„Jepi mi pe mi abi bribi fanowdoe!”

„Na papa foe na jongoe pikin . . . ben taki: ’Mi abi bribi! Jepi mi pe mi abi bribi fanowdoe!’” — MARKUS 9:24.

1. San ben meki wan papa bari taki „Jepi mi pe mi abi bribi fanowdoe”?

A PAPA foe wan boi di wan ogri jeje ben de na en tapoe, ben tanapoe a fesi Jesus Krestes. Fa na man dati ben angri foe en jongoe pikin ben sa kon betre! Den disipel foe Jesus ben mankeri nofo bribi foe jagi na ogri jeje poeroe tapoe a boi, ma na papa ben bari taki: „Mi abi bribi! Jepi mi pe mi abi bribi fanowdoe!” Nanga jepi foe krakti di Jesus ben kisi foe Gado, a ben jagi na ogri jeje komoto, èn sondro degedege a ben meki a bribi foe na boi papa kon moro tranga. — Markus 9:14-29.

2. Na sortoe toe fasi kresten no e sjen, ini a tori foe bribi?

² Neleki na boi dati papa di ben abi howpoe, na so wan loyaal foetoeboi foe Jehovah no e sjen foe taki: „Mi abi bribi!” Spotoeman kan weigri foe erken na krakti foe Gado, na troefasi foe en Wortoe èn srefi taki Gado de troetroe. Ma troe kresten de klari foe taki, dati den abi bribi na ini Jehovah Gado. Tokoe, te den e taki den wawan nanga den hemel Tata na ini begi, den srefi sma disi kan begi fajafaja: „Jepi mi pe mi abi bribi fanowdoe!” Disi den e doe toe sondro foe sjen, foe di den sabi taki srefi den apostel foe Jesus Krestes ben begi: „Gi oenoe moro bribi.” — Lukas 17:5.

3. San de wan moi sani foe si na a fasi fa Johanes ben gebroiki na wortoe „bribi” na ini en evangelium, èn foe san-ede disi ben fiti?

³ Spesroetoe den kresten Griki Boekoe abi foeroe foe taki foe bribi. Foe taki en leti, na evangelium foe Johanes e gebroiki difrenti Griki wortoe di ben abi foe doe nanga „bribi”, moro leki 40 procent moro foeroe leki den dri tra evangelium makandra. Johanes ben poti krakti a tapoe taki na abi foe bribi no de nofo; foe sori bribi de toemoesi prenspari. Di a ben skrifi foe disi na wan ten foe 98 G. T., a ben si den froegifti langa anoe foe na fadon di sma ben fadon komoto a bribi, di ben e langa ensrefi go foe kisi den kresten di ben de swaki ini bribi (Tori foe den Apostel 20:28-30; 2 Petrus 2:1-3; 1 Johanes 2:18, 19). So boen a ben de prenspari foe sori bribi, foe boeweisi disi nanga wroko foe a gi di wi e gi wisrefi ini a dini foe Gado. Moeilek ten ben de a wi fesi.

4. Foe san-ede no wan sani de di den sma di abi bribi no kan doe?

⁴ Bribi e meki taki kresten man foe kakafoetoe gi ala problema. Jesus ben taigi den disipel foe en taki efoe den ben abi „bribi di ben bigi leki wan mosterdsiri”, dan no wan sani ben sa de di den no ben sa man doe (Mateus 17:20). Na a fasi dati, a ben poti prakseri tapoe a krakti foe bribi, wan froktoe foe santa jeje. Na so fasi Jesus ben poti krakti, no tapoe san libisma man doe, ma tapoe san Gado jeje noso en wroko krakti man doe. Den sma di e kisi tiri foe en no e meki moeilekhèit kon de a bigi foe wan ipi santi èn problema kon de leki bergi. Foe di den e handri akroederi na koni di na jeje foe Gado e gi den, meki dati e jepi den foe si sani na den joisti presi. Srefi serjoesoe problema e krempi gowe te den kon ondro na krakti foe bribi di e gi horibaka gi den. — Mateus 21:21, 22; Markus 11:22-24; Lukas 17:5, 6.

