Bribi​—Wan fasi di e gi wi krakti

BRIBI e gi wi furu krakti. Satan wani pori a matifasi di wi abi nanga Yehovah, ma bribi e yepi wi fu ’kiri a faya fu ala den peiri di na ogriwan e sutu kon na wi tapu’ (Ef. 6:16). Bribi e yepi wi fu horidoro awinsi wi abi problema di de leki bigi bergi. Yesus ben taigi den disipel fu en: „Efu a bribi fu unu pikin leki wan mosterd-siri, dan unu o man taigi a bergi disi: ’Opo fu dya go drape’, èn a bergi o opo ensrefi go drape” (Mat. 17:20). Fu di wi sabi taki bribi kan tranga a matifasi di wi abi nanga Yehovah, meki a bun fu luku den aksi disi: San na bribi? Fu san ede wi musu warderi den tru leri fu Bijbel fu man abi bribi? Fa wi kan tranga wi bribi? Na ini suma wi musu poti bribi?​—Rom. 4:3.

SAN NA BRIBI?

A no te wan sma e bribi den sani di Bijbel e taki, dan a abi trutru bribi. Srefi ’den ogri yeye e bribi taki wán Gado de èn den e beifi’ (Yak. 2:19). Sobun san na bribi?

Bijbel e sori taki bribi abi fu du nanga tu sani. Na a fosi presi Bijbel e leri wi taki „bribi na te wan sma e fruwakti taki den sani di a e howpu, o kon tru nomonomo” (Hebr. 11:1a). Te yu abi bribi, dan yu de seiker taki ala ten Yehovah e taki san tru èn taki ala den pramisi fu en o kon tru. Fu eksempre, Yehovah ben taigi den Israelsma: „Efu unu man broko a frubontu di mi meki nanga dei èn a frubontu di mi meki nanga neti, so taki dei nanga neti no o kon moro na a ten di den musu kon, dan a frubontu di mi meki nanga mi futuboi David man broko tu” (Yer. 33:20, 21). Yu e frede taki a son no o opo wan dei noso taki a no o dongo? Noso taki neti nanga dei no o kon moro? Efu yu no e tweifri taki a son o opo noso taki a o dongo, dan yu no abi fu tweifri taki a sma di meki den sani disi o du san a taki.​—Yes. 55:10, 11; Mat. 5:18.

A di fu tu sani di Bijbel e leri wi na taki bribi na „a krin buweisi fu sani di de trutru, ma di wi no man si” (Hebr. 11:1b). Fa so? Kon meki wi taki dati wan pikin e aksi yu fa yu du sabi taki winti de. Aladi noiti yu no si winti, yu o taigi a pikin taki buweisi lai di e sori taki winti de. Fu eksempre, wi e firi te a winti e wai èn wi e si fa a e seki den wiwiri fu den bon. Den sani disi kan yepi a pikin fu bribi taki winti de trutru aladi a no man si en. Na so a de tu taki wi abi buweisi fanowdu fu man abi bribi.​—Rom. 1:20.

WI MUSU WARDERI DEN TRU LERI FU BIJBEL FU MAN ABI BRIBI

Fu di buweisi de fanowdu fu man abi bribi, meki wan sma musu kon „sabi a tru leri finifini” (1 Tim. 2:4). Ma dati wawan no nofo. Na apostel Paulus ben skrifi: „Nanga na ati wan sma e bribi” (Rom. 10:10). Wan sma no musu bribi den tru leri fu Bijbel nomo, ma a musu warderi den tu. Na dati o yepi en fu du den sani di a e leri (Yak. 2:20). Efu wan sma no e warderi den tru leri fu Bijbel, dan awinsi san yu o sori en a no o bribi. A o weigri fu kenki a fasi fa a e denki èn a o libi leki fa a wani (2 Petr. 3:3, 4; Yud. 18). Dati meki a no ala sma di ben si wondru na ini Bijbel ten ben kon abi bribi (Num. 14:11; Yoh. 12:37). A santa yeye fu Gado o yepi wan sma fu abi bribi, soso te a sma lobi den tru leri fu Bijbel.​—Gal. 5:22; 2 Tes. 2:10, 11.

FA DAVID BEN KON ABI WAN TRANGA BRIBI?

Wan sma di ben abi wan tranga bribi ben de Kownu David (Hebr. 11:32, 33). Ma a no ala den famiriman fu David ben abi wan tranga bribi. Prakseri Eliab, a moro bigi brada fu David. Di Goliat ben spotu den Israelsma, David mandi. Ma Eliab ati bron nanga David èn a bari en. Na a okasi disi a sori taki a no ben bribi taki Yehovah ben abi a makti fu frulusu den (1 Sam. 17:26-28). Nowan sma e gebore nanga bribi èn wan sma no e abi bribi fu di en papa nanga mama abi bribi. Sobun David ben abi bribi fu di ensrefi ben abi wan bun matifasi nanga Gado.

