Waka na ini bribi
1 Miljoenmiljoen sma e bow a libi foe den lontoe materia goedoe, èn na wan don fasi e froetrow na tapoe a bedrigi krakti foe goedoe (Mat. 13:22). Te den goedoe foe den lasi noso sma foefoeroe den noso den sori taki den de foe pikinso wini nomo, dan dati e leri den wan sani di tranga foe tjari. Wi e kisi a tranga foe feti na baka wan moro koni fasi foe libi èn foe meki moeiti foe kisi goedoe na jejefasi (Mat. 6:19, 20). Disi abi foe doe nanga „waka na ini bribi”. — 2 Kor. 5:7.
2 A wortoe „bribi” poti abra foe wan Griki wortoe di e tjari a prakseri kon abra foe froetrow, fasti overtoigi. Foe waka na ini bribi wani taki foe tanapoe na fesi moeilek situwâsi nanga froetrow tapoe Gado, èn froetrow tapoe a man di a man tiri den stap foe wi èn tapoe a wani di a wani sorgoe gi den sani di wi abi fanowdoe. Jesus ben gi a volmaakti eksempre; a ben tan poti en prakseri na tapoe sani di ben de troetroe prenspari (Hebr. 12:2). Na a srefi fasi, wi moesoe tan poti wi ati na tapoe afersi na jejefasi di wi no kan si (2 Kor. 4:18). Ala ten wi moesoe hori na prakseri taki a disiten libi foe wi no de seiker èn erken taki wi e anga krinkrin foe Jehovah.
3 Wi moesoe abi a fasti overtoigi toe taki Jehovah e tiri wi nanga jepi foe en organisâsi di wi kan si, na ondro a tiri foe „a getrow èn koni srafoe” (Mat. 24:45-47). Wi e sori a bribi foe wi te wi e „gi jesi na den wan di e teki fesi” na ini a gemeente (Hebr. 13:17). Te wi e wroko makandra nanga a theokrasia seti na wan sakafasi, dan wi e sori taki wi e froetrow tapoe Jehovah (1 Petr. 5:6). Inisei foe wi moesoe boeweigi wi foe horibaka nanga wi heri ati gi a wroko di na organisâsi kisi foe doe. Disi o tjari wi kon moro krosibei na den brada foe wi na ini wan tranga banti foe lobi nanga wánfasi. — 1 Kor. 1:10.
4 Fa foe meki bribi kon tranga: Wi no moesoe gi pasi meki a bribi foe wi no go na fesi. Wi moesoe feti sondro foe weri foe meki a bribi foe wi kon tranga. Te wi e studeri, e begi èn e go na den konmakandra doronomo, dan dati o jepi wi foe meki a bribi foe wi kon tranga, so taki, nanga a jepi foe Jehovah, a kan kakafoetoe gi iniwan tesi di a e kisi (Ef. 6:16). Joe abi wan boen gwenti kaba foe leisi bijbel ala dei èn foe sreka joesrefi gi konmakandra? Nofo tron joe e denki dipi foe den sani di joe leri, èn joe e go na Jehovah na ini begi? A de a gwenti foe joe foe go na ala den konmakandra èn foe teki prati na den te joe kisi na okasi foe doe dati? — Hebr. 10:23-25.
5 Boen wroko e sori taki wan sma bribi tranga (Jak. 2:26). Wán foe den moro boen fasi foe sori a bribi foe wi, na foe meki a howpoe foe wi bekènti na tra sma. Joe e soekoe okasi foe prati a boen njoensoe nanga tra sma? Joe kan kenki den omstandigheid foe joe, so taki joe man doe moro na ini a diniwroko? Joe e gebroiki den rai di wi e kisi foe meki a kwaliteit foe a diniwroko foe wi kon moro boen èn taki a abi moro boen bakapisi? Joe e poti marki na jejefasi gi joesrefi èn joe e doe moeiti foe doro den?
6 Jesus ben warskow foe no abi foe doe pasa marki nanga den aladei afersi foe a libi èn foe no gi pasi meki afersi na materia sei noso afersi pe wi e prakseri wisrefi nomo, e meki taki a fasi fa wi e si sani na jejefasi no krin moro (Luk. 21:34-36). Wi moesoe loekoe boen fa wi e waka, so taki wi bribi no lasi, neleki fa wan boto broko èn lasi (Ef. 5:15; 1 Tim. 1:19). Wi alamala e howpoe taki te foe kaba wi sa man froeklari taki wi ’feti a toemoesi boen feti, waka a pasi te na a kaba, èn hori bribi’. — 2 Tim. 4:7.