Begi taki bribi no e mankeri

5-7. (a) Sortoe warskow wortoe di e go foe bribi Jesus ben taki di a ben poti na Memrefesa? (b) Fa na bribi foe Petrus ben meki a ben man gi tranga na en brada?

⁵ Na ini 33 G. T., Jesus ben hori na Paskafesa nanga den disipel foe en foe na lasti tron. Dan baka di a seni Judas Iskariòt gowe, a ben seti na Memrefesa èn a ben taki: „Mi e meki wan froebontoe nanga oenoe, neleki fa mi Tata ben meki wan froebontoe nanga mi, foe wan kownoekondre . . . Simon, Simon, loekoe! Satan wani foe teki oenoe gi ensrefi foe wai oenoe leki aleisi. Ma mi ben begi fajafaja gi oenoe foe no lasi bribi èn te oenoe drai go baka, dan foe oenoe sei baka, oenoe meki na bribi foe oen brada kon tranga.” — Lukas 22:28-32.

⁶ Jesus ben begi taki Simon Petrus no ben sa lasi bribi. Ala di Petrus ben bari nanga toemoesi foeroe froetrow na ini ensrefi, taki noiti a ben sa taki dati a no sabi Jesus, tokoe a ben doe disi dri tron sjatoe baka dati (Lukas 22:33, 34, 54-62). Di den ben naki na Herder trowe na ini dede, wan sani di den ben taki foe en na fesi, dan den skapoe ben panja (Sakaria 13:7; Markus 14:27). Ma, di Petrus kisi ensrefi foe na fadon di a ben fadon go na ini a trapoe foe frede, a ben gi den jeje brada foe en tranga. A ben tjari na tori kon a fesi foe poti wan tra man ini a presi foe Judas Iskariòt, di no ben de getrow. Di Petrus ben handri leki na takiman foe den apostel na a Pinksterfesa foe 33 G. T., a ben gebroiki na fosiwan foe „den sroto” di Jesus ben gi en, èn ben opo na pasi gi den djoe foe tron memre foe na Kownoekondre (Mateus 16:19; Tori foe den Apostel 1:15–2:41). Satan ben wani teki den apostel gi ensrefi foe wai den leki aleisi, ma Gado ben hori ai a tapoe taki den no ben mankeri bribi.

⁷ Prakseri fa Petrus ben firi di a ben jere Jesus e taki: „Mi ben begi fajafaja gi oenoe foe oenoe no lasi bribi”. Go prakseri pikinso! Petrus Masra èn Meester ben begi fajafaja foe den no mankeri bribi. Èn a ben mankeri bribi, noso ben lasi bribi. Foe taki en leti, na a dei foe na Pinksterfesa, Petrus nanga trawan ben tron den fosi sma di ben kisi salfoe nanga santa jeje foe tron Gado pikin na jeje fasi, nanga na howpoe foe de kompe-erfgenaam nanga Krestes ini hemel glori. Ala di santa jeje ben e wroko a den tapoe na wan fasi di sma no ben sabi a fesi ete, dan den ben kan sori ini den libi den froktoe foe a jeje, pe bribi ben de na ini toe, leki noiti a fesi. Fa disi ben de wan toemoesi moi piki tapoe a begi foe den: „Gi oenoe moro bribi!” — Lukas 17:5; Galasiasma 3:2, 22-26; 5:22, 23.

