Troe kristen de kownoekondreprékiman

„Na boen njoensoe disi foe na kownoekondre sa préki na a heri grontapoe pe libisma e libi leki wan kotoigi gi ala naatsi èn dan na kaba sa kon.” — MATTÉUS 24:14.

1, 2. (a) Foe san-ede a Kownoekondreboskopoe moe meki bekénti now na a heri grontapoe? (b) Sortoe aksi ibri kotoigi foe Jehovah ben sa kan aksi ensrefi?

BOSKOPOEMAN FOE JEHOVAH KOWNOEKONDRE. Disi de tintin jari kaba na moro prenspari wroko foe na tijdschrift disi. Den wortoe disi de srefi wan pisi foe a titel di den skrifiman wawan abi na reti foe en. Èn a de toemsi prenspari dati a Kownoekondre boskopoe e meki bekenti now tapoe na heri grontapoe. Foe san-ede? Foe na sani san Jezus Kristus ben taki baka di a ben kari tra pisi foe „na marki” foe en „denoja” di no de foe si èn na kaba foe na seti foe sani disi. Jezus ben taki: „Na boen njoensoe foe na Kownoekondre sa préki na a heri grontapoe leki wan kotoigi gi ala naatsi èn dan na kaba sa kon.” — Mattéus 24:3, 14, Jerusalem Bible.

² Now na „kaba” kon de troetroe krosbé. Foe dat’ede ibri kotoigi foe Jehovah di gi en libi abra ben sa doe boen foe aksi ensrefi: Fa mi de nanga a kownoekondrewroko? Mi abi alaten wan prati na en? Èn mi e doe mi diniwroko bekwaam èn nanga faja?

Na komando foe préki

3. San den wortoe foe Jezus na ini Mattéus 5:14-16 wani taki na ini a tori foe en bakaman?

³ Nowan enkri troe kristen kan hari ensrefi poeroe nanga reti foe na grani wroko foe préki na „boen njoensoe” gi tra sma. Jezus ben taigi en discipel: „Oenoe de na leti foe na grontapoe. Wan foto di de tapoe wan bergi, no kan kibri. Efoe wan sma leti wan lampoe, dan a no e poti en ondro wan baskita, ma tapoe na lampoestandaard èn a e skijn tapoe ala sma ini a oso. Meki na a srefi fasi joe leti skijn gi den sma, sodati den mag si den heri boen wroko foe joe èn gi joe Tata di de na ini hemel grani” (Mattéus 5:14-16). Disi e sori a tapoe dati Jezus discipel ben sa de Kownoekondreprékiman.

4. San sma e taki foe na moro prenspari Kownoekondreprékiman?

⁴ Foe na moro prenspari Kownoekondreprékiman den ben taki: „Na ini a ten foe en prékiwroko foe na Kownoekondre wi Masra ben go abra . . . foe sreka èn orga na Kownoekondrediniwroko . . . a ben meki wan bigin na a profétidiniwroko èn a ben meki den twarfoe èn den sébi-tenti teki prati na ini. Aladi a ben e préki na Kownoekondre di ben o kon èn ben e doe ’marki’, a ben seni den go na en fesi nanga a srefi sortoe boskopoe èn den srefi makti foe doe krakti wroko. Nanga jepi foe wan moi cursus ini soifri leri, a ben leri den foe teki positsi tapoe den foe moro bigi fertrow.” — A Church History, foe na anoe foe Milo Mahan.

5. San Jezus ben doe tapoe a kontren foe na Kownoekondreprékiwroko?

⁵ Jezus ben gi en apostel nanga den sébitenti discipel di a ben seni go préki, toemsi boen leri (Lukas 6:12-16; 10:1-22). Boiti foe dati, na Bigi Eksempre foe wi „ben hari foe foto na foto èn foe dorpoe na dorpoe, aladi a ben préki èn a ben meki bekenti na boen njoensoe foe na Kownoekondre foe Gado”. Den apostel nanga séker oema, „di ben dini den nanga den goedoe foe den”, ben waka go nanga en (Lukas 8:1-3). Ija, Jezus ben de wan faja prékiman foe na boen njoensoe èn a ben doe sani foe opo wan organisaatsi foe na Kownoekondreprékiwroko.

6. Sortoe komando Jezus ben gi en bakaman bifo a opo go na hemel?

⁶ Baka wan dini-wroko foe dri nanga afoe jari Jezus ben klari en grontapoe libipasi. Ma bifo a ben opo go na hemel a ben gi en bakaman a komando disi: „Go . . . èn meki discipel foe sma foe ala naatsi, èn dopoe den na ini na nen foe a Tata èn foe na Manpikin èn foe na santa jeje, èn leri den foe hori ala san mi ben komanderi oenoe. Èn loekoe! Mi de nanga oenoe ala dé te na a bosroiti foe na seti foe sani” (Mattéus 28:19, 20). Ija, den ben sa de Kownoekondreprékiman.

