Froetrow na tapoe Jehovah foe meki sani gro
1 „Disi na a fosi leisi di mi ben ondrofeni na aparti prisiri foe jepi opo wan njoen gemeente. Moro leki toe jari foe fajafaja wroko ben de fanowdoe, doronomo begi èn froetrow na tapoe Jehovah di ’e meki sani gro’”. Na so wan opregti pionier ben skrifi di ben leri taki a de fanowdoe foe froetrow na tapoe Jehovah foe meki sani gro (1 Kor. 3:5-9). Te wi e soekoe sma di abi wan jesi gi jeje sani, dan wi abi a jepi foe Gado fanowdoe toe efoe wi wani meki a diniwroko foe wi moesoe tjari froktoe.—Odo 3:5, 6.
2 Sorgoe de fanowdoe foe meki sani gro: Wi moesoe sorgoe gi a siri foe waarheid foe meki disi gro. Nofotron a e gi boen bakapisi te wi e go baka wán noso toe dei baka a fosi fisiti. Sori wan waran fasi èn abi switifasi. Meki a tra sma firi korostoe. Meki a tra sma taki wan sani toe. Meki a sma kon sabi joe, èn sori taki joe abi belangstelling gi en leki wan sma.
3 Na ini juli te nanga augustus, wi e poti prakseri foe pristeri difrenti brochure gi den sma di wi e miti. Ma wi moesoe go doro toe na den sma pe wi feni belangstelling èn na den presi pe wi ben libi brochure na baka. Wi e doe disi te wi e tjari gobaka èn e pristeri bijbelstudie (Mat. 28:19,20). Foe man doe disi, wi kan gebroiki a San Gado e aksi-brochure foe man bigin bijbelstudie. Kande joe sa feni taki den fo idea di e kon now, sa jepi joe.
4 Te joe ben taki nanga wan sma di ben broko en ede nanga a fasi fa a grontapoe e kon moro takroe, dan joe ben sa kan opo a takimakandra baka foe di joe e taki:
◼ „Mi denki taki, neleki mi, joe e broko joe ede nanga a go di a libisma libimakandra e go na baka na moreel sei. Wi e jere den takroe njoensoe foe ogri di e doe nanga tranga na ini osofamiri, di abi leki bakapisi taki sma e meshandri den pikin, den papa nanga mama, èn den trowpatna. Èn a sori taki foeroe sma ben o lei noso foefoeroe soso foe man satisferi den eigi lostoe. Joe denki taki Gado e broko en ede nanga a fasi fa sma e libi? [Gi okasi foe piki.] Gado seti spesroetoe markitiki di sma moesoe libi akroederi den, èn troetroe den no de wan hebi gi wi.” Leisi 1 Johanes 5:3. Baka dati, pristeri a San Gado e aksi-brochure, èn opo en na lès 10. Leisi a fosi paragraaf. Poti prakseri na tapoe den wortoe nanga pisi di skrifi skoinsi na a bigin foe paragraaf 2-6, èn aksi na ososma sortoe ogridoe a e denki taki de moro takroe gi a libimakandra. Leisi a paragraaf di abi foe doe nanga dati èn loekoe wán noso toe tekst te na okasi de. Leisi leki lasti paragraaf 7, èn meki mofo foe go baka foe taki moro fara.
5 Na den sma di e broko den ede nanga den osofamiri, joe ben kan taki so wan sani:
◼ „Joe denki taki a de reidelek foe froewakti taki a Kriaman ben sa gi wi den wrokosani di wi abi fanowdoe foe man bow wan boen osofamiri libi?” Gi okasi foe piki. Bigin nanga a San Gado e aksi-brochure, go na lès 8, èn froeklari taki a abi bijbel gronprakseri gi ibri memre foe na osofamiri. Aksi en foe sori fa foe gebroiki a brochure makandra nanga bijbel foe man abi moro foeroe wini foe disi. Gebroiki den bodoi di gi na tapoe bladzijde 2 foe a brochure. Sreka sani foe go baka èn foe go doro nanga a studie foe a lès, noso efoe joe ben klari en, sreka sani foe studeri wan tra lès di na ososma srefi teki na ini a brochure.
6 Disi na wan fasi fa joe ben kan pristeri a sma wan bijbelstudie wantewante. Sori a „San Gado e aksi”-brochure, èn taki:
◼ „A brochure disi abi wan heri boen lès di e taki foe den prenspari leri foe bijbel. Na tapoe ibri bladzijde joe sa feni piki na tapoe aksi di ben de wan problema gi libisma foeroe hondro jari kaba. Foe eksempre: San na a prakseri di Gado abi nanga grontapoe?” Go na lès 5 èn leisi den aksi na a bigin foe a lès. Aksi na ososma gi sortoe aksi a abi moro belangstelling, èn leisi dan a paragraaf noso den paragraaf di abi foe doe nanga na aksi, èn soekoe den tekst di fiti. Froeklari taki den joisti piki na tapoe den tra aksi de foe feni toe na a srefi makriki fasi. Aksi en foe kon baka foe taki nanga en foe wan tra aksi nanga piki.
7 Noso joe ben sa wani proeberi foe gebroiki wan moro makriki fasi foe bigin wan bijbelstudie, foe di joe e taki:
◼ „Joe ben sabi taki te joe e gebroiki wan toe miniti nomo, joe kan feni a piki na tapoe wan prenspari aksi di abi foe doe nanga bijbel? Foe eksempre, . . . ” Poti wan aksi dan di de na a bigin foe wan foe den lès na ini a brochure, wan di joe denki taki a sa hari a belangstelling foe a sma. Foe abi wan idea sortoe aksi joe ben sa kan poti, loekoe paragraaf 15 nanga 16 na ini na inlegvel foe Wi Kownoekondre Dienst foe maart 1997, di abi a titel „Teki deki-ati foe tjari gobaka”.
8 A prisiri di wi abi foe teki a tjalensi foe tjari gobaka èn foe hori bijbelstudie, abi foe doe nanga a de di wi de den „kompe wrokoman” foe Gado (1 Kor. 3:9). Te wi e wroko tranga foe sorgoe gi den sma pe wi feni belangstelling èn wi e froetrow na tapoe Jehovah foe meki sani gro, dan wi sa ondrofeni troetroe satisfaksi di no wan tra wroko kan gi.