Waka miti tesi a wi fesi nanga jepi foe bribi

8. Sortoe biten warskow na organisâsi ben gi wi ini a tori foe na kontroe foe 1 Tesalonikasma 5:3?

⁸ Leki wan kontroe foe bijbel profeititori, heri esi wi sa jere na kari foe „Vrede nanga seikerfasi!” (1 Tesalonikasma 5:3) Disi sa kan poti a bribi foe wi na ondro tesi? Ija, foe di wi de ini kefar taki den onfroewakti boen bakapisi di den nâsi abi kande foe tjari vrede kon, kan kisi wi. Ma wi no sa abi prati ini a jeje foe den bariwrokoman disi foe a sortoe vrede disi, efoe wi e hori na prakseri, taki Jehovah Gado no e gebroiki no wan foe den organisâsi foe na grontapoe disi foe doe dati. A abi en eigi fasi foe tjari troe vrede, èn dati de soso nanga jepi foe en Kownoekondre na ondro Jesus Krestes. Foe dati-ede, awansi sortoe boen bakapisi den nâsi kan abi ini a tjari foe vrede, tokoe a sa de foe wan sjatoe pisiten èn wan sani di de soso na tapoesei. Foe jepi wi foe tan na ai ini a tori disi, „na getrow èn koni srafoe” sa tan tjari warskow biten kon a doro, so taki na asranti meki bekènti foe „Vrede nanga seikerfasi” di den nâsi foe na owroe seti foe sani disi o doe, no sa kisi den foetoeboi foe Jehovah onfroewakti. — Mateus 24:45-47.

9. Foe san-ede na pori foe Babilon na Bigiwan sa aksi deki-ati èn bribi foe wi sei?

⁹ Na bari foe „vrede nanga seikerfasi!” sa de na marki gi ’wan pori di sa kon wantronso’ a tapoe Babilon na Bigiwan, na grontapoe makti foe falsi fasi foe anbegi (Openbaring 17:1-6; 18:4, 5). Disi so srefi sa poti na kresten bribi na ondro tesi. Jehovah Kotoigi sa tan tanapoe kánkan ini bribi, ala di falsi fasi foe anbegi e fadon a pisipisi? A no de foe taki, dati den sa doe dati. Na sani disi di sa pasa — di e kon onfroewakti èn di foeroe sma no e froestan — no sa de wan sani di libisma sa doe. Sma moesoe sabi taki troetroe a de a kroetoe foe Jehovah, foe santa en nen di falsi fasi foe anbegi ben doti so langa kaba. Ma fa sma sa sabi disi sondro foe wan sma taigi den? Èn soema boiti Kotoigi foe Jehovah, wi kan froewakti foe froeteri den dati? — Teki gersi nanga Esekièl 35:14, 15; Romesma 10:13-15.

10. Fa a fadon go foe Gòg a tapoe na pipel foe Jehovah sa de wan tesi tapoe wi bribi toe?

¹⁰ Salfoe Kotoigi foe Jehovah èn den kompe foe den nanga wan grontapoe howpoe, ben abi na deki-ati di de fanowdoe foe froeteri trawan foe Jehovah kroetoe di de foe kon, tapoe Babilon na Bigiwan èn na tra pisi foe Satan seti foe sani (2 Korentesma 4:4). Satan sa tjari den grontapoe legre foe en kon makandra foe doe wan bigi ròs tapoe Gado pipel ini en ròl leki Gòg foe Magòg, di de wan simbôl foe a lagi posisi di a abi now. Na bribi ini a krakti foe Gado foe kibri den Kotoigi foe Jehovah, sa kisi tesi. Ma wi kan abi bribi, so leki fa Gado Wortoe ben froeteri a fesi, taki Jehovah sa froeloesoe en pipel. — Esekièl 38:16; 39:18-23.

11, 12. (a) San ben meki a froeloesoe foe Noa nanga en ososfamiri de seiker sani na a ten foe a Froedoe? (b) Foe sortoe sani wi no sa abi foe broko wi ede na ini a bigi banawtoe?

