Fa foe bigin wan studie nanga a San Gado e aksi-brochure
1 A njoensoe di wi e kisi foe jere na heri grontapoe e sori taki a brochure San Gado e aksi foe wi? na wan krakti wrokosani foe leri sma a waarheid. Ibri wiki, doesoendoesoen bijbelstudie e bigin foe a brochure disi. Joe ben man bigin èn hori wan bijbelstudie nanga a San Gado e aksi-brochure nanga boen bakapisi?
2 Ala di foeroe sma feni en makriki foe libi a brochure gi sma, tokoe a moeilek gi son sma foe sabi san den moesoe taki foe bigin a studie. Sortoe fasi trawan ben feni boen foe kan bigin wan bijbelstudie, te den ben gebroiki a San Gado e aksi-brochure? Den rai di e kon now, moesoe de wan jepi.
3 Aksi a sma efoe joe kan sori en fa a studie e hori: Te joe e go na wan sma a fosi leisi noso te a de wan gobaka, dan na presi foe aksi na ososma nomo efoe a wani wan bijbelstudie, wi kan sori en fa a bijbelstudie sa hori. Kande disi sa poeroe a denki di foeroe ososma e kisi taki den abi foe doe nanga wan dangratori, te den e jere a wortoe „studie” èn a sa poeroe a frede di den e frede gi dati. Efoe wi leri kaba fa foe sori sma fa a studie e hori, dan wi sa si taki nanga wan makriki inleiding wi kan bigin a studie wantewante.
4 A sroto na taki wi moesoe sreka wisrefi: A faja di wi abi foe bigin bijbelstudie abi langalanga foe doe nanga o boen wi sreka wisrefi. Efoe wi sreka na fesi, dan dati sa jepi wi foe no draidrai moro foe abi wan prati na a bijbelstudiewroko. Te wi e oefen a pristeri foe wi wan toe leisi, dan a sa de neleki takimakandra di wi abi ala dei, wi sa man taki soleki fa wi gwenti foe taki troetroe èn nanga wi eigi wortoe. Disi no sa jepi wi nomo foe no de spanspan, ma a sa jepi na ososma toe foe no firi froeferi.
5 Te joe e oefen, dan a sa de wan jepi foe loekoe o langa a pristeri foe joe sa de, so taki joe kan taigi na ososma o langa a sa teki foe sori en fa a studie e hori. Baka te wan brada e taigi a sma san na en nen, a e taki: „Mi kon na joe foe sori joe a bijbelstudie programa di wi abi èn joe no abi foe pai gi dati. A e teki feifi miniti nomo foe sori joe fa wi e hori en. Joe abi feifi miniti?” Joe kan sori a sma fa joe e hori a studie foe lès 1 foe a San Gado e aksi-brochure na ini feifi miniti. A no de foe taki, dati na ini a ten disi, joe kan leisi den tekst nomo di joe soekoe na fesi kaba, ma foe di joe kaba nanga a fosi lès na ini wan toe miniti nomo, na ososma abi na okasi foe kisi en fosi studie. Meki a sma sabi dan, taki te joe e kon baka foe studeri lès 2, joe sa teki 15 miniti nomo.
6 A sori taki a pristeri di e kon now e wroko boen:
◼ „Mi ben sa wani sori joe fa mi e gebroiki a brochure disi, San Gado e aksi foe wi? foe hori wan oso-bijbelstudie di makriki, ma di joe kan kaba heri esi. Foeroe sma si taki, na ini no moro leki 15 miniti wan wiki, 16 wiki langa, den prenspari bijbel aksi kisi wan piki di e satisferi den.” Sori en sjatoe a lijst nanga den tori foe a brochure disi. Go na lès 1, èn taki: „Efoe joe kan gi wi feifi miniti nomo, dan wi wani sori joe fa disi e go. Lès 1 abi leki nen: ’Fa joe kan kon sabi san Gado e aksi foe joe.’” Baka dati, leisi den dri aksi, èn froeklari san den nomroe na mindri aka wani taki. Leisi paragraaf 1, èn sori na ososma fa foe feni a piki. Joe kan aksi na ososma foe leisi paragraaf 2. Taki dan: „Now di joe sabi disi, fa joe ben sa piki na aksi disi? [Leisi na aksi ete wan leisi, èn gi na ososma na okasi foe gi piki.] Joe sa si taki tekst de di e go makandra nanga ibri paragraaf. Den tekst disi e sori wi go na a piki di bijbel e gi na tapoe den aksi disi. Foe eksempre, meki wi leisi 2 Timoteus 3:16, 17, èn loekoe efoe a e horibaka gi a piki di joe ben gi foe soema na a skrifiman foe bijbel.” Baka te joe leisi paragraaf 3, joe poti prakseri na tapoe na aksi èn joe leisi Johanes 17:3, dan sori na ososma sortoe sabi a kisi foe di a loekoe lès 1. Now joe kan go na lès 2 èn leisi a lasti aksi: „San na toe fasi di wi kan leri sabi Gado?” Aksi dan: „O ten joe ben sa abi so wan 15 miniti so taki wi kan doe lès 2 èn feni a piki?”
7 A de prenspari foe hori a takimakandra sempel èn foe preise na ososma te dati kan. Te joe wani sreka sani foe kon wan tra leisi baka, dan na presi foe aksi na ososma efoe a wani go doro, gi en deki-ati foe doe den srefi sani gi a tra lès. Meki a sabi taki joe ben sa prisiri foe kon baka wan tra leisi. Son preikiman aksi foe doe a lès na telefon efoe a ben de moeilek foe go baka na a sma. Joe kan gi a studenti deki-ati toe foe poti a brochure na wan boen presi pe a sa man feni en makriki te joe e kon a tra leisi.
8 Abi wan fasti bosroiti: Ala di a sroto foe abi boen bakapisi na a sreka di wi e sreka wisrefi, tokoe wi moesoe abi a fasti bosroiti foe go doro. Foe leri sma wan lès na ini wan toe miniti nomo kan de wan tjalensi, so boen, abi a fasti bosroiti foe oefen a pristeri so foeroe leisi leki a de fanowdoe, so taki joe kan taki grati te joe e sori a sma fa a studie e hori. Proeberi foe sori ibriwan sma fa wi e hori wan studie te joe e miti den na a doro, te joe e gi kotoigi na wan informeel fasi, èn te joe e gi kotoigi na telefon. Efoe a moeilek gi joe foe bigin wan bijbelstudie, no lasi-ati. Efoe joe wani abi boen bakapisi te joe e bigin wan bijbelstudie dan joe moesoe abi wan fasti bosroiti èn wani foe gi trawan a waarheid troetroe.—Gal. 6:9.
9 Efoe joe e gebroiki den rai disi, dan joe srefi kan abi a grani toe foe jepi wan sma kon na tapoe a pasi foe libi, foe di joe e bigin èn e hori wan bijbelstudie na ini a San Gado e aksi-brochure.—Mat. 7:14.