Sori bribi di abi en fondamenti tapoe waarheid
„Sondro bribi a no kan taki wi e plisi en dorodoro, bikasi a sma di e kon na Gado, moesoe bribi taki a de èn taki a e tron na sma di e pai den wan di e soekoe en serjoesoe.” — HEBREWSMA 11:6.
1, 2. Fa a bribi foe Adam ben kon na ondro tesi èn nanga sortoe bakapisi?
BRIBI e aksi moro leki foe bribi taki Gado de. Na fosi man, Adam, no ben degedege taki Jehovah Gado de. Gado ben taki nanga Adam, so leki a e sori, nanga jepi foe En Manpikin, na Wortoe (Johanes 1:1-3; Kolosesma 1:15-17). Tokoe, Adam ben lasi na froewakti foe abi têgo libi, foe di a ben misi foe gi jesi na Jehovah èn foe sori bribi na ini en.
2 A ben gersi taki a kolokoe foe Adam gi na ten di ben o kon, ben kon ini kefar di en wefi Eva ben trangajesi Jehovah. Ija, na prakseri foe lasi Eva, ben poti a bribi foe na fosi libisma na tesi! Gado ben kan loesoe na problema disi na so wan fasi, taki tokoe a ben gi djaranti taki na kolokoe èn tanboen foe Adam go doro? Foe di Adam ben teki a sei foe Eva ini a pasa foe Gado wet, meki a ben sori taki a no ben prakseri so. A ben proeberi foe loesoe na problema na en fasi, na presi foe soekoe fajafaja na tiri foe Gado. Foe di Adam ben misi foe sori bribi ini Jehovah, meki a ben tjari dede kon na ensrefi tapoe èn na tapoe ala den bakapikin foe en. — Romesma 5:12.
San na bribi?
3. Fa bijbel e taki tra fasi foe bribi leki fa wan seiker wortoeboekoe e doe disi?
3 Wan wortoeboekoe e taki foe bribi leki „fasti overtoigi ini wan sani di boeweisi no de foe dati”. Ma bijbel joisti e poti krakti tapoe na tra sei foe a tori na presi foe horibaka gi na prakseri dati. Bribi abi en fondamenti na tapoe troe tori, tapoe troetroe sani, tapoe waarheid. Boekoe e taki: „Bribi na a seiker froewakti foe sani di wan sma e howpoe a tapoe, na krin sori foe troe sani di no de foe si” (Hebrewsma 11:1). Wan sma di abi bribi, abi na djaranti taki ala sani di Gado pramisi de leki a kon troe kaba. So tranga na overtoigi boeweisi de ini troetroe sani di sma ai no kan si, taki den e taki foe bribi, taki a de a srefi leki a boeweisi dati.
4. Fa wan boekoe nanga verwijzing e horibaka gi na fasi fa bijbel e taki foe bribi?
4 Na ini na Njoen-Grontapoe Vertaling, na oorzakelijke vorm foe na Hebrew werkwortoe ʼa·manʹ den vertaal sontron nanga „sori bribi”. So leki fa na Theological Wordbook of the Old Testament (Theologis wortoeboekoe foe na Owroe Testamenti) e taki, dan „na prakseri foe seikerfasi de leki fondamenti ini na roetoe foe a wortoe disi . . . kontrari san sma e prakseri na ini a ten disi foe bribi leki wan sani di man, di sma e howpoe taki a de troe, ma di no de seiker.” Na srefi boekoe e taki: „Na wortoe ʼāmēn, ’foe troe’, di kon foe ʼāmēn, den ben e poti en abra na ini a Njoen Testamenti ini a wortoe amēn di de [na disiten] wortoe ‘amen’ foe wi. Jesus ben gebroiki na wortoe foeroe tron (Mt 5:18, 26, èn so moro fara) foe poti krakti tapoe na seikerfasi foe wan afersi”. Na wortoe di den ben vertaal nanga „bribi” na ini den Griki Kresten Boekoe, so srefi wani taki overtoigi na ini wan sani, èn a overtoigi disi abi wan steifi fondamenti tapoe troe tori noso waarheid.
