Gi leri na publiki èn oso foe oso
„Mi no ben meki sani tapoe mi foe . . . gi oenoe leri na publiki èn oso foe oso.” — TORI FOE DEN APOSTEL 20:20, „Byington.”
1. Fa wan katolik priester ben gi kommentaar tapoe na boen bakapisi foe na oso-foe-oso diniwroko foe Jehovah Kotoigi?
„LOMSOE sma e go doro foe doro nanga na evangelium.” Na so wan edeprakseri ben de foe leisi na ini The Providence Sunday Journal foe 4 oktober, 1987. Na koranti ben froeteri taki wan prenspari sani foe na wroko disi ben de foe „kari wantoe foe den inactief memre foe na gemeente foe den foe drai kon baka na wan moro aktief gemeente libi.” Den ben teki den wortoe foe priester John Allard, raiman foe na kantoro foe Evangelisâsi na ini a bisschop kontren Providence, taki: „Seiker, wan heri ipi tweifri e go de. Sma e go taki, ’Drape den e go, neleki den Kotoigi foe Jehovah’. Ma den Kotoigi foe Jehovah abi boen bakapisi te den e wroko, a no so? Mi wani strei taki joe kan go na ini ibri Kownoekondre konmakandrapresi na ini a distrikt [foe Rhode Island, V.S.,] èn joe e feni gemeente di foeroe nanga sma di fositen ben de lomsoe.”
2. Sortoe aksi ben tjari kon a fesi nanga reti?
2 Ija, sma sabi Jehovah Kotoigi boen foe na oso-foe-oso diniwroko foe den di abi boen bakapisi. Ma foe san-ede den e go oso foe oso?
Na fasi foe den apostel
3. (a) Sortoe ordroe Jesus ben gi den disipel foe en? (b) San ben de a moro prenspari fasi fa den fosi bakaman foe Krestes ben doe na ordroe foe den?
3 Jesus Krestes ben gi den bakaman foe en na ordroe disi di wani taki foeroe: „Go foe dati-ede èn meki disipel foe sma foe ala nâsi, dopoe den na ini na nen foe na Tata èn foe na Manpikin èn foe na santa jeje, leri den foe hori ala den sani di mi komanderi oenoe. Èn, loekoe! Mi de nanga oenoe ala den dei te na kaba foe na seti foe sani” (Mateus 28:19, 20). Na moro prenspari fasi fa a wroko dati ben sa doe ben de foe si wantewante baka na dei foe Penkstri 33 G. T. „Ibri dei na ini a tempel èn oso foe oso den ben go doro sondro foe stòp foe gi leri èn foe meki na boen njoensoe foe na Krestes, Jesus bekenti” (Tori foe den Apostel 5:42). So wan 20 jari na baka na apostel Paulus ben teki prati ini na oso-foe-oso diniwroko, bikasi a ben memre kresten owroeman foe na foto Efeise: „Mi no ben meki sani tapoe mi foe froeteri oenoe ala san boen èn foe gi oenoe leri na publiki èn oso foe oso.” — Tori foe den apostel 20:20.
4. Foe san-ede wi kan taki taki Tori foe Apostel 5:42 nanga Tori foe den Apostel 20:20 wani taki taki na preiki foe den bakaman foe Jesus ben prati oso foe oso?
4 Na ini Tori foe den Apostel 5:42 den wortoe „oso foe oso” poeroe poti abra foe kat’ oiʹkon. Djaso ka·taʹ gebroiki ini wan fasi foe „prati sani”. Foe dati-ede, na preiki foe den disipel ben prati foe na wan oso go na a trawan. Ini en kommentaar tapoe Tori foe den Apostel 20:20, Randolph O. Yeager ben skrifi taki Paulus ben gi leri „na publiki konmakandra [de·mo·siʹa] èn oso foe oso (prati sani [ka·taʹ] na ini a di foe fo naamval). Paulus ben tan dri jari na ini Efeise. A ben fisiti ibri oso, ofoe te foe kaba a ben preiki gi ala sma (vers 26). Djaso joe abi bijbel djaranti gi na oso-foe-oso evangelium wroko èn so srefi na evangelium wroko di e doe na ini publiki konmakandra.
5. Foe san-ede Paulus no ben sori wawan tapoe fisiti na owroeman foe abi wan prisiriten ofoe herder fisiti, na ini Tori foe den Apostel 20:20?
