Meki a Kownoekondre boen njoensoe bekènti nanga jepi foe brochure
1 A de wan bigi prisiri foe kon sabi waarheid èn foe de na mindri den sma di e preiki a boen njoensoe na wan faja fasi! A de tranga fanowdoe taki den sma di de dorosei foe Gado en organisâsi moesoe jere a Kownoekondre boen njoensoe. Na ini den brochure Njan Boen Foe Tégo Foe A Libi Na Grontapoe!, „Zie! Ik maak alle dingen nieuw” (Loekoe! Mi e meki ala sani kon njoen), èn Na Tiri Di Sa Tjari Na Paradijs Kon, den e froeklari a waarheid foe a Kownoekondre na wan makriki fasi. Na wan libilibi fasi den e prenki a libi na grontapoe na ondro Gado Kownoekondre, èn den e poti a prakseri foe a leisiman na tapoe den troetori foe a Kownoekondre di froeklari na ini Gado Wortoe. A no de foe taki, dati a de soso a bigin foe wi wroko te wi libi wan brochure na baka gi wan sma di abi belangstelling (1 Kor. 9:23). Meki wi go baka wantewante na den sma pe wi libi brochure, nanga a marki foe pristeri wan studie na ini a boekoe Sabi di e tjari joe go na têgo libi. Fa wi kan doe disi na ini augustus?
2 Wi kan pristeri a brochure „Njan Boen Foe Tégo Foe A Libi Na Grontapoe!” nanga jepi foe wan sjatoe pristeri. Ala di joe e sori a kafti, joe ben sa kan taki:
◼ „Mi ben sa wani sori joe wan sani di abi wan kefalek moi boskopoe na ini.” Opo a Njan boen-brochure, èn leisi a fosi paragraaf foe na inleiding. Dan taki moro fara: „A e gi piki toe na tapoe na aksi disi [go na a edeprakseri na tapoesei foe prenki nomroe 8]: ’Foe san ede libisma e dede?’ Joe sa feni en moi foe studeri den prenki èn foe leisi den tekst di de na ini a brochure disi. Efoe joe wani doe dati, dan joe kan abi na eksemplaar disi.”
3 San joe sa taki te joe e tjari wan gobaka na wan sma pe joe ben libi a „Njan Boen”-brochure? Joe ben kan proeberi foe bigin na a fasi disi:
◼ Sori prenki nomroe 49 na ini a Njan boen-brochure èn aksi: „Disi a no wan kefalek moi prenki? [Gi okasi foe piki.] A de na ini a brochure di mi ben libi gi joe di mi ben fisiti joe a lasti leisi. Mi ben sa wani poti na aksi gi joe di de na tapoe a tra bladzijde.” Go na prenki nomroe 50 èn leisi na aksi: „’Joe wani libi tégo na ini na moi paradijs dati?’ [Gi okasi foe piki.] Efoe dati na san joe e winsi, loekoe dan san a e taki dati joe moesoe doe: ’Dan leri moro foe san Gado e taki.’ [Leisi Johanes 17:3.] Mi ben sa prisiri foe studeri bijbel nanga joe sondro joe pai foe dati. Joe ben sa wani dati?” Meki mofo boen foe go baka.
4 Te joe e pristeri a brochure „Zie! Ik maak alle dingen nieuw” („Loekoe! Mi e meki ala sani kon njoen”), joe ben sa kan bigin foe sori a heri prenki na tapoe a kafti èn ben kan aksi:
◼ „San joe e prakseri de fanowdoe foe doe, foe kan meki a heri grontapoe loekoe leki disi?” Gi okasi foe piki. Taki foe sonwan foe den sani foe a prenki, di den e taki foe en na tapoe bladzijde 3. Dan taki: „Foeroe sma e feni taki a no kan srefisrefi foe meki wan grontapoe leki disi. Ma a no de wan sani di Gado no man doe. [Taki foe den penti na ini paragraaf 43; èn leisi Jesaja 9:6, 7 baka dati.] Gado pramisi foe tjari wan njoen grontapoe kon pe sma foe ala nâsi sa njan boen foe wan kefalek moi paradijs. Mi ben sa wani taki joe leisi a brochure disi. A sa sori fa joe nanga joe osofamiri kan njan boen foe wan toemoesi moi tamara di Gado sa tjari kon.”
5 Na wan gobaka, joe kan gebroiki a „Zie!”-brochure foe froeklari foe san ede a de fanowdoe foe leri moro foe bijbel. Kande joe kan sori a kafti baka èn taki:
◼ „Di mi ben sori joe a prenki disi a fosi leisi, wi ben agri nanga makandra taki wi ben sa wani srefisrefi foe man libi na ini so wan toemoesi moi grontapoe. Foe meki disi kan, wan sani de di wi alamala moesoe doe.” Opo a „Zie!”-brochure na paragraaf 52; leisi a paragraaf èn a tekst na Johanes 17:3. Sori fa a bodoi na ini paragraaf 53 abi foe doe nanga na eksempre di den e gi foe wan joisti bijbel leri, èn froeklari baka dati taki Jehovah Kotoigi e pristeri so wan leri na oso, sondro joe pai foe dati. Aksi a sma efoe joe kan sori en fa wi e studeri, ala di joe e gebroiki a Sabi-boekoe.
6 Te joe e pristeri a brochure „Na Tiri Di Sa Tjari Na Paradijs Kon”, joe ben sa kan proeberi foe taki disi:
◼ „Mi jere taki foeroe sma e taki dati den ben sa wani libi na ondro wan tiri di troetroe kan loesoe den bigi problema di wi e miti na ini a ten disi. [Kari problema foe a kontren, soleki a de di wroko no de foe feni, takroedoe di e kon moro foeroe, noso a fowtoe fasi foe gebroiki drug.] Den sani disi e meki taki wi no de seiker fa a tamara foe wi nanga den lobiwan foe wi sa de. Joe denki taki oiti wan tiri sa de di sa loesoe den problema disi? [Gi okasi foe piki.] Kande joe begi a Wi Tata Begi. Efoe joe doe dati, joe ben sabi taki joe e begi troetroe gi wan regtfardiki tiri?” Go na bladzijde 3 na ini a Tiri-brochure, èn leisi den fosi toe paragraaf. Pristeri a brochure.
7 Efoe joe ben libi a brochure „Na Tiri Di Sa Tjari Na Paradijs Kon”, joe ben kan bigin a takimakandra foe a gobaka, foe di joe e taki:
◼ „Wi ben taki kaba foe a fanowdoe di de gi wan regtfardiki tiri di kan loesoe den problema foe libisma. A brochure di mi ben libi gi joe e sori go na Gado Kownoekondre leki a wan-enkri howpoe di wi abi. Son sma e aksi densrefi san a tiri dati kan doe foe meki a situwâsi foe wi kon moro boen. Bijbel e sori taki Krestes sori kaba taki a sa doe sani di libisma tiriman no man doe.” Opo a Tiri-brochure na tapoe bladzijde 29, èn leisi den lasti fo paragraaf. Taki baka dati: „Disi a no wan kefalek moi tamara? Joe ben sa wani si en?” Gi okasi foe piki. Leisi Johanes 17:3. Gi a sma deki-ati foe leri moro nanga jepi foe wan oso bijbelstudie.
8 Efoe joe e gebroiki tra brochure, joe kan sreka joe eigi pristeri, ala di joe e gebroiki den rai di skrifi na tapoesei, leki eksempre. Sreka joesrefi boen èn aksi a blesi foe Jehovah ala di joe e meki a Kownoekondre boen njoensoe bekènti.