5. Fa na Griki wortoe di den vertaal nanga „seiker froewakti” na ini Hebrewsma 11:1, ben gebroiki na ini dokoementi foe bisnisman foe owroeten, èn san a wani taki gi kresten?
5 Na Griki wortoe (hy·poʹsta·sis) di den vertaal nanga „seiker froewakti” na ini Hebrewsma 11:1 den ben gebroiki ini algemeen na ini den papirus bisnis dokoementi, foe tjari na prakseri kon na fesi foe wan sani di e djaranti wan sma goedoe foe kisi ini a ten di e kon. Den sabiman Moulton èn Milligan e aksi foe vertaal en so: „Bribi na a eigendompapira foe san wan sma e howpoe na tapoe” (Vocabulary of the Greek Testament). A de krin, taki te wan sma abi wan eigendompapira foe en goedoe, a kan abi na „seiker froewakti” taki wan dei a howpoe foe en foe kisi a goedoe disi, sa kon troe.
6. San na Griki wortoe di den vertaal nanga „krin boeweisi” na ini Hebrewsma 11:1 wani taki?
6 Na ini Hebrewsma 11:1, na Griki wortoe di den poti abra nanga “krin boeweisi” (eʹleg·khos) e tjari na prakseri kon a fesi foe pristeri boeweisi di e sori wan sani, spesroetoe wan sani di de tra fasi foe san gersi taki a de so. Positief noso krin boeweisi e tjari kon a krin san ben pasa a fesi sondro foe sma ben si en, èn foe dati-ede e sori taki san ben gersi taki de so no de so. So boen na ini den Hebrew Boekoe èn den Griki Boekoe, bribi kwetikweti no wani taki „tranga bribi ini wan sani di boeweisi no de foe dati”. Kontrari foe dati, bribi abi en fondamenti a tapoe waarheid.
Abi en fondamenti a tapoe fondamenti waarheid
7. San Paulus nanga David e skrifi foe den sma di e weigri foe erken taki Gado de?
7 Na apostel Paulus ben taki foe wan fondamenti waarheid di a ben skrifi taki na Mekiman „den eigifasi foe en di sma ai no man si de krin foe si foe sensi a meki foe grontapoe, foe di joe kan si den nanga jepi foe den sani di ben meki, srefi en têgo krakti nanga Gadofasi, so taki [gensman foe na waarheid] no man krin densrefi” (Romesma 1:20). Ija, „hemel e froeteri foe na glori foe Gado”, èn „grontapoe foeroe nanga den mekisani foe [en]” (Psalm 19:1; 104:24). Ma san now, te wan sma no wani loekoe na boeweisi? Na psalm singiman David ben taki: „Na ogri-atiwan ini en froeberdefasi [„asranti leki a de”, The New English Bible] no e ondrosoekoe sani; ala den prakseri foe en de: ’No wan Gado no de’” (Psalm 10:4; 14:1). Foe wan pisi, bribi abi en fondamenti a tapoe den fondamenti waarheid taki Gado de.
8. Sortoe seikerfasi èn koni foe si sani, den sma di e sori bribi man foe abi?
8 Jehovah no de nomo dan a kaba; a de foe froetrow toe, èn wi kan bow tapoe den pramisi foe en. A ben taki: „Foe troe, joisti so leki mi prakseri, na so a moesoe pasa; èn joisti so leki mi taki-go-taki-kon nanga misrefi, na so a sa kon” (Jesaja 14:24; 46:9, 10). Den wortoe disi a no wortoe di no wani taki noti. Boen krin boeweisi de taki hondrohondro profeititori di ben skrifi na ini Gado Wortoe kon troe. Nanga a krin leti disi, dan sma di e sori bribi man si den foeroe tra bijbel profeititori toe di nownow e kon troe (Efesiasma 1:18). Foe eksempel, den e si na kontroe foe „na marki” foe Jesus denoja, so srefi na preiki di e go moro esi, foe na Kownoekondre di opo èn so srefi na gro foe na troe anbegi di den ben taki a fesi foe en (Mateus 24:3-14; Jesaja 2:2-4; 60:8, 22). Den sabi taki heri esi den nâsi sa bari „vrede nanga seikerfasi!” èn taki sjatoe baka dati Gado sa „pori den sma di e pori grontapoe” (1 Tesalonikasma 5:3; Openbaring 11:18). Fa a de wan blesi foe abi bribi di abi en fondamenti a tapoe profeiti waarheid!