5 So wan sortoe gebroiki foe ka·taʹ e kon na ini Lukas 8:1, di e taki foe na preiki foe Jesus foe „foto foe foto èn dorpoe foe dorpoe.” Paulus ben gebroiki na meervoud fasi kat’ oiʹkous na ini Tori foe den Apostel 20:20. Djaso joe e leisi na ini son vertaling foe bijbel, „na ini oenoe oso.” Ma na apostel no ben sori wawan tapoe fisiti na owroeman foe abi wan prisiriten ofoe tapoe herder fisiti na ini den oso foe kompe bribiman. Den tra wortoe foe en e sori taki a ben taki foe wan oso-foe-oso diniwroko na mindri sma di no ben de na bribi, foedi a ben taki: „Ma mi ben preiki finifini gi djoe èn gi Griki sma foe berow na Gado èn bribi ini wi Masra, Jesus” (Tori foe den Apostel 20:21). Kompe bribiman ben abi berow kaba èn ben sori bribi ini Jesus. Foe dati-ede, Tori foe den Apostel 5:42 nanga Tori foe den Apostel 20:20 abi foe doe nanga a preiki „oso foe oso”, ofoe doro foe doro gi sma di no de na bribi.
Sani no kan teki poti na en presi
6. San den ben taki foe na fasi foe na preikiwroko foe Paulus na ini Efeise?
6 Abiel Abbot Livermore ben skrifi ini 1844, foe gi kommentaar tapoe den wortoe foe Paulus na ini Tori foe den Apostel 20:20: „A no ben de tevrede foe gi lezing soso na ini a publiki konmakandra, èn poti tra fasi foe wroko na wan sei, ma nanga faja a ben feti na baka na bigi wroko foe en, oso foe oso, èn troetroe a ben tjari na waarheid foe hemel go na a oso na den brantmiri èn ati foe den Efeise sma.” No so langa ete, den ben taki: „Na prati foe na evangelium oso foe oso, ben marki den fosi jarihondro kresten foe sensi na bigin (Tori foe den Apostel 2:46; 5:42). . . . [Paulus] ben doe en frantiwortoe finifini na den djoe èn heiden na Efeise, èn den ben de sondro wan excuus efoe den ben kisi pori ini na sondoe foe den.” — The Wesleyan Bible Commentary, Volume 4, bladzijde 642, 643.
7. Foe san-ede wan sma ben kan taki taki Gado feni na oso-foe-oso diniwroko foe Jehovah Kotoigi boen?
7 Aladi taki na publiki abi en presi foe meki na boen njoensoe bekenti, tokoe a no de wan sani di kan teki poti na a presi foe persoonlijk kontakti na den doro. Foe disi, na sabiman Joseph Addison Alexander ben taki: „Kerki no feni noti ete foe poti na a presi foe a preiki na ini kerki èn na ini oso ofoe foe doro na krakti foe dati.” So leki na sabiman O. A. Hills ben taki: „Gi leri na publiki èn oso foe oso moesoe go anoe na anoe.” Kotoigi foe Jehovah e gi rai nanga jepi foe lezing na den alawiki publiki konmakandra. Den abi krin boeweisi toe taki na methode foe den apostel foe prati bijbel waarheid oso foe oso e wroko boen. Èn Jehovah seiker e feni en boen, foedi leki wan bakapisi foe so wan diniwroko, a e meki ala jari doesoendoesoen sma e lon go na a anbegi foe en di a poti hei. — Jesaja 2:1-4; 60:8, 22.
8. (a) San sma ben taki foe na reide foe san-ede na oso-foe-oso preikiwroko abi boen bakapisi? (b) Fa den kan teki Jehovah Kotoigi gersi nanga na preiki foe Paulus na den mofodoro èn tra fasi foe gi kotoigi?
8 Wan tra man di sma e lespeki taki: „Sma e feni en moro makriki foe memre sani di den leri na den eigi mofodoro moro leki na a mofodoro foe kerki.” We, Paulus ben de doronomo na sma mofodoro, èn ben gi wan moi eksempel leki wan bedinari. „A no ben de tevrede nanga foe leri sma èn foe hori lezing na ini snoga èn wowojo” na bijbel sabiman Edwin W. Rice ben skrifi. „Alaten a ben de fajafaja ’e gi leri’ ’oso foe oso.’ A ben de wan oso-foe-oso, anoe-foe-anoe, fesi-foe-fesi feti di a ben feti nanga ogri na ini Efeise, foe wini sma gi Krestes.” Kotoigi foe Jehovah e froestan taki sma-foe-sma takimakandra na den mofodoro e wroko boen. Boiti foe dati, den e meki gobaka èn e prisiri foe taki srefi nanga gensman efoe den sma disi sa gi pasi foe abi takimakandra di de reidelek. Fa den de leki Paulus! Foe en, F. N. Peloubet ben skrifi: „A wroko foe Paulus no ben de soso a hori foe konmakandra. Degedege no de taki a ben fisiti foeroe sma en srefi na den oso foe den te a ben kon jere nomo taki wan sma de di ben abi aksi, ofoe di ben abi so wan belangstelling ofoe srefi ben de nanga feiantifasi taki a ben de klariklari foe taki foe relisi.”
