Fa wi kan gebroiki a brochure Gado abi bun nyunsu gi wi!
A nyun brochure disi meki fu yepi wi fu tyari gobaka èn fu bigin Bijbelstudie
1. Sortu nyun brochure di wi kisi na a „Kibri yu ati!” Distrikt Kongres meki fu yepi wi fu tyari gobaka èn bigin Bijbelstudie?
1 Na a „Kibri yu ati!” Distrikt Kongres wi ben breiti fu kisi a nyun brochure di o yepi wi fu tyari gobaka èn fu bigin Bijbelstudie. A brochure Gado abi bun nyunsu gi wi! kon na a presi fu a San Gado e aksi-brochure. Den lès na ini a nyun brochure syatu tu. Disi o yepi wi fu hori Bijbelstudie na a mofodoro fu na ososma. A San Gado e aksi-brochure e taki fu a fasi fa Kresten musu libi. A kan muilek gi den nyun studenti fu agri nanga den sani disi, ma a nyun brochure e poti prakseri na a bun nyunsu di skrifi na ini Bijbel.—Tori 15:35.
2. Fu san ede a Bun nyunsu-brochure meki?
2 Fu san ede a brochure disi meki? Brada nanga sisa na heri grontapu ben aksi fu kisi wan makriki wrokosani fu hari sma kon na ini a tru anbegi èn di o yepi den fu bigin Bijbelstudie nanga a Bijbel leri-buku, a moro prenspari buku di wi e gebroiki fu studeri Bijbel nanga sma. Sma di e feni en muilek fu studeri wan buku, o feni en moro makriki fu studeri Bijbel nanga yepi fu wan brochure. Nofo tron wan brochure moro makriki fu vertaal na ini furu tongo.
3. Fa a brochure disi de tra fasi leki den tra publikâsi fu wi?
3 Fa a brochure seti: Furu fu den publikâsi di wi e gebroiki fu studeri, skrifi na so wan fasi taki sma kan leisi èn frustan den tru tori fu Bijbel, sondro fu wan sma yepi den. A brochure disi de tra fasi. A skrifi fu studeri Bijbel nanga wan sma di e yepi yu. Fu dati ede, te wi e pristeri en gi wan sma, dan a moro bun fu taki fu wán noso tu paragraaf nanga a sma. Den paragraaf syatu, so taki yu kan taki fu den na a mofodoro fu wan sma, noso na en wrokope. Aladi a bun fu bigin nanga lès 1, yu kan bigin nanga iniwan tra lès na ini a brochure.
4. Fa a brochure e yepi wi fu gi leri langalanga komoto fu Bijbel?
4 Na ini furu fu den publikâsi fu wi, den piki na tapu den aksi de na ini den paragraaf. Ma na ini a brochure disi, den piki de fu feni moro furu na ini Bijbel. Moro furu sma wani leri wan sani na ini Bijbel na presi na ini den tra publikâsi fu wi. Dati meki den no skrifi san moro furu fu den Bijbeltekst e taki. Wi musu leisi den na ini Bijbel srefi. Disi o yepi den studenti fu kon si taki den sani di den e leri e kon fu Gado.—Yes. 54:13.
5. Fu san ede a prenspari taki a sma di e gi leri, musu sreka bun ibri leisi te a o studeri nanga wan sma?
5 A brochure no e fruklari ala den Bijbeltekst. Fu san ede? Dati de so fu gi a studenti deki-ati fu poti aksi èn fu gi a sma di e studeri nanga en na okasi fu gebroiki a koni fu en fu gi leri. Dati meki a prenspari fu sreka bun ibri leisi te yu o studeri nanga wan sma. Ma luku bun taki yu no e taki tumusi furu. Wi lobi fruklari den tekst, ma nofo tron a moro bun fu aksi a studenti fu fruteri fa a e frustan a tekst. Te wi e poti bun aksi gi en, dan dati kan yepi en fu frustan san ibri tekst wani taki.—Tori 17:2.
6. Fa wi kan gebroiki a brochure: (a) te sma e tweifri taki wan Gado de èn te den no e bribi na ini Bijbel? (b) te wi e preiki oso fu oso? (c) fu bigin Bijbelstudie wantewante? (d) te wi e tyari gobaka?
6 Neleki den tra publikâsi di wi e gebroiki fu hori Bijbelstudie, wi kan pristeri a brochure disi ala ten, awansi sortu tra sani wi musu pristeri na ini a mun. Furu sma o wani gebroiki en fu bigin Bijbelstudie wantewante na a mofodoro fu wan sma. Boiti dati, soleki fa wi ben yere na a distrikt kongres, dan „a kan yepi wi trutru fu tyari bun gobaka” na den sma di wani sabi moro.—Luku den faki na tapu bladzijde 5-7.