7. Foe san-ede Jezus discipel ben sa man foe de en kotoigi, aladi biginbigin den ben mankeri soifri sabi foe na Kownoekondre?

⁷ Di Jezus ben de so fara foe gwe libi a grontapoe, den discipel ben aksi en: „Masra, joe e tjari na ini a ten disi na Kownoekondre kon baka gi Israël?” A piki foe en ben de: „A no de wan afersi foe oenoe foe kisi sabi foe den ten ofoe pisten di na Tata poti na ini en égi makti.” Aladi den discipel na ini a ten dati ben mankeri soifri sabi foe na Kownoekondre, tokoe Jezus ben man komanderi den foe de prékiman foe na Kownoekondre disi, bikasi den ben sa kisi na fanowdoe jepi foe doe na komando foe den. „Ma oenoe sa kisi krakti te santa jeje sa kon na oenoe tapoe”, Jezus ben taki moro fara, „èn oenoe sa de kotoigi foe mi na ini Jeruzalem èn na ini heri Judéa nanga Samaria èn te na den moro farawe kontren foe na grontapoe” (Tori foe den Apostel 1:6-8). Na ondro tiri foe na santa jeje Jezus bakaman te foe kaba ben sa ferstan dati na Kownoekondre ben sa de wan hemel tiri (Johannes 16:12, 13). Èn te na ten ben lepi foe dati dan na Kownoekondre dati „ben sa préki go te na den moro farawe kontren foe na grontapoe”.

8. A sortoe fasi na prékiwroko ben waka boen na ini na fosi jarhondro?

⁸ Den kotoigi dati ben doe a wroko foe den heri boen. A no de foe taki dati Jehovah ben de nanga den, èn den ben abi na jepi foe na glori Jezus Kristus (Tori foe den Apostel 8:1-8; 11:19-21). A no de wan froewondroe sani dati na apostel Paulus na ini 60 ofoe 61 G.T. ben kan taki dati na „boen njoensoe” ben préki kaba ’na ini heri na meki-sani ondro hemel!’ — Kolosse 1:23.

9. Soleki a taki dja dan san de na moro prenspari wroko foe na kristen gemeente?

⁹ Foe na kotoigiwroko disi ben skrifi: „Na préki foe na evangélium no de . . . wan activiteit a mindri den foeroe activiteit di na kerki foe na Njoen Testamenti ben e hori ensrefi bezig, ma de na fundamenti, prenspari activiteit foe en . . . Loekoe boen dati Jezus no ben taki na [ini Tori foe den Apostel 1:8]: Oenoe sa kotoigi foe mi, ofoe: Oenoe sa gi kotoigi foe mi, ma: Oenoe sa de mi kotoigi. Na gebroiki foe na wortoe ’de’ de dja foe wan waarde di moe teki na ini serjoesoe fasi èn letterlek. Na wortoe [na ini Grikitongo] no e taki wawan san na kerki sa doe ma san na Kerki ben sa de . . . a Kerki foe Jezus Kristus de .. wan skin di e gi kotoigi” (Pentecost and the Missionary Witness of the Church, foe na anoe foe Harry R. Boer, blz. 110-114). Ija, gi kotoigi de na wroko foe na troe kristen gemeente.

Nanga jepi foe wan voorzienigheid foe Gado

10, 11. (a) Fa den fosi-jarhondro Kownoekondreprékiman ben orga densrefi? (b) San ben psa efoe njoen omstandigheid ben sori ensrefi?

¹⁰ Den fosi-jarhondro kownoekondreprékiman ben kisi tiri foe wan tiri skin. Na ini na organisaatsi owroe man di ben e reis ben e dini, èn opziener nanga dinari na ini na diniwroko ben e doe den wroko di ben de ini na gemeente (Tori foe den Apostel 15:1, 2, 22-36; Filippi 1:1). Ma san ben psa te njoen omstandigheid ben sori densrefi?

