Oso-foe-oso sondro foe tapoe pikinso
1 Ini na Israèl foe owroeten, den ben tjari slakti-ofrandi ala dei (Ex. 29:38-42). A faja foe na altari ben tan bron; a smoko di ben go na loktoe, ben de „wan smeri di e tjari rostoe”, di ben plisi Jehovah (Ex. 29:18). Ini a ten disi, wi e kisi a deki-ati foe „tjari wan slakti-ofrandi foe prèise gi Gado, namkoe, den froktoe foe wi mofo-boeba di e meki En nen bekènti na poebliki” (Heb. 13:15). Na presi foe gebroiki slakti-ofrandi di skrifi na ini a Wet, wi e anbegi Jehovah, foe di wi e froeteri foe den prèise foe en sondro foe go na baka. — Jes. 43:21; Tori. 5:42.
2 Jesus Krestes, a moro bigi Kotoigi di oiti ben libi na a grontapoe disi, ben leri wi fa wi moesoe gi soifri anbegi nanga jepi foe a gi di wi e gi slakti-ofrandi foe prèise. A ben leri den disipel foe en, taki a boskopoe di den ben preiki, ben de tranga fanowdoe. A ben sabi taki a moro boen fasi foe doro na den sma nanga a boen njoensoe, ben de foe taki persoonlijk nanga den sma na ini den eigi oso (Mat. 10:7, 12). So boen, wi e si taki den apostel ben waka baka den santa markitiki foe Jesus, di ben kon foe Gado nanga jepi foe santa jeje, foe di den ben preiki oso-foe-oso. — Tori. 20:20.
3 A no de tra fasi ini a ten disi. Foe di troe kresten na disipel foe Jesus, meki den e waka baka na eksempre foe en, foe di den e preiki a boen njoensoe oso-foe-oso. Ala di sma e soekoe fowtoe kande na wi èn e froefolgoe wi foe dati ede, tokoe miljoenmiljoen sma leri a waarheid èn hondro doesoendoesoen njoen disipel e kon makandra nanga den ipi foe a bigi ipi ibri jari, èn dati e sori taki disi na a fasi fa Jehovah e doe a wani foe en. Dati meki wi e tan hori wisrefi na wi diniwroko.
4 Den wini di e kon foe a preiki di wi e preiki oso-foe-oso: „Gado no e teki sma partèi . . . A sma di e frede en èn e doe regtfardikifasi, a e feni en boen” (Tori. 10:34, 35). A go di wi e go langalanga na ibri oso ini wi kontren, e sori krinkrin, taki wi no e teki sma partèi, èn taki wi e gi ala sma na okasi foe jere a Kownoekondre boskopoe doronomo. Sma di wani teki a Kownoekondre boskopoe, foe den sei, e kisi persoonlijk jepi, akroederi den sani di ibriwan sma aparti abi fanowdoe.
5 Pikinmoro ala preikiman, so srefi den moro jongoesma, den owroe sma, èn srefi denwan di de njoen, kan teki prati ini na oso-foe-oso wroko. Na a fasi disi ibriwan kan meki „a froeloesoe bekènti na poebliki” (Rom. 10:10). Teki prati nanga trawan ini na oso-foe-oso diniwroko, e tjari wi kon makandra ini a banti foe lobi nanga wánfasi. Na a srefi ten, wi e kisi wan okasi foe sori a hori di wi e hori doro te wi e toeka nanga mi-no-ke fasi noso a gens di sma e gens wi. A sori di wi e sori wi bribi na poebliki, e meki wi „de leki wan komedi prei”, èn dati e jepi opregti sma foe si, taki wi abi wan seti di orga foe leri sma bijbel, so taki den kan kisi wini foe dati (1 Kor. 4:9). Ala sani e sori krinkrin taki Jehovah e blesi na oso-foe-oso wroko èn e gebroiki dati toe foe tjari a bigi ipi kon makandra na ini en „oso” foe soifri anbegi. — Jes. 2:2-4.
6 Now moro leki ini wan tra ten ini historia, sma moesoe foe jere a Kownoekondre boskopoe. Meki wi tan preiki oso-foe-oso, sondro foe tapoe pikinso, te leki Jehovah taki dati a de nofo kaba (Jes. 6:11). Te wi e doe so, dan wi sa kisi pai nanga a prisiri di e kon foe a prati di wi abi ini a prenspari èn boen oso-foe-oso diniwroko ini a ten disi foe a kaba. — 1 Kor. 15:58.