Wan froktoe foe santa jeje
9. San bribi nanga santa jeje abi foe doe nanga makandra?
9 Na waarheid di bribi abi en fondamenti a tapoe, de foe feni na ini bijbel, di kon foe na santa jeje foe Gado (2 Samuèl 23:2; Sakaria 7:12; Markus 12:36). A de wan sani foe froestan foe dati-ede, taki bribi no kan de aparti foe na wroko di santa jeje e wroko. Foe dati-ede Paulus ben kan skrifi: „Den froktoe foe na jeje [abi na ini] . . . bribi” (Galasiasma 5:22). Ma foeroe sma e weigri foe teki na waarheid di komoto foe Gado, foe di den e doti na libi foe den nanga lostoe en denki foe na skin, san e meki na jeje foe Gado sari. So boen, „bribi no de wan sani di ala sma abi”, foe di den abi no wan fondamenti foe den kan meki bribi gro a tapoe. — 2 Tesalonikasma 3:2; Galasiasma 5:16-21; Efesiasma 4:30.
10. Fa son fositen foetoeboi foe Jehovah ben sori taki den e sori bribi?
10 Ma a mindri den bakapikin foe Adam wan toe sma ben de di ben sori bribi. Hebrewsma kapitel 11 e kari Abel, Einòk, Noa, Abraham, Sara, Isak, Jakob, Josef, Moses, Rakab, Gideon, Barak, Simson, Jefta, David, èn Samuèl, makandra nanga foeroe foetoeboi foe Jehovah di nen no kari, ’di nanga a bribi foe den, sma ben kotoigi foe den.” Loekoe san „bribi” ben doe. A ben de nanga bribi taki Abel ’ben pristeri Gado wan ofrandi’ èn taki Noa „ben bow wan ark”. Nanga bribi, Abraham „ben gi jesi, foe di a hari go na wan presi di a ben sa kisi leki famirigoedoe”. Èn nanga bribi, Moses „ben gowe libi Egipti.” — Hebrewsma 11:4, 7, 8, 27, 29, 39.
11. San Tori foe den Apostel 5:32 e sori ini a tori foe sma di e gi jesi na Gado?
11 A de krin, taki ala den foetoeboi disi foe Jehovah ben doe moro leki foe bribi nomo taki Gado de. Nanga a sori di den ben sori bribi, den ben froetrow na en tapoe leki na Wan di de „na Sma di e pai den di e soekoe en serjoesoe” (Hebrewsma 11:6). Den ben doe san a jeje foe Gado ben sori den foe doe, èn ben handri na tapoe a soifri sabi foe na waarheid di ben de foe kisi ini a ten dati, ala di den no ben abi so foeroe sabi ete. Fa den ben handri tra fasi leki Adam! Adam no ben handri ini bribi di ben abi en fondamenti a tapoe waarheid noso ini akroederi nanga na tiri foe santa jeje. Gado e gi en jeje soso na den sma di e gi en jesi. — Tori foe den Apostel 5:32.
12. (a) Ini san Abel ben bribi, èn fa a ben sori disi? (b) San den kotoigi foe Jehovah di ben libi bifo na kresten ten, no ben kisi, ala di den ben abi bribi?
12 Tra fasi leki en tata, Adam, dan Abel, di ben gi ensrefi ini a dini foe Gado, ben abi bribi. So leki fa a sori, dan foe en papa nanga mama a ben kon jere foe na fosi profeititori di ben taki oiti wanten, : „Mi sa poti feantifasi a mindri joe nanga na oema èn a mindri joe siri nanga en siri. A sa masi joe ini na ede èn joe sa masi en ini en bakafoetoe” (Genesis 3:15). Gado ben pramisi na so fasi foe poeroe ogri-atifasi èn foe tjari regtfardikifasi kon baka. Fa a pramisi disi ben o kon troe, Abel no ben sabi. Ma a bribi foe, en taki Gado de na Sma di e pai den sma di e soekoe en serjoesoe, ben tranga nofo foe boeweigi en foe tjari wan ofrandi gi Gado. A ben prakseri foeroe kande foe na profeititori èn ben bribi taki a trowe foe broedoe ben sa de fanowdoe foe meki na pramisi kon troe èn foe opo a libisma famiri go kisi volmaaktifasi. Foe dati-ede meki na meti ofrandi foe Abel ben de wan sani di fiti. Ma ala di den ben abi bribi, tokoe Abel nanga den tra kotoigi foe Jehovah di ben libi bifo na kresten ten „no ben kisi na kontroe foe na pramisi.” — Hebrewsma 11:39.
