Yu e gebroiki a San Gado e aksi-brochure fu opo bijbelstudie?
1 Fa yu e si den bun takimakandra di yu abi doronomo nanga wan sma di wani sabi moro fu Bijbel? We, efu den tori fu den takimakandra disi teki fu wan fu den publikâsi di wi e gebroiki fu studeri nanga sma, dan te yu e luku en bun, yu e studeri nanga a sma dati kaba, srefi efu a takimakandra dati fu yu syatu. Iya, a sma disi na wan bijbelstudie fu yu, srefi efu yu e hori a studie dati na a doromofo noso nanga yepi fu telefon. Fu san ede yu no ben sa du spesrutu muiti ini den mun mei nanga yuni fu opo wan bijbelstudie nanga a San Gado e aksi-brochure?
2 Sreka na fesi fu man abi bun bakapisi: Yu musu abi bun na prakseri sortu tori yu wani taki te yu e pristeri a San Gado e aksi-brochure. Prakseri fu a fosi takimakandra di yu ben abi nanga wan sma bifo yu e go baka na en. Aksi yusrefi: ’Efu mi wani go doro nanga a takimakandra fu man opo wan bijbelstudie nanga a sma, dan na sortu paragraaf mi kan poti spesrutu prakseri?’ Efu yu e preiki oso fu oso, dan yu musu prakseri sortu tori o hari a prakseri fu wan tini, wan bigisma, wan man, noso wan uma. Luku den prenspari tori fu a brochure, èn teki wan fu den di yu kan gebroiki fu hari a prakseri fu sma. Te yu sabi kaba fa yu o tyari a tori kon na fesi, dan yu musu oefen en wan tu leisi. Disi na wan fu den prenspari sani di kan yepi yu fu abi bun bakapisi.
3 Ini Wi Kownukondre diniwroko fu yanuari 2002 wi e feni aiti „Eksempre fu pristeri a San Gado e aksi-brochure”. A boksu di nen „Bigin wantewante nanga wan bijbelstudie” e sori fa wi kan gebroiki a brochure fu opo bijbelstudie. Yu ben kan gebroiki a fosi eksempre na a fasi disi:
◼ „Yu sabi taki wan tu miniti nomo de fanowdu fu man feni a piki tapu wan prenspari aksi fu Bijbel? Fu gi wan eksempre, fu san ede someni kerki e feni taki den na Kresten kerki? Oiti yu prakseri fu a tori dati?” Yu kan go na les 13 baka te a sma gi piki, èn dan yu kan taki fu den fosi tu paragraaf. Yu kan leisi wán noso tu tekst fu Bijbel efu ten de ete gi dati. Baka dati leisi a lasti aksi di de na tapusei fu a bladzijde, èn taki: „A tra pisi fu a les e poti krakti tapu feifi prenspari marki di e yepi yu fu kon sabi a tru bribi. Mi sa prisiri fu kon baka fu luku den penti disi nanga yu.”
4 Tan go doro: Gebroiki ibri okasi di fiti fu sori sma fa wi kan studeri a San Gado e aksi-brochure nanga den. Aksi a blesi fu Yehovah (Mat. 21:22). Efu yu e tan go doro fu du muiti, dan yu kan ondrofeni a prisiri di e kon te yu e yepi wan sma teki a bun nyunsu!