¹¹ Na ini a ten disi, wi no sabi finifini fa Jehovah sa kibri en pipel na ini a „bigi banawtoe”, ma disi no de wan reide foe degedege taki a no sa doe so (Mateus 24:21, 22). Na situwâsi foe den disiten foetoeboi foe Gado, sa de leki a sitiwâsi pe Noa nanga en osofamiri ben de na ini na a ten foe a Froedoe. Ala di den ben de srotosroto na ini na ark, èn lontoe den a watra di ben pori sani ben e naki na ala sei, dan kande den ben de nanga foeroe lespeki di moksi nanga frede, foe di den ben si na bigi demo disi foe Gado krakti èn den ben sa moesoe foe begi fajafaja. Bijbel no e sori taki den ben broko-ede èn ben aksi densrefi: ’Na ark boen troetroe foe pasa den krakti di e pori sani? Wi abi nofo njansani foe tan na libi te leki na Froedoe kaba? Wi sa man kakafoetoe gi den omstandigheid di sa kenki na grontapoe baka ten?’ San ben pasa baka dati, e boeweisi, taki den sortoe broko-ede dati no ben sa abi no wan enkri fondamenti.

¹² Efoe Noa nanga en osofamiri ben kan de seiker foe kisi froeloesoe, dan den ben moesoe sori bribi. Disi ben wani taki, dati den ben moesoe waka baka den bodoi èn a tiri foe na santa jeje foe Gado. Na ini a bigi banawtoe, a sa de netso fanowdoe taki wi e waka baka na tiri foe na santa jeje èn e gi jesi na den ordroe di Jehovah e gi nanga jepi foe en organisâsi. Dan wi no sa abi no wan reide foe wi broko-ede èn aksi wisrefi: ’Fa den sa satisferi den fanowdoe foe wi na skin fasi èn na jeje fasi? Sortoe sani den sa seti gi owroe sma noso gi den sma di abi spesroetoe datra jepi noso dresi fanowdoe? Fa Jehovah sa meki wi man pasa libilibi go na ini a njoen grontapoe?’ Nanga tranga bribi, ala den loyaal foetoeboi foe Jehovah sa libi ala sani abra ini en bekwaam anoe. — Teki gersi Mateus 6:25-33.

13. Foe san-ede wi sa abi wan bribi fanowdoe leki di foe Abraham te na bigi banawtoe bigin?

¹³ Te na bigi banawtoe bigin, dan sondro degedege a bribi foe wi na ini Gado sa kon tranga srefisrefi. Te foe kaba, wi sa si taki Jehovah e doe san a ben taki a ben o doe. Nanga wi eigi ai wi sa si a tjari di a o tjari kroetoe kon! Ma wisrefi sa abi nofo bribi foe bribi taki ala di Gado e pori den ogri sma, taki a sa kibri en pipel? Wi sa de leki Abraham di ben abi bribi taki ’na Kroetoeman foe na heri grontapoe sa doe san reti’, èn no sa pori den reti-atisma makandra nanga den ogri-atisma? — Genesis 18:23, 25.

14. Sortoe aksi sa moesoe meki wi ondrosoekoe wi bribi finifini èn wroko tranga foe meki en kon moro tranga?

¹⁴ Fa a de prenspari, taki now wi bow a bribi foe wi! Now di na kaba foe na ogri seti foe sani disi de so krosibei, meki wi gi Gado jeje pasi foe boeweigi wi foe sori „santa fasi foe tjari wisrefi èn doe foe a gi di wi e gi wisrefi ini a dini foe Gado” (2 Petrus 3:11-14). Dan prakseri di e gi sma broko-ede no sa trobi wi na ini a bigi banawtoe, prakseri leki den wan disi: ’Mi de seiker taki mi o kisi kibri foe Jehovah? Mi ben kan doe moro ini en dienst? Mi ben wroko tranga nofo troetroe foe weri „na njoen sma di wan sma moesoe de”? Mi na a sortoe sma di Jehovah wani ini en njoen grontapoe?’ Den sortoe aksi disi di poti wi na denki sa meki wi ondrosoekoe a bribi foe wi finifini èn go wroko tranga na en foe meki a kon moro tranga nownow! — Kolosesma 3:8-10.

Bribi foe meki wi kon betre

15. San Jesus ben froeteri den sma sontron di a ben meki kon betre, ma foe san-ede disi no e hori baka gi na disiten meki sma kon betre nanga jepi foe bribi?