Na ini Psalm 27, David e sori fa a kon abi so wan tranga bribi (vers 1). David ben denki dipi fu den sani di miti en na ini en libi èn fa Yehovah yepi en nanga den feanti fu en (vers 2, 3). A ben e warderi a tabernakel pe sma ben anbegi Yehovah (vers 4). David ben anbegi Gado makandra nanga trawan na a tabernakel (vers 6). A ben e begi Yehovah fayafaya (vers 7, 8). David ben wani tu taki Gado leri en den pasi fu en (vers 11). A ben prenspari gi David fu abi bribi. Dati meki a ben aksi: „San ben o pasa nanga mi, efu mi no ben bribi?” (vers 13)

FA WI KAN TRANGA WI BRIBI?

Yu kan kon abi wan tranga bribi neleki David efu yu e du den sani di skrifi na Psalm 27. Wan sma e kisi bribi te a sabi san tru. Dati meki o moro yu e studeri Gado Wortu nanga den buku fu na organisâsi fu Yehovah, o moro a o makriki gi yu fu sori bribi (Ps. 1:2, 3). Teki ten fu denki dipi te yu e studeri. Dati o yepi yu fu kisi moro warderi gi Yehovah. Te yu e warderi Yehovah yu o go na den konmakandra fu anbegi en èn yu o fruteri trawan fu a howpu fu yu (Hebr. 10:23-25). Wi e sori tu taki wi abi bribi te wi e ’begi ala ten èn te wi no e kon weri fu du dati’ (Luk. 18:1-8). Fu dati ede yu musu ’begi Yehovah doronomo’ fu di ’a e broko en ede nanga yu’ (1 Tes. 5:17; 1 Petr. 5:7). Bribi e meki wi du san bun èn te wi e du san bun wi bribi e kon tranga.​—Yak. 2:22.

BRIBI NA INI YESUS

A neti fosi Yesus dede a taigi den disipel fu en: „Bribi na ini Gado èn bribi na ini mi tu” (Yoh. 14:1). Sobun wi no musu bribi na ini Yehovah wawan, ma wi musu bribi na ini Yesus tu. Fa yu kan sori taki yu e bribi na ini Yesus? Wi o luku dri fasi.

Na a fosi presi yu musu si a lusu-paiman leki wan kado di Gado gi yu. Na apostel Paulus ben taki: ’Mi e libi fu di mi e bribi na ini a Manpikin fu Gado di lobi mi èn di gi en libi fu mi ede’ (Gal. 2:20). Te yu e bribi na ini Yesus, dan yu o bribi taki Yesus dede gi yu, taki yu kan kisi pardon fu yu sondu, taki Gado lobi yu trutru èn yu o abi a howpu fu libi fu têgo (Rom. 8:32, 38, 39; Ef. 1:7). Efu yu e bribi taki a lusu-paiman man yepi yu, yu no o firi leki yu no warti.​—2 Tes. 2:16, 17.

A di fu tu sani na taki wi musu kon krosibei na Yehovah nanga yepi fu begi. Fu di Yesus dede gi wi, meki wi man begi Yehovah „sondro fu frede, so taki a kan abi sari-ati nanga wi èn a kan sori wi bun-ati fu yepi wi na a yoisti ten” (Hebr. 4:15, 16; 10:19-22). Begi e meki taki wi abi a krakti fu man kakafutu gi tesi.​—Luk. 22:40.

A di fu dri sani na taki wi musu gi yesi na Yesus. Na apostel Yohanes ben skrifi: „A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi, ma a bigi atibron fu Gado e tan na en tapu” (Yoh. 3:36). Dyaso Yohanes e taki fu sma di abi bribi èn fu sma di trangayesi. A e sori taki den sma di e bribi na ini Yesus e gi yesi na en. Yu e gi yesi na Yesus te yu e du san „a wèt fu Krestes” e taki, dati na ala den sani di Yesus leri wi nanga den komando di a gi wi (Gal. 6:2). Boiti dati, te yu e teki den rai di wi e kisi fu „a koni srafu di de fu frutrow”, yu e gi yesi na Yesus tu (Mat. 24:45). Te yu e gi yesi na Yesus, dan yu o man horidoro te yu e kisi bigi problema.​—Luk. 6:47, 48.

„MEKI A SANTA BRIBI FU UNU YEPI UNU FU KON MORO TRANGA”

Wan leisi wan man ben taigi Yesus: „Mi abi bribi! Yepi mi efu mi e mankeri bribi!” (Mark. 9:24) A man disi ben abi sakafasi. A ben abi bribi, ma a ben sabi taki a ben abi moro bribi fanowdu. Neleki a man disi wi o kon na ini situwâsi pe wi o abi moro bribi fanowdu. Wi kan tranga wi bribi nownow kaba. Soleki fa wi si, wi e du dati te wi e studeri Gado Wortu èn te wi e denki dipi fu en. Disi o meki wi kisi moro warderi gi Yehovah. Wi bribi o kon moro tranga tu te wi e kon makandra nanga tra brada nanga sisa fu anbegi Yehovah, te wi e fruteri trawan fu a howpu fu wi èn te wi e tan begi. Te wi e meki muiti fu tranga wi bribi, wi o kisi wan moi blesi. Gado Wortu e taki: „Lobiwan, meki a santa bribi fu unu yepi unu fu kon moro tranga . . . Te unu e du dati, dan Gado o tan lobi unu.”​—Yud. 20, 21.