Preiki oso fu oso
1. Sortu aksi e opo kon fu na oso-fu-oso wroko, èn fu san ede?
1 „Den sma di abi ondrofeni fu preiki den tru tori fu Bijbel na difrenti fasi, sa agri taki na oso-fu-oso preikiwroko nanga a Millennial Dawn-buku, na a moro bun fasi fu preiki a Tru Bribi gi sma na ini a ten disi.” Den wortu disi, di ben skrifi na ini Zion’s Watch Tower fu 1 yuli 1893, e sori krin o prenspari na oso-fu-oso preikiwroko de. Sma na ala sei fu grontapu e si na oso-fu-oso preikiwroko leki wan sani di soso Yehovah Kotoigi e du. Na ini son kondre a e kon muilek moro nanga moro fu feni sma na oso. Na oso-fu-oso wroko na wan bun fasi ete fu du a preikiwroko?
2. San Bijbel e taki fu na oso-fu-oso preikiwroko?
2 Bijbel e horibaka gi na oso-fu-oso wroko di prenspari srefisrefi: Bijbel e taki fu na oso-fu-oso wroko. Yesus ben komanderi 70 disipel fu go tu na tu na den oso fu sma (Luk. 10:5-7). Syatu baka Yesus dede, Bijbel taki fu en disipel: „Ibri dei den ben e tan gi sma leri na ini a tempel èn na ibri oso, èn den ben e fruteri sma a bun nyunsu” (Tori. 5:42). Na apostel Paulus ben gi leri fayafaya sosrefi na sma oso.—Tori. 20:20.
3. Sortu wini wi e kisi te wi e gi kotoigi oso fu oso?
3 Na ini a ten disi, na oso-fu-oso preikiwroko na wan prenspari fasi ete fa wi e preiki a bun nyunsu. Disi e meki taki wi kan wroko na wan orga fasi fu „suku” den sma di warti fu yere a bun nyunsu (Mat. 10:11). Nofo tron sma e firi bun te den de na oso. Te wi e taki nanga den, te wi e yere den sten, te wi e si fa den e poti den fesi, èn te wi e si fa den e libi, dan wi e kon frustan san den lobi èn nanga san den e broko den ede. Nofo tron disi e gi wi a moro bun okasi fu taki moro langa nanga sma.
4. San wi kan du fu meki taki wi kisi bun bakapisi te wi e du na oso-fu-oso kotoigi wroko?
4 Tyari kenki kon na ini yu libi: Na apostel Paulus ben de klariklari fu tyari kenki kon na ini en libi „fu a bun nyunsu ede” (1 Kor. 9:23). Kande wi kan seti sani, so taki wi kan preiki te moro sma de na oso, kande na bakadina, satra nanga sonde, noso na ini a fakansi. Skrifi den adres pe sma no de na oso, èn go na den sma dati baka wan tra dei na ini a wiki noso na wan tra ten fu a dei.
5. Fa sma di no de so gosontu kan teki prati na a oso-fu-oso wroko?
5 Srefi sma di no de so gosontu kan teki prati na a oso-fu-oso preikiwroko. Kande wi kan seti sani fu tyari den sma disi go na oso di wi man doro makriki, so taki den kan kisi na okasi fu wroko sondro fu hasti densrefi. Wán sisa di ben abi problema fu bro, ben abi wan afu yuru fanowdu fu doro na wan tra oso. Ma, a ben prisiri srefisrefi taki a ben man teki prati na a preikiwroko makandra nanga a grupu!
6. Fu san ede wi musu du na oso-fu-oso wroko doronomo?
6 Nanga yepi fu na oso-fu-oso wroko, wi e tan feni furu sma di de leki skapu. Wan preikiman ben naki na tapu a doro fu wan sma, èn a yere: „Kon inisei. Mi sabi suma na yu. Mi ben e begi Gado fu seni wan sma fu kon yepi mi, èn baka dati mi yere wan sma naki na tapu a doro. Gado arki mi èn a seni yu kon na mi.” Den bakapisi e sori taki Yehovah e blesi a preiki di wi e preiki na a fasi disi (Mat. 11:19). Teki a fasti bosroiti fu du na oso-fu-oso wroko doronomo.