¹⁵ Jesus no ben doe den wroko foe en foe meki sma kon betre soso gi sma nanga bribi (Johanes 5:5-9, 13). So boen, san a ben doe no e horibaka gi na leri, di no de foe feni na ini bijbel, foe meki sma kon betre nanga jepi foe begi. A de troe, taki sontron Jesus ben taigi den sma di a ben dresi: „Joe bribi ben meki joe kon betre” (Mateus 9:22; Markus 5:34; 10:52; Lukas 8:48; 17:19; 18:42). Ma te a ben taki disi, a ben sori go nomo na wan waarheid di de krin foe si: Efoe den sma disi di ben njanpina foe wan siki, ben mankeri bribi na ini a man di Jesus ben man foe dresi den, dan den no ben sa kon srefisrefi na en foe meki a dresi den.

16. Sortoe programa foe meki sma kon betre Jesus e tiri na ini a ten disi?

¹⁶ Na ini a ten disi, Jesus Krestes e tiri wan programa foe meki sma kon betre na jeje fasi, èn moro leki 4.000.000 sma e doe san den moesoe doe foe abi wini foe dati. Leki Kotoigi foe Jehovah, den e njanboen foe gosontoe na jeje fasi, awansi sortoe problema foe na skin den abi kande. Salfoe kresten a mindri den abi wan hemel howpoe, èn den e ’hori den ai tapoe têgo sani di sma no kan si’ (2 Korentesma 4:16-18; 5:6, 7). Èn kresten nanga wan grontapoe howpoe e loekoe go a fesi na a toemoesi moi wroko foe meki sma kon betre na skin fasi èn dati sa feni presi ini Gado njoen grontapoe.

17, 18. Foe sortoe seti foe Jehovah den e taki foe en na ini Openbaring 22:1, 2, èn fa wi abi bribi fanowdoe foe abi wini foe en?

¹⁷ Na apostel Johanes e sori go na den seti foe Gado foe kisi têgo libi nanga den wortoe disi ini Openbaring 22:1, 2: „A ben sori mi wan liba foe watra foe libi, krin leki kristal di ben lon komoto foe na kownoestoeroe foe Gado èn foe na Pikin Skapoe na a mindri foe na bradi strati foe en. Na disi sei èn na a tra sei foe na liba, bon foe libi ben de, di ben e gi froktoe twarfoe tron, ibri moen den ben gi a froktoe foe den. Den wiwiri foe den bon ben de foe dresi den nâsi.” Den „watra foe libi” wani taki Gado Wortoe foe waarheid èn ibri tra seti foe Jehovah foe meki libisma di e gi jesi kon boen baka foe sondoe nanga dede èn gi den na grani foe têgo libi na tapoe a fondamenti foe Jesus froeloesoe ofrandi (Efeisesma 5:26; 1 Johanes 2:1, 2). Ala di den de na grontapoe, den 144.000 salfoe bakaman foe Jesus e dringi foe den seti foe Gado foe kisi libi nanga jepi foe Krestes èn den e kari den „bigi bon foe regtfardikifasi” (Jesaja 61:1-3; Openbaring 14:1-5). Den ben meki foeroe froktoe na jeje fasi na grontapoe. Leki sma di o kisi opobaka na ini hemel, dan ini a ten foe Krestes doesoen jari tiri den sa abi wan prati foe gi sma den seti foe na froeloesoe ofrandi, di sa dini „foe dresi den nâsi” foe sondoe nanga dede.

¹⁸ O moro tranga wi bribi ini den seti disi foe Gado de, o moro foeroe wi sa de klariklari foe waka baka na tiri foe en jeje foe meki gebroiki foe den seti disi. Volmaaktifasi foe na skin sa kon sondro degedege te wan sma e sori bribi ini Krestes èn e go na fesi na jeje fasi. Ala di wan sma na wan wondroefasi sa kon betre foe bigi mankeri na skin, tokoe a sa kon moro krosibei na a volmaaktifasi te a e doe san boen. Doronomo a sa meki gebroiki foe den seti foe Gado foe kon betre nanga jepi foe Krestes srakti-ofrandi. So boen bribi sa abi krakti tapoe a kon betre foe wi èn a kon volmaakti foe wi na skin fasi.