7. Fa yu kan hori wan Bijbelstudie nanga a brochure?
7 Fa fu hori a studie: Te wi e bigin a studie, wi kan leisi na aksi di skrifi nanga fatu letter èn di abi wan nomru. Baka dati, leisi a paragraaf nanga den tekst di skrifi skoinsi. Poti bun aksi fu yepi na ososma fu frustan san den tekst wani taki. Fosi yu o go na a tra pisi, aksi na ososma fu piki na aksi di skrifi nanga fatu letter fu luku efu a frustan en. Den fosi leisi te yu e go na a sma, dan a ben o moro bun fu taki fu wán aksi nomo di skrifi nanga fatu letter. Baka wan pisi ten, wi kan taki pikinso moro langa nanga a sma èn studeri wan heri lès.
8. San wi musu taki fosi wi leisi den Bijbeltekst èn fu san ede?
8 Na den Bijbeltekst pe skrifi „leisi”, yu kan feni a piki tapu na aksi di skrifi na ini fatu letter. Fosi yu o leisi wan Bijbeltekst, dan no taki: „Na apostel Paulus skrifi” noso „Luku san Yeremia ben taki na fesi”. A sma kan denki taki den sani di wi o leisi na sani di libisma taki. A ben o bun fu taki: „A Wortu fu Gado e taki” noso „Luku san Bijbel ben taki na fesi”.
9. Wi musu leisi ala den Bijbeltekst te wi e studeri?
9 Wi musu leisi ala den Bijbeltekst noso soso den wan pe skrifi „leisi”? Luku fa a situwâsi de. Nowan fu den tekst skrifi fu soso fu di den alamala prenspari. Wi kan leri wan sani fu ibri tekst. Ma son leisi te a studenti no abi ten, noso te a tekst no e hari en prakseri, noso te a no sabi leisi bun, dan wi kan luku soso den tekst pe skrifi „leisi”.
10. O ten a bun fu bigin studeri a Bijbel leri-buku?
10 O ten yu kan bigin studeri a Bijbel leri-buku: Baka te wi studeri wan tu lès fu a brochure èn wi abi a gwenti kaba fu studeri nanga a sma, dan wi kan bigin nanga a Bijbel leri-buku noso wi kan go doro nanga a Bun nyunsu-brochure. Preikiman kan luku o ten a fiti fu bigin nanga a Bijbel leri-buku. Te wi o bigin nanga a Bijbel leri-buku, dan wi musu bigin nanga a fosi kapitel? Wi srefi musu luku san fiti a situwâsi, fu di ibri sma de tra fasi. Ma a ben o bun gi furu studenti te wi e luku den srefi tori baka di skrifi moro finifini na ini a Bijbel leri-buku.
11. Fu san ede wi musu gebroiki a nyun brochure disi bun?
11 Na ini wan grontapu pe furu bun nyunsu no de, wi abi a bigi grani fu fruteri sma a moro bun nyunsu di de. Disi na a nyunsu taki Gado Kownukondre e tiri èn taki heri esi wan nyun grontapu o kon pe retidu de (Mat. 24:14; 2 Petr. 3:13). Wi sabi seiker taki furu sma di e yere a boskopu disi e agri nanga den wortu disi di skrifi na ini Bijbel: „Luku den moi futu fu den sma di e waka na tapu den bergi fu tyari bun nyunsu, fu den sma di e fruteri fu wan bun ten, fu den sma di e tyari bun nyunsu fu wan moro bun sani, fu den sma di fruteri taki frulusu o kon, èn fu den sma di e taigi Sion: ’Yu Gado tron kownu!’” (Yes. 52:7) Meki wi gebroiki a nyun brochure disi fu fruteri sma na ini wi kontren taki Gado abi bun nyunsu gi wi!
[Faki na tapu bladzijde 5]
Te sma no e bribi na ini Gado èn na ini Bijbel:
● Na ini son kontren, preikiman e si taki te sma e yere den wortu „Gado” nanga „Bijbel”, dan den no wani taki nanga wi. Te dati de so, dan a fosi leisi te wi e go na a sma, a bun fu taki fu problema di sma na ini a kontren abi. Kande den wani wan bun tirimakti, den e suku yepi gi den osofamiri, èn den wani sabi san o pasa na ini a ten di e kon. Kande wi kan pristeri a Bun nyunsu-brochure, baka te wi taki wan tu leisi kaba nanga a sma fa wi sabi taki wan Gado de èn fu san ede wi kan bribi na ini Bijbel.