Meki bribi kon boen dorodoro
13. (a) San Abraham nanga David ben kon sabi foe na kontroe foe na pramisi? (b) Foe san-ede wi kan taki, dati „na waarheid ben kon nanga jepi foe Jesus Krestes”?
13 Ten na ten na ini den jarihondro, Gado ben tjari pikinso moro waarheid kon a krin foe na fasi fa na pramisi di ben abi foe doe nanga ’na siri foe na oema’ ben sa kon troe. Abraham ben kisi foe jere: „Ala nâsi foe grontapoe seiker sa blesi densrefi nanga jepi foe joe siri” (Genesis 22:18). Bakaten, kownoe David ben kisi foe jere taki a pramisi Siri ben sa kon nanga jepi foe en kownoe famirilin. Na ini 29 G. T., a Siri dati ben kon na ini a sma foe Jesus Krestes (Psalm 89:3, 4; Mateus 1:1; 3:16, 17). Tra fasi leki Adam di no ben abi bribi, „na lasti Adam”, Jesus Krestes, ben de wan boen eksempel ini a sori di wan sma moesoe sori bribi (1 Korentesma 15:45). A ben libi wan libi foe fajafaja dienst gi Jehovah èn ben meki den foeroe profeititori di ben taki a fesi foe na Mesias, kon troe. Na so fasi Jesus ben tjari na waarheid foe na pramisi Siri kon moro krin èn ben meki den sani di na Wet foe Moses ben sori go a fesi, kon abra ini a troe libi (Kolosesma 2:16, 17). Sma ben kan taki foe dati-ede, dati „na waarheid kon nanga jepi foe Jesus Krestes.” — Johanes 1:17.
14. Fa Paulus ben sori den Galasiasma taki bribi ben kisi njoen sei?
14 Now di na waarheid ben kon nanga jepi foe Jesus Krestes, dan wan moro bigi fondamenti ben de pe bribi ini „na pramisi” kan bow a tapoe. Bribi ben meki kon moro fasti èn ben kisi njoen sei, foe taki en so. Ini a tori disi Paulus ben froeteri kompe salfoe kresten: „Boekoe ben poti ala sani makandra ondro na tiri foe sondoe, so taki na pramisi di e kon foe di sma e bribi na ini Jesus Krestes, ben sa gi na den sma di e sori bribi. Ma bifo na bribi ben kon, na wet ben hori wakti gi wi, foe di makandra wi ben de ini strafoe, ala di wi ben wakti na bribi di seiker ben sa kon a krin. Foe dati-ede meki na Wet ben tron wan leriman di e tjari wi go na Krestes, so taki den ben sa froeklari wi regtfardiki leki wan bakapisi foe bribi. Ma now di a bribi kon, dan wi no de moro langa na ondro wan leriman. Oen alamala de, foe taki en leti, manpikin foe Gado nanga jepi foe oen bribi ini Krestes Jesus.” — Galasiasma 3:22-26.
15. Fa wawan bribi ben kan meki kon boen dorodoro?
15 Den Israèlsma ben sori bribi ini a fasi fa Gado ben handri nanga den nanga jepi foe na Wetfroebontoe. Ma a bribi disi ben moesoe de ini moro sani. Fa? Foe di den ben moesoe sori bribi ini Jesus, di ben kisi salfoe nanga jeje, èn foe di na Wet ben moesoe tjari den go na en akroederi na reide foe san a Wet ben meki. Soso na a fasi dati, a bribi foe den sma bifo Krestes, ben kan kon moro boen. O prenspari a ben de gi den fositen kresten dati foe ’tan loekoe boen na Jesus, a Moro Prenspari Wrokoman èn Sma di e meki a bribi foe den kon boen dorodoro’! (Hebrewsma 12:2) A no de foe taki, dati ala kresten moesoe doe dati.