Owroeman moesoe teki fesi
9. Sortoe eksempel Paulus ben poti gi kompe-owroeman?
9 Sortoe eksempel Paulus ben gi kompe owroeman? A ben sori taki den moesoe de oso-foe-oso preikiman foe na boen njoensoe di e taki fri èn sondro frede èn sondro foe weri. Ini 1879, J. Glentworth Butler ben skrifi: „[Den owroeman foe Efeise] ben sabi taki ini na preiki [foe Paulus] na prakseri foe kofar gi en srefi ofoe de pôpi no ben abi krakti na en tapoe kwetikweti; taki a no ben hori noti foe na fanowdoe waarheid na baka; taki a no ben taki nomo foe spesroetoe ofoe njoen penti foe waarheid di a ben lobi foe en sei, ma a ben poti krakti soso tapoe ala san ben boen ’foe gebroiki foe leri sma,’ ofoe bow sma: na heri rai foe Gado ini en soifri fasi èn ala san a abi! Èn na kotrow ’tjari kon a krin foe sani’ disi, na fajafaja gi foe leri disi ’foe na kresten waarheid, ben de na gwenti foe en, no wawan na ini a skoro foe Tyranus èn na ini tra konmakandra presi foe den disipel, ma na ini ibri osofamiri di ben kan miti. Oso foe oso, èn sili foe sili, dei na dei a ben tjari na prisiri njoensoe nanga a lostoe èn faja foe Krestes. Gi ala groepoe nanga ras, gi den djoe di ben sori feianti fasi èn den Griki di ben e spotoe, na wán thema foe en ben de — di te joe loekoe finifini, abi na ini en ala tra fanowdoe waarheid di e froeloesoe sma — berow na Gado, èn bribi ini wi Masra Jesus Krestes.”
10, 11. (a) San Paulus ben froewakti foe den owroeman foe Efeise ini na tori foe na kresten diniwroko? (b) Na ini sortoe fasi foe preiki Jehovah Kotoigi, pe joe abi na ini owroeman, e teki prati neleki Paulus?
10 Te joe loekoe en leti, dan san Paulus ben froewakti foe den owroeman foe Efeise? Na sabiman E. S. Young ben taki foe den wortoe foe na apostel nanga en eigi wortoe na a fasi disi: „Mi no ben taki soso na publiki, ma mi ben wroko oso foe oso, na ala groepoe foe sma, djoe nanga heiden. Na thema foe na diniwroko foe mi gi ala groepoe foe sma ben de ’berow na Gado èn bribi ini wi Masra Jesus Krestes.’” Foe taki den wortoe foe Paulus na wan tra fasi, W. B. Riley ben skrifi: „Na krin meine ben de: ’Mi e froewakti taki joe sa go doro nanga san mi ben bigin foe doe èn foe leri sma èn mi e froewakti foe joe kakafoetoe neleki fa mi ben kakafoetoe; foe leri sma aparti èn na publiki so leki mi ben doe na ini den strati èn oso foe oso, foe kotoigi na a srefi fasi gi djoe èn gi Griki sma berow na Gado èn bribi ini wi Masra Jesus Krestes, bikasi disi de den gronprakseri!’”
11 A de krin taki na ini Tori foe den Apostel kapitel 20, Paulus ben e sori kompe-owroeman taki den ben froewakti foe den de oso-foe-oso kotoigi foe Jehovah. Ini na tori disi, den fosi jarihondro owroeman ben moesoe teki fesi, gi wan joisti eksempel na tra memre foe na gemeente. (Teki gersi Hebrew sma 13:17.) Neleki Paulus, dan Kotoigi foe Jehovah e preiki oso foe oso, e froeteri sma foe ala nâsi foe na Kownoekondre foe Gado, berow na En èn bribi ini Jesus Krestes (Markus 13:10; Lukas 24:45-48). Foe owroeman di den ben poti a wroko a mindri den disiten Kotoigi den e froewakti, taki den e teki fesi ini so wan oso-foe-oso wroko. — Tori foe den Apostel 20:28.