¹¹ We, loekoe pikinso san ben psa sjatoe baka Pinksteren ini 33 G.T. Den djoe di ben taki Griki ben bigin knoroe tége den djoe di ben taki Hebrewtongo „foe di den ben loekoe psa den weduwe foe den na a aladé prati foe njanjan”. Foe loesoe a problema den apostel ben poti „sébi man di sma ben sabi boen” foe sorgoe foe na prati foe njanjan disi (Tori foe den Apostel 6:1-8). Foe disi wi e lési: „Foe so fara den ben ferteri wi, dan na sorgoe foe a aladé publiki njanjan ben prati sondro partij-fasi ben de a fosi sani wawan di den ben taki den „sebi” foe doe, ma a no de foe taki dati tra wroko ben sa kon na tapoe te na fanowdoe ben sori ensrefi, bika aladi den gronprakseri foe na njoen bribi no ben kenki, den ben libi den wrokosani èn den fasi foe pristeri den abra na a koni èn praktis ondrofeni foe geslagti di ben o waka baka makandra, sodati den gronprakseri disi na wan moro boen fasi ben kan kon de stéfi èn panja moro fara . . . Na aanpassing nanga modificatie foe finifini sani di no ben prenspari . . . de na ini ibri bigi organisaatsi wan tranga fanowdoe.” — Hours With the Bible, Serie foe na Njoen Testamenti, deel 2, foe na anoe foe Cunningham Geikie.

12. (a) San na go na fesi foe na fosten kristendom ben tjari kon? (b) O pe den ben kari Jezus bakaman foe na fositron kristen, èn fa dati ben doe kon?

¹² Na fertrow tapoe Gado na ini begi, makandra nanga „na koni èn praktisch ondrofeni” foe na tiriskin, ben meki na fosten kristendom go na fesi, èn séker a ben de so, dati sani ben e psa nanga jepi foe voorzienigheid foe Gado. Foe den fosten bakaman foe Jezus den ben taki foe eksempre dati den ben de foe na „pasi” (Tori foe den Apostel 9:1, 2). Ma kande na ini 44 G.T. kaba den ben kari na ini Syrisch Antiochië, den discipel kristen nanga jepi foe wan „voorzienigheid foe Gado” (Tori foe den Apostel 11:26). Disi ben de wan nen di Gado ben gi èn di den ben teki nanga ala prisiri. — 1 Petrus 4:16.a

13. Foe sortoe sani den fosten kristen ben meki gebroiki na a Kownoekondreprékiwroko foe den, soleki Jehovah Kotoigi e meki gebroiki now foe modern methode foe tjari boekoe kon na doro?

¹³ A mindri den fosten kristen dati tra sani ben e sori densrefi ooktoe, di wi kan taki ben komoto foe na voorzienigheid foe Gado. Soleki fa Jehovah Kotoigi e gebroiki foe eksempre now modern fasi foe tjari boekoe kon na doro, na so den fosten kristen ben de pionier tapoe a kontren foe na gebroiki foe na codex — wan troetroe blesi gi a faja Kownoekondreprékiwroko foe den. Na ini a tori disi C. C. McCown ben skrifi: „Den kerki boekoe foe den kristen, na Owroe Testament èn den njoen boekoe foe den kristen no ben bedoel foe den goedoeman ben sa sidon lési tapoe den gemak. Bisnissma di ben e wroko tranga ben wani abi someni leki a kan materiaal ini wan boekoe. Den nanga den faja kristen zendeling ben wani abi na mogelekheid foe ben sori es’esi na tapoe disi ofoe dati bewijs-tekst, sondro foe ben moesoe lolo opo langa papyrus lolo.” — The Biblical Archaeologist Reader, blz. 261.

14. Na ondro sortoe omstandigheid Jezus apostel ben de klar’klari èn nanga prisiri foe préki?

¹⁴ Foe den methode ede di den fosten kristen ben e gebroiki foe préki na Kownoekondre, meki a ben de toemsi prenspari dati den „ben abi na mogelekheid foe sori es’esi tapoe disi ofoe dati bewijs tekst”. A no de foe taki dati den ben doe sontron okasipréki, net soleki Jehovah Kotoigi e doe na ini a ten disi. Foe a tori disi den ben taki disi: „Wan foe den aparti marki foe na prékiwroko foe den apostel ben de na gebroiki foe okasi. Wan apostel no ben e wakti te wan aparti okasi ben sori ensrefi. Na wan enkri okasi di a ben abi foe ben kon na fesi wan lantiman, ben de te en, soleki Paulus a fesi Felix ben tjari kon a fesi foe wan tiri-man, di ben weri purper, foe ferantwortoe ensrefi èn foe opo taki tége den kragi taki a ben psa a wet. A no ben de dati a no ben abi okasi, ma den dati a ben kisi na ini a strafoe-oso, na sé na pasi èn na ini na sakafasi oso pe a ben feni wan sribipe gi a neti. . . . A ben firi dati en boskopoe foe wan moro bigi pisi ben de gi aparti sma, aladi a ben de klari sreflsrefi foe tjari en gi wan bigi ipi sma foe jere. Ala presi a ben e firi taki a de na oso, a no ben abi trobi omeni sma ben arki na en. A no ben fergiti na eksempre foe Kristus, . . . [di a] stoa foe en ben de na di ede-pasi foe stof, ofoe na druk strati ofoe na liba-kanti nanga tjatja foe djoe Galiléa . . . [den Apostel] no ben fergiti dati na a bigin foe na krosbé demakandra foe den nanga en ben gi den spesroetoe leri foe na moro boen fasi foe préki èn leri, di a ben poti krakti a tapoe den fosi les disi nanga jepi foe tra leri, èn dati leti bifo a ben opo go na hemel a ben sori den a grontapoe leki na gron foe den èn ibri sma leki na arkiman foe den.” — History of the Christian Church, foe na anoe foe John F. Hurst, deel 1, blz. 96.