16. Fa santa jeje ben kon na wan moro krakti fasi èn foe san-ede?
16 Ini a tori foe sabi foe na waarheid foe Gado di ben kon moro foeroe nanga na volmaakti bribi di de wan bakapisi foe dati, dan sma ben kan froewakti taki santa jeje ben sa kon na wan krakti fasi? Ija. Na a Pinksterfesa foe 33 G. T., na jeje foe Gado, na pramisi jepiman di Jesus ben taki foe en, ben kanti kon tapoe den disipel foe en (Johanes 14:26; Tori foe den Apostel 2:1-4). Santa jeje ben wroko a den tapoe na wan heri njoen fasi leki salfoe brada foe Krestes. A bribi foe den, wan froktoe foe santa jeje, ben kon moro tranga. Disi ben sreka den gi na bigi wroko foe meki disipel di ben de a den fesi. — Mateus 28:19, 20.
17. (a) Fa na waarheid ben doro èn fa bribi ben kon boen dorodoro foe sensi 1914? (b) Sortoe boeweisi wi abi taki na santa jeje e wroko foe sensi 1919?
17 A bribi ben doro di Jesus ben pristeri moro leki 1900 jari pasa kaba ensrefi leki na Kownoe di den ben poti, ma di no ben e tiri ete. Ma now di a de wan hemel kownoe di e tiri, dan a fondamenti foe wi foe bribi — waarheid di tjari kon a krin — ben kon bradi srefisrefi, èn disi e meki wi bribi kon boen dorodoro. Na so toe na wroko di santa jeje e wroko kon moro krakti. Wan krin boeweisi ben de foe disi na ini 1919, di santa jeje ben tjari den foetoeboi foe Gado, di ben gi densrefi abra komoto foe wan situwâsi pe pikinso moro den ben de inaktief kon a libi baka (Esekièl 37:1-14; Openbaring 11:7-12). Na a ten dati a fondamenti ben poti foe wan jeje paradijs, di, ini den tenti jari di ben kon a baka, ala jari ben kon moro krin foe si èn ben kisi moro glori. Wan moro bigi boeweisi ben kan de foe Gado santa jeje di e wroko?
Foe san-ede wi moesoe ondrosoekoe a bribi foe wi finifini?
18. Fa den spion foe Israèl ben de difrenti foe makandra ini a tori foe bribi?
18 Sjatoe baka di den Israèlsma ben kon fri foe katibo na ini Egipti, den ben seni 12 man go foe loekoe sani a kibrifasi na ini a kondre Kanan. Ma tin foe den ben mankeri bribi, èn den ben degedege foe a man di Jehovah man foe meki en pramisi foe gi Israèl na kondre, kon troe. Den ben meki san ai e si, sani na skin fasi, boeweigi na ati foe den. Foe den 12 man disi, soso Josuwa nanga Kalèb ben sori taki den ben waka ini bribi, èn no nanga san ai e si (Teki gersi 2 Korentesma 5:7.) Den wawan a mindri den man dati, ben tan na libi foe go na ini a Pramisi Kondre, foe di den ben sori bribi. — Numeri 13:1-33; 14:35-38.
19. Fa na fondamenti, di wi moesoe bow bribi a tapoe, de moro dipi ini a ten disi leki oiti wan ten, èn tokoe san wi moesoe doe?
19 Na ini a ten disi, wi e tanapoe na a lanki foe Gado njoen grontapoe foe regtfardikifasi. Efoe wi wani foe go na ini, dan a de prenspari foe abi bribi. Kolokoe taki na fondamenti foe waarheid di a bribi dati kan bow a tapoe, noiti ete no ben de so dipi. Wi abi a heri Wortoe foe Gado, na eksempel foe Jesus Krestes èn en salfoe bakaman, na jepi foe miljoenmiljoen brada nanga sisa na jeje fasi, èn na jepi foe Gado santa jeje na so wan fasi di noiti wi ben si a fesi. Tokoe, wi e doe boen foe ondrosoekoe a bribi foe wi finifini èn teki stap foe meki a kon moro tranga ala di wi man doe disi ete.