12. San wantoe foe den owroeman foe fosi ben weigri foe doe, ma na ini san owroeman e teki fesi ini a ten disi?
12 Ini 1879, Charles Taze Russell ben bigin foe tjari Zion’s Watch Tower and Herald of Christ’s Presence, kon a doro, di den e kari now Na Waktitoren A e bariwroko gi Jehovah Kownoekondre. Russell èn tra bijbel studenti ben meki na Kownoekondre boskopoe bekenti na a fasi foe den Apostel. Ma ini den jari a baka, son gemeente owroeman no ben handri akroederi den frantiwortoe foe den foe preiki. Foe eksempel, wan Kotoigi ben skrifi: „Ala sani ben go boen te leki den ben meki bekenti taki ala sma e teki prati ini na oso-foe-oso preiki nanga boekoe èn spesroetoe na sonde oso-foe-oso wroko. Disi ben de ini 1927. Den owroeman foe wi di den ben froekisi ben kakafoetoe èn ben proeberi foe meki na heri groepoe lasi-ati foe bigin nanga ofoe teki prati na iniwan pisi foe a wroko disi.” Baka wan pisiten, dan man di no ben sa teki prati ini na oso-foe-oso preikiwroko no ben abi moro langa na grani foe dini leki owroeman. Ini a ten disi toe, foe den wan di e dini leki owroeman èn dinari na diniwroko den e froewakti foe den foe teki fesi ini na oso-foe-oso preikiwroko èn tra fasi foe na kresten diniwroko.
Ibriwan sma moesoe de wan Kotoigi
13. (a) San wi moesoe doe srefi efoe sma no e arki na a Kownoekondre boskopoe? (b) Fa den e agersi Paulus nanga Eseikièl?
13 Nanga na jepi foe Jehovah, dan kresten moesoe meki na Kownoekondre boskopoe bekenti oso-foe-oso, srefi efoe sma no e teki en nanga warderi. Leki na waktiman foe Gado, Esekièl ben moesoe warskow na pipel efoe den ben wani arki ofoe no (Esekièl 2:5-7; 3:11, 27; 33:1-6). E. M. Blaiklock, di ben agersi Esekièl nanga Paulus ben skrifi: „Foe [na taki foe Paulus na ini Tori foe den Apostel kapitel 20] wan krin prenki e opo kon foe na diniwroko na ini Efeise sma. Loekoe san e kon: Fosi, na horidoro ini kotrowfasi foe Paulus. A no ben de wan sma di ben soekoe foe de pôpi ofoe foe meki na publiki feni en boen. Foedi den ben poti en neleki Esekièl foe doe wan waktiman wroko, meki a ben doe en prekti nanga opregti faja èn deki-ati foe hori baka gi den wortoe foe en. Na a di foe toe presi, na lobi switifasi foe en. A no ben de na man foe meki wortoe foe kroetoe sma kon sondro firi na tapoe den mofoboeba foe en. Na a di foe dri presi, na doe foe a evangelium-wroko foe en sondro foe kon weri. Na publiki èn oso foe oso, na ini foto èn na ini a heri distrikt, a ben preiki na evangelium.”
14. Foe san-ede a gi foe kotoigi na a frantiwortoe foe ibriwan sma di gi en srefi abra ini begi na Jehovah Gado nanga jepi foe Jesus Krestes?
14 Den blesi foe Gado di de pasa marki na tapoe den disiten foetoeboi foe en no e libi nowan enkri degedege taki a feni en boen foe den tjari na nen Kotoigi foe Jehovah (Jesaja 23:10-12). Boiti foe dati, den na Kotoigi foe Krestes toe, bika Jesus ben taigi den bakaman foe en: „Oenoe sa kisi krakti te na santa jeje kon na oenoe tapoe, èn oenoe sa de kotoigi foe mi na ini Jerusalem èn na heri Judea nanga Samaria èn te den moro farawe pisi foe grontapoe” (Tori foe den Apostel 1:8). Soboen foe kotoigi na a frantiwortoe foe ibriwan sma di e gi en srefi abra na Jehovah Gado na ini begi nanga jepi foe Jesus Krestes.