[Faki na tapu bladzijde 6]
Te wi e go oso fu oso:
● „Mi kon na yu fu sori yu o makriki a de fu kon sabi san Gado abi na prakseri gi libisma na ini a ten di e kon. Oiti yu aksi yusrefi efu Gado o puru ala den pina fu wi? [Gi a sma na okasi fu piki.] A brochure disi e sori pe na ini Bijbel yu kan feni a piki na tapu na aksi dati. [Gi en a brochure èn leisi a fosi paragraaf fu lès 1 nanga Yeremia 29:11.] San yu e denki, a tekst disi e sori taki Gado wani taki sani e go moro bun gi wi na ini a ten di e kon? [Gi a sma na okasi fu piki.] Efu yu wani yu mag abi a brochure disi. Wan tra leisi wi kan luku a di fu tu paragraaf fu kon sabi sortu piki Bijbel e gi na tapu na aksi: ’Fa Gado o frulusu libisma fu den sani di e meki taki den e pina?’” Efu yu si taki na ososma abi moro ten a fosi leisi te yu go na en, dan kande yu kan leisi èn taki fu a di fu tu paragraaf nanga den dri Bijbeltekst. Aksi en fu kon baka fu luku a di fu tu aksi na ini a lès dati.
● „Furu sma lobi begi, spesrutu te den abi problema. Yu e begi son leisi? [Gi a sma na okasi fu piki.] Yu e denki taki Gado e arki ala begi, noso a de so taki a no lobi son begi? [Gi a sma na okasi fu piki.] Mi abi wan brochure di e sori sortu piki Bijbel e gi na tapu den aksi dati. [Gi en a brochure èn taki nanga en fu a fosi paragraaf fu lès 12 nanga a tekst pe skrifi „leisi”.] A no moi fu si taki Gado wani arki wi? Ma te wi wani meki Gado arki den begi fu wi, dan wi musu sabi Gado bun. [Go na lès 2 èn sori en den edeprakseri.] Efu yu wani, dan mi kan gi yu a brochure disi èn wan tra leisi wi kan leisi sortu piki Bijbel e gi na tapu den moi aksi disi.”
● „Mi de dyaso fu di sma e broko den ede nanga den sani di e pasa na grontapu. Yu e denki taki sani sa kon moro bun? [Gi a sma na okasi fu piki.] Furu sma e fruwondru fu leri taki Bijbel abi bun nyunsu di kan gi wi howpu. Dyaso yu kan si wan tu fu den aksi di Bijbel e piki.” Gi en a brochure èn aksi en fu luku sortu aksi na tapu a lasti bladzijde a feni moi. Baka dati, go na a lès èn sori en fa wi e studeri nanga sma. Seti sani fu go baka na en èn fu luku a tra aksi na ini a lès dati.
[Faki na tapu bladzijde 7]
Aksi a sma wantewante efu a wani studeri:
● „Mi kon na yu fu di mi wani sori yu wan nyun brochure di wi e gebroiki fu studeri Bijbel nanga sma. A brochure disi abi 15 lès di e sori pe na ini yu Bijbel yu kan feni piki na tapu prenspari aksi. [Sori en a fesisei kafti èn a bakasei kafti.] Oiti yu pruberi fu frustan Bijbel? [Gi a sma na okasi fu piki.] Meki mi sori yu o makriki den lès de. [Luku a fosi paragraaf fu aksi 3 na ini lès 3 èn leisi Openbaring 21:4, 5. Efu a fiti, dan yu kan luku a tra paragraaf nanga den tekst pe skrifi „leisi”.] Efu yu wani mi kan libi a brochure disi gi yu. Wi e gi yu a deki-ati fu pruberi fu studeri Bijbel awansi wán leisi nomo. Efu yu lobi en, yu kan go doro. Wan tra leisi wi kan luku a fosi lès. Luku taki na wán bladzijde nomo a abi.”
[Faki na tapu bladzijde 7]
Tyari a brochure gi wan gobaka:
● „Mi breiti fu si yu baka. Mi tyari a brochure disi gi yu di e sori sortu piki Bijbel e gi na tapu furu moi aksi. [Gi en a brochure èn aksi en fu luku a bakasei kafti.] Sortuwan fu den tori disi yu feni moro moi? [Gi a sma na okasi fu piki. Go na a lès di a feni moi.] Meki mi sori yu fa wi kan gebroiki a brochure disi fu feni a piki na ini Bijbel.” Sori en fa wan studie e hori, fu di yu e taki fu wán noso tu paragraaf nanga den tekst pe skrifi „leisi”. Yu si taki na bigin yu bigin kaba nanga wan Bijbelstudie! Libi a brochure gi na ososma èn seti sani fu go baka na en. Te yu luku a heri lès kaba, yu kan taki fu wan tra lès di na ososma feni moi, noso yu kan bigin nanga lès 1 fu a brochure.