Foe san-ede Gado ben de so nanga pasensi?
LOEKOE na a sari fesi foe wan pikin di e dede foe angri. Loekoe, a mangri skin nanga a bere di sweri. Prakseri fa a pikin de sondro foe sabi san a moesoe doe foe kisi a njanjan di a abi fanowdoe èn loekoe na leigi komki di a e hori. Kande en mama e loekoe nanga ai di fadon go na ini, en eigi fesi de wan takroe prenki taki a de sondro howpoe. Dan proeberi foe dwengi joe firi foe sari, èn foe feti nanga joe watra-ai.
A situwâsi disi de miljoenmiljoen tron foe si na ini a 6 miljoen fokanti kilometer foe a kontren pe angriten de èn di sma sabi leki a Sahel. A waka foe a bigin go na a kaba abra 4800 km dwarsi abra na pisi foe Afrika di de na a zuidsei foe na Sahara Sabana, komoto foe Senegal di de na a Atlantik Sjoro te go miti Etiopia na a Redi Se. A no de foe taki, dati angri e kroipi go miti foeroe sma na ini tra kondre. Na Grontapoe Gesontoe Organisâsi e gi rapport taki 1.1 miljard sma na a heri grontapoe lontoe e siki tranga noso no e njan boen.
A no de foe taki, dati angri na soso wan foe den sani di e pina libisma. Sma e doti a grontapoe, èn a e wroko na tapoe wi alamala. Politiek sistema e keur onregtfardiki fasi nanga feti boen, san e tjari sari nanga dede kon gi foeroe sma. Foe san-ede Gado e gi pasi foe den sortoe sani disi pasa? A e broko-ede nanga wi?
Gado e broko-ede!
Wi Mekiman e broko-ede nanga wi. Foeroe boeweisi de foe disi èn foe a man di a man foe meki sani wroko makandra foe a boen foe wi èn foe a wanfasi na ini en heri mekisani. Foe eksempel, loekoe a prenki di de djaso foe wan wasiwasi di e go na wan bromki foe wan froktoebon. Na wasiwasi abi a bromki fanowdoe, foe di a abi na soekroewatra fanowdoe leki njanjan. Na a tra sei a bon abi na poeiri fanowdoe di de tapoe na bromki foe wan srefi sortoe bon, di a wasiwasi e tjari nanga en skin. Na a fasi disi, a bromki e kisi a poeiri, so taki a kan meki froktoe. A no ala froktoebon e kisi en poeiri na a fasi disi, ma Gado seti sani so, taki ini a kefal disi wan spesroetoe wrokomakandra e feni presi. Èn a bakapisi foe en boen-atifasi na den froktoe, di wi kan njan den nanga prisiri èn di abi winimarki gi wi.
A wasiwasi srefi de wan pisi foe wan ipi foe 30.000 wasiwasi. Sonwan e hori wakti gi na wasiwasigodo, ala di trawan e krin en èn e meki loktoe go na ini. Trawan baka e kibri a soekroewatra èn poeiri di komoto foe den bromki, e gi den pikin wasiwasi foe den njanjan, noso e go soekoe njoen presi pe soekroewatra de. Gado srefi seti sani so, taki wi e abi wini foe dati te den sortoe wasiwasi disi, di e abi en so druk, e meki switi oni di boen foe a skin èn di e switi na tapoesei foe na ini-mofo.
Na wondroe foe wrokomakandra a mindri wasiwasi nanga prani, èn a mindri den wasiwasi srefi de soso wán foe den foeroe boeweisi taki, na wan volmaaktifasi, a Mekiman kan meki sani di de a libi wroko nanga makandra. Foe taki leti, Gado a no wan Gado foe broeja, ma foe vrede” (1 Korentesma 14:33). Foe san-ede dan a ben gi pasi foe a libismafamiri ben tan libi na ini so wan broeja, nanga rampoe leki bakapisi gi someni sma? Efoe Gado e broko-ede nanga wi, foe san-ede a wakti so langa foe meki a situwâsi disi kon reti baka? Foe troe, foe san-ede Gado de so nanga pasensi?
Gado Wortoe, a bijbel, e piki den sortoe aksi disi. A aparti boekoe disi e froeteri wi taki Jehovah Gado abi pasensi foe wan boen reide ede. San de na reide dati? Èn olanga moro a pasensi foe Gado sa hori ete?