15. San sma ben taki foe na gi kotoigiwroko foe den fosi kresten?
15 Den ben taki foe na gi foe kotoigi: „A ben abi foe doe nanga na heri kerki. Na zendings afersi foe na fosi kerki no ben de na frantiwortoe foe na Zendeling Genootschap foe Oemasma ofoe Abrawatra Zending-groepoe. So srefi na wroko foe gi kotoigi no ben libi abra gi sma di ben kisi spesroetoe leri so leki owroeman, diaken, ofoe srefi apostel. . . . Ini den fosi dei dati dan kerki nanga zending ben de a srefi. Na zending programa foe na fositen kerki ben abi en fondamenti na tapoe toe prakseri: (1) Na prenspari wroko foe na kerki na foe prati na evangelium na a heri grontapoe (2) Na frantiwortoe foe doe na wroko disi de na tapoe na heri kresten libimakandra”. — J. Herbert Kane.
16. San srefi skrifiman foe na krestenhèit e erken foe den kresten èn na preikiwroko?
16 Aladi disiten skrifiman foe na krestenhèit no e agri nanga na Kownoekondreboskopoe, tokoe sonwan e erken taki kresten abi wan froeplekti foe gi kotoigi. Foe eksempel, na ini a boekoe Everyone a Minister (ala sma moesoe de wan bedinari), Oscar E. Feucht ben taki: „No wan leriman kan doe na diniwroko di Gado ben gi ibri bribiman. Na wan sari sani taki hondrohondro jari foe fowtoe denki na ini a kerki meki na wroko foe 500 memre foe na gemeente tron na wroko foe wan enkri domri. A no ben de so na ini na fosi kerki. Den wan di ben bribi ben go na ala presi foe preiki na Wortoe.”
17. San sma kan taki foe na presi di na preiki ben abi ini na libi foe den fosi kresten?
17 Na preiki ben de na moro prenspari sani ini na libi foe den fosi kresten, neleki fa a de na mindri a pipel foe Jehovah ini na ten disi. „Foe taki en ini algemeen” Edward Caldwell Moore foe Harvard University ben skrifi „den fosi dri jarihondro foe na kresten boeweigi ben abi leki eigifasi bigi faja foe meki na bribi panja. Na tranga kresten lobi ben de foe prati na evangelium, a froeteri foe na boskopoe foe froeloesoe. . . . Ma na panja foe na krakti di Jesus ben abi tapoe sma èn den leri foe en na ini den moro froekoe pisiten, wi moesoe de tangi foe wan pikin pisi na den man di wi moesoe kari zendeling. A ben de na bakapisi foe man foe ibri bisnis èn wroko èn foe ibri groepoe foe na libimakandra. [Den] ben tjari na kibritori dati foe na inisei libi, na njoenfasi dati fa foe de nanga na grontapoe, di ini na ondrofeni foe den ben tjari froeloesoe, go na den moro fara presi foe a [Rome] tirimakti, . . . [Fosi krestendom] ben abi na froetrow dorodoro foe wan kaba foe na disiten grontapoe seti di ben e kon krosibei. A ben bribi ini na wantewante èn wondroefasi kon foe wan njoen grontapoe seti.”
18. Sortoe bigi howpoe e pasa den dren foe politiki tiriman krinkrin?
18 Ini oso-foe-oso preiki èn tra fasi foe na diniwroko foe den, Jehovah Kotoigi nanga prisiri e sori den sma di arki den tapoe na njoen grontapoe di Gado pramisi. Den blesi di a ben taki na fesi foe den foe libi sondro kaba e pasa na moro diri dren foe sma di ben sa wani bow wan njoen grontapoe seti na ini a ten disi (2 Petrus 3:13; Openbaring 21:1-4). Aladi a ben sa gersi taki ibriwan sma ben sa wani libi na ini a wondroe njoen grontapoe foe Gado, tokoe dati no de so. Ma, meki wi go loekoe now wantoe fasi di abi boen bakapisi fa foetoeboi foe Jehovah kan leri den wan di e soekoe têgo libi.
San joe ben sa piki?
◻ Foe san-ede wi kan taki taki Tori foe den Apostel 5:42 èn tori foe den Apostel 20:20 wani taki taki den bakaman foe Jesus moesoe preiki oso foe oso?
◻ Fa wi doe sabi taki Gado e feni na oso-foe-oso diniwroko foe Jehovah Kotoigi boen?
◻ Ini na tori foe na diniwroko, san den e aksi foe owroeman nanga dinari na ini na diniwroko?
◻ Sortoe presi a gi foe kotoigi moesoe abi ini na libi foe wan kresten?
[Prenki na tapoe bladzijde 22]
Ini 33 G. T., den disipel foe Jesus ben preiki oso foe oso sondro foe stòp
[Prenki na tapoe bladzijde 25]
Paulus ben leri sma „oso foe oso.” Jehovah Kotoigi na ini a ten disi e go doro foe doe na fasi disi foe diniwroko