„Oso foe oso”

15. Fa den apostel ben doe na prékiwroko leti na baka Pinksteren ini 33 G.T.?

¹⁵ Wantronwantron kaba baka Pinksteren 33 G.T. Jezus discipel ben gebroiki wan toemsi moi fasi foe préki na „boen njoensoe”. San den apostel di ben kisi ferfolgoe ben doe baka di den ben njan pina foe a nen foe Jezus Kristus ede? Now, „den ben tan sondro foe stop ibri dé na ini a tempel èn oso foe oso foe leri èn foe meki na boen njoensoe foe na Kristus, Jezus, bekenti”! (Tori foe den Apostel 5:41, 42) Ija, den apostel ben gi kotoigi oso foe oso.

16. Paulus ben kweki den owroe man foe Efese na ini sortoe prékiwroko activiteit?

¹⁶ Bakaten na apostel Faulus ben kan tjari kon na ini a memre foe den owroe man foe Efése san e kon now: „Mi no ben hori misrefi a baka foe ferteri oenoe ala san ben boen èn foe leri oenoe na publiki èn oso foe oso. Ma mi ben gi kotoigi finifini na djoe èn na Griki foe a tori foe berow na fesi foe Gado èn foe na bribi na fesi foe Gado” (Tori foe den Apostel 20:20, 21). Paulus no ben bedoel dati a ben leri owroe man, di den ben poti kaba foe wroko, na a oso foe den. Na presi foe dati a ben gi kotoigi na djoe nanga Griki di no ben bribi ini a tori foe berow na a fesi foe Gado èn ini a tori foe Jezus Kristus. A no de foe taki dati Paulus ben leri den owroe man dati ooktoe fa den ben moe gi kotoigi oso foe oso.

17. San difrenti koniman ben taki foe na oso foe oso diniwroko foe Paulus na ini Efese?

¹⁷ Den ben taki foe na diniwroko foe na apostel ini Efese disi: „Ini algemeen Paulus ben abi na gwenti foe doe en ambacht (en grontapoe wroko) foe te son opo te go miti erfoe joeroe mamanten (Tori foe den Apostel 20:34, 35), a joeroe pe Tyránnus ben klari nanga den les di a ben e gi; èn moro fara foe erfoe joeroe mamanten te go miti fo joeroe bakadina foe préki ini a zaal (aula), hori konmakandra nanga jepiman foe taki aparti nanga kandidaat èn foe meki plan foe bradi na wroko go na bos’kondre; èn te foe kaba foe go soekoe sma oso foe oso, di ben abi belangstelling gi na evangelium, èn dati ben de foe fo joeroe baka dina te go miti boen lati na neti (Tori foe den Apostel 20:20, 21, 31)” (A. E. Bailey). Tra koniman ben taki: „A no ben de tevréde nomo foe hori soso lezing tapoe publiki konmakandra èn moro fara foe no gebroiki tra methode, ma ben doe a moro bigi pisi foe en wroko fajafaja nanga aparti sma, oso foe oso, èn a ben sabi foe meki na hemel waarheid psa go doro letterlek te na na brantmiri, èn na a ati foe den Efesesma” (A. A. Livermore). „Na publiki èn oso foe oso, ini na foto èn ala pe ini na district, a ben préki na evangelium” (E. M. Blaiklock). „A de wan aparti sani foe taki, dati a moro bigi pisi foe ala prékiman ben préki oso foe oso èn no ben tjari soso fisiti foe soso respeki ede”. — A. T. Robertson.

