den no ben arki a boskopu fu wi, a kan taki den e taki ete fu wi furu yuru langa noso furu dei baka dati. Te wi e frustan fu san ede wi e du wi diniwroko, dan dati sa yepi wi fu horidoro awansi san e pasa. Te wi e gi kotoigi èn te wi e warskow sma fu a pori di e kon, dan na so fasi wi abi wan prati na a kontru fu Bijbel profeititori, èn dati e plisi Yehovah.—2 Tes. 1:6-9.
3 Wi musu horidoro: Fu di furu sani de di e hari sma prakseri èn fu di furu sani e teki den ten, meki wi musu horidoro te wi e pruberi fu yepi wan sma di wani sabi moro. Wán yari langa, Kotoigi ben go ala wiki na wan uma, fosi a bosroiti fu kari den Kotoigi kon na ini en oso fu abi wan Bijbel takimakandra nanga den. A ben yere moi sani, èn a ben lobi dati so te taki a ben wani studeri Bijbel. Baka dati, a bigin go na den konmakandra èn syatu baka dati a taki dati a wani teki dopu.
4 A situwâsi na grontapu e kenki esi-esi, èn a fasi fa sma e denki e kenki tu. A kan de so taki furu sma di no ben wani arki wi fosi, wani arki wi now te wi e fruteri den fu a moi howpu di wi abi. Srefi efu wán sma nomo ben o arki a Kownukondre boskopu, dan wi no horidoro fu soso.
5 Na heri grontapu a de so taki moro nanga moro sma e „soktu èn e geme fu ala den tegu sani di e pasa” (Esek. 9:4). Wi e kisi moro nanga moro Kownukondre preikiman, èn disi e sori taki den sma di abi a yoisti denki e arki a Kownukondre boskopu (Yes. 2:2, 3). Fu dati ede, meki wi tan preiki go doro èn meki wi sori lobi fu di wi horidoro fu ’tyari bun nyunsu di abi fu du nanga wan moro bun sani’.—Yes. 52:7; Tori. 5:42.