„Kisi froeloesoe nanga jepi foe bribi”

19. Foe san-ede a de prenspari foe tan tanapoe kánkan ini bribi?

¹⁹ Fa a de prenspari taki den foetoeboi foe Jehovah tan tanapoe kánkan ini bribi te leki na moesoedei foe Gado njoen grontapoe sa jagi na doengroe foe na disiten ogri grontapoe gowe foe têgo! Den sa trowe sma „sondro bribi” go na ini „na se foe faja nanga swafroe”, na di foe toe dede. Disi sa pasa, baka na lasti tesi na a kaba foe Krestes doesoen jari tiri (Openbaring 20:6-10; 21:8). Fa a sa de wan blesi gi den sma di e go doro foe sori bribi èn di sa tan na libi foe njanboen foe wan tamara sondro kaba!

20. Fa 1 Korentesma 13:13 sa wani taki wan spesroetoe sani na a kaba foe Krestes doesoen jari tiri?

²⁰ Dan den wortoe disi foe Paulus na ini 1 Korentesma 13:13 sa wani taki wan spesroetoe sani: „Ma now bribi, howpoe, lobi, den dri disi e tan; ma na moro bigiwan foe disi na lobi.” A no sa de moro langa fanowdoe foe wi sori bribi taki na profeiti pramisi na ini Genesis 3:15 sa kon de wan troe sani noso foe howpoe taki a sa kontroe. Dati sa pasa kaba. Leki sma di e hori den soifri retifasi, wi sa go doro foe howpoe tapoe Jehovah, abi bribi na ini en nanga en Manpikin èn lobi den leki den sma di ben meki na profeititori disi kon troe. Boiti dati, dan dipi lobi èn troetroe tangi gi na froeloesoe foe wi sa tai wi na Gado ini wan gi di wi e gi wisrefi ini a dini foe en na wan fasi di no sa broko noiti èn di e tan foe têgo ala ten. — 1 Petrus 1:8, 9.

21. San wi ini a ten disi moesoe doe foe „kisi kibri nanga jepi foe bribi”?

²¹ Nanga jepi foe en organisâsi di joe kan si, Jehovah ben gi toemoesi moi seti foe tranga wi bribi. Meki boen gebroiki foe den alamala. Go doronomo na den konmakandra foe Gado pipel èn teki prati na den (Hebrewsma 10:24, 25). Studeri en Wortoe èn den kresten poeblikâsi fajafaja. Aksi Jehovah tangitangi foe en santa jeje (Lukas 11:13). Waka baka na bribi foe den wan di nanga sakafasi e teki fesi ini na gemeente (Hebrewsma 13:7). Kakafoetoe gi tesi foe grontapoe (Mateus 6:9, 13). Ija, èn meki a persoonlijk matifasi foe joe nanga Jehovah kon moro boen na ibri fasi di joe man. Na tapoe foe dati, go doro foe sori bribi. Dan joe sa de a mindri den sma di e plisi Jehovah èn di e kisi froeloesoe, bika Paulus ben taki: „Nanga a no-froedini boen-atifasi disi oenoe kisi froeloesoe nanga jepi foe bribi; èn disi oenoe no kisi foe oensrefi, a de wan presenti foe Gado.” — Efeisesma 2:8.

San na den piki foe joe?

◻ Sortoe tesi foe bribi de leti a wi fesi?

◻ Na sortoe toe fasi a bribi foe wi kan meki wi kon betre?

◻ Ini akroederi nanga 1 Petrus 1:9, olanga wi moesoe tan sori bribi?

◻ Sortoe seti wi abi foe meki a bribi foe wi kon moro tranga?

[Prenki na tapoe bladzijde 28]

Joe e firi na joesrefi na fanowdoe foe kisi moro bribi neleki na papa di Jesus ben meki a boi foe en kon betre?

[Prenki na tapoe bladzijde 30]

Bribi leki di foe Noa èn en osofamiri sa de fanowdoe foe pasa na„ bigi banawtoe” libilibi