20. A ben sa fiti foe poti sortoe aksi gi wisrefi?
20 ’O, mi e bribi taki disi na a waarheid’, kande joe e taki. Ma o tranga a bribi foe joe de? Aksi joesrefi: ’A hemel Kownoekondre foe Jehovah de wan troetroe sani gi mi neleki fa wan libisma tiri de dati gi mi? Mi e erken èn e horibaka dorodoro gi Jehovah organisâsi di wi kan si nanga a Tiri Skin foe na organisâsi? Mi kan si nanga ai foe bribi, taki den e tjari den nâsi makandra now go na a kriboi posisi gi Armagedon? Mi kan teki a bribi foe mi gersi nanga di foe na „bigi wolkoe foe kotoigi” di den e kari na ini Hebrewsma kapitel 11?’ — Hebrewsma 12:1; Openbaring 16:14-16.
21. Fa bribi e boeweigi den sma di abi en, èn fa den e kisi blesi? (Teki so srefi den wortoe foe na faki na tapoe blz. 26.)
21 Den sma di abi bribi di abi en fondamenti a tapoe waarheid, e handri. Neleki na ofrandi di Abel ben tjari èn di Gado ben feni boen, na so den ofrandi foe den foe prèise Gado, e plisi En (Hebrewsma 13:15, 16). Neleki Noa, wan preikiman foe regtfardikifasi, di ben gi jesi na Gado, na so den e doe moeiti foe abi wan regtfardiki libi nanga waka leki kownoekondre preikiman (Hebrewsma 11:7; 2 Petrus 2:5). Neleki Abraham, na so den sma nanga bribi di abi en fondamenti tapoe waarheid, e gi jesi na Jehovah awansi moeilekhèit e miti den èn den de srefi na ondro den moro hebi omstandigheid di lai nanga tesi (Hebrewsma 11:17-19). Neleki Jehovah getrow foetoeboi foe owroeten, na so den sma nanga bribi na ini a ten disi e kisi foeroe blesi èn na lobi hemel Tata foe den e sorgoe gi den. — Mateus 6:25-34; 1 Timoteus 6:6-10.
22. Fa bribi kan kon moro tranga?
22 Efoe joe na wan foetoeboi foe Jehovah, ma joe e si taki a bribi foe joe swaki tapoe wan toe kontren, dan san joe kan doe? Meki a bribi foe joe kon moro tranga, foe di joe e studeri Gado Wortoe fajafaja èn foe di a mofo foe joe meki den watra foe waarheid di foeroe joe ati, kon a tapoe (Odo 18:4). Efoe joe no e meki a bribi foe joe kon tranga doronomo, a sa kan kon swaki, inaktief, èn kan dede srefi (1 Timoteus 1:19; Jakobus 2:20, 26). Abi na fasti bosroiti taki disi no pasa noiti nanga a bribi foe joe. Aksi Jehovah foe jepi joe, foe di joe e begi: „Jepi mi pe mi abi bribi fanowdoe!” — Markus 9:24.
San na den piki foe joe?
◻ San na bribi?
◻ Foe san-ede bribi no kan de aparti foe waarheid nanga santa jeje?
◻ Fa Jesus Krestes ben tron na Sma di e meki wi bribi kon boen dorodoro?
◻ Foe san-ede wi moesoe ondrosoekoe finifini o tranga a bribi foe wi de?
[Faki na tapoe bladzijde 26]
DEN SMA DI ABI BRIBI...
◻ E taki foe Jehovah. — 2 Korentesma 4:13.
◻ E doe wroko leki den di foe Jesus. — Johanes 14:12.
◻ De wan fonten foe gi trawan deki-ati. — Romesma 1:8, 11, 12.
◻ E wini grontapoe. — 1 Johanes 5:5.
◻ No abi reide foe frede. — Jesaja 28:16.
◻ Den feni den boen foe kisi têgo libi. — Johanes 3:16.