18. (a) Foe san-ede wan boen bijbel fundamenti de gi na oso foe oso diniwroko foe Jehovah Kotoigi soleki joe e loekoe en? (b) Pe èn fa Jehovah Kotoigi e préki na Kownoekondreboskopoe soleki Jezus nanga en fosten discipel?

¹⁸ Na oso foe osoprékiwroko Jezus en apostel ben doe na ini 33 G.T. A ben de wan pisi foe na diniwroko foe Paulus na ini Efese èn a no de foe taki ooktoe na tra presi. Soboen wan boen bijbel fundamenti de gi na oso foe oso diniwroko foe Jehovah Kotoigi. Èn disi de ooktoe so gi foeroe tra methoden di den e gebroiki foe panja na Kownoekondreboskopoe. A de wan moi sani dati McClintock èn Strongs Cyclopedia e ferteri: „Pe sma ben kan kon toe makandra, wi Masra nanga en apostel ben e feni wan presi foe préki. Na skoinsi sé foe na bergi, se-kanti nanga liba-kanti, a publiki pasi, oso foe sma, na mofo-doro foe na tempel, den djoe kerki èn difrenti tra presi den ben feni boen foe na préki foe na evangelium” (Deel 8 blz. 483). Netleki Jezus nanga en fosten discipel na so Jehovah Kotoigi e préki na kownoekondreboskopoe ’tapoe publiki pasi, na ini oso foe sma èn tapoe difrenti tra presi’. Den e doe foe eksemre strati-wroko nanga tijdschrift (a tijdschrift disi nanga a sisa blad Ontwaakt!) èn den sma sabi den spesroetoe foe na oso foe oso prékiwroko.

19. Fa bosroiti e teki na ini a tori foe den prékiwroko methode di Jehovah Kotoigi e gebroiki now?

¹⁹ Den fundamentifasi di Jehovah Kotoigi e gebroiki now foe na diniwroko ben de kaba na ini na fosi jarhondro èn boiti foe dati a de joisti dati na disiten tiriskin foe salfoe kristensma e teki a bosroiti sortoe préki methode de boen na ini a ten disi. Den sortoe bosroiti disi kan abi leki fundamenti „na koni èn na praktis ondrofeni” foe den man disi. Ma spesroetoe den e teki bosroiti soleki na kristen tiriskin foe na fosi jarhondro ben doe disi. Na ini begi den e soekoe na tiri foe Gado èn na tiri foe en santa jeje èn den e waka baka bijbel eksempre foe si sortoe prékiwroko methode de moro boen na ini den „laasti dé disi”. — 2 Timotéus 3:1; Tori foe den Apostel 15:23, 28.

20. (a) Foe san-ede meki wi kan de séker dati a boen-ati foe Jehovah de tapoe den prékiwroko methode di Jehovah Kotoigi e gebroiki? (b) Fa ala dienstknekti foe Jehovah moe si na Kownoekondre-prékiwroko?

²⁰ A de krin taki den prékiwroko methode di Jehovah Kotoigi ben gebroiki ben kon foe na voorzienigheid foe Gado, bika Gado ben blesi den moeiti disi nanga winimarki èn blesi pasa marki (Odo 10:22). Bigi ipi sma ben teki na troe anbegi èn ben moksi densrefi na a fikapisi foe Jezus salfoe bakaman; den e go tron wan pisi foe na wan enkri organisaatsi di e gi grani na Jehovah santa nen èn di e meki sondro frede na boen njoensoe bekènti foe na hemel Kownoekondre di opo. Meki foe dat’ede ala dienstknegti foe Jehovah tan span densrefi foe meki discipel now di na seti disi e doro en kaba. Disi den moe doe getrow, bika troe kristen de Kownoekondreprékiman, èn dati no de foe taki.

[Foetoewortoe]

San joe e taki foe den sani di e kon now?

◻ Foe san-ede meki na Kownoekondre-boskopoe moe meki now bekénti na ala pe tapoe grontapoe?

◻ San na a moro prenspari wroko foe ala troe kristen?

◻ Foe san-ede wan sma kan taki dati na mindri Jehovah dienstknegti foe-troe sani e psa di e kon foe na voorzienigheid foe Gado?

◻ Sortoe boen fundamenti na oso-foe-oso-prékiwroko foe Jehovah Kotoigi abi?

[Prenki na tapoe bladzijde 2]

Jezus ben taki: ’Oen go, èn meki discipel.’ Joe e doe na moro prenspari wroko disi foe ala troe kristen nanga faja?

[Prenki na tapoe bladzijde 4]

Joe e préki geregeld oso foe oso? Den fosten apostel foe Jezus ben doe disi èn na faja Kownoekondreprékiman Paulus ben doe disi ooktoe