Wi abi wan paiman na trawan

¹ Na apostel Paulus ben si en leki wan plekti fu preiki gi sma. A ben sabi taki Yehovah sorgu taki ala sortu sma kisi frulusu nanga yepi fu a tumusi warti brudu fu En Manpikin (1 Tim. 2:3-6). Dati meki Paulus ben taki: „Mi abi wan paiman na den Grikisma èn na den wan di no de Grikisma, sosrefi na den koni sma èn na den sma di no kisi leri.” A ben de fayafaya èn a no ben kon weri fu pai a paiman fu en na tra sma, fu di a prati a bun nyunsu nanga den.​—Rom. 1:14, 15.

² Neleki fa Paulus ben du, dan na so Kresten na ini a ten disi e prati a bun nyunsu nanga tra sma na ibri okasi. Fu di a „bigi banawtu” o kon heri esi, meki wi e suku den opregtiwan fayafaya. Meki a de so taki, trutru lobi gi sma e pusu wi fu de fayafaya na ini a wroko disi di e kibri sma libi.​—Mat. 24:21; Esek. 33:8.

³ Wi e pai a paiman fu wi: A moro prenspari fasi fa wi e miti sma, na te wi e preiki oso fu oso. Na ini den kontren pe furu sma no de na oso, wi kan skrifi soifri suma no ben de na oso èn wi kan go baka na den na wan tra ten; na a fasi disi wi kan miti moro sma (1 Kor. 10:33). Wi kan miti sma sosrefi te wi e gi kotoigi na bisnis kontren, na strati, na presi pe sma e koiri, na presi pe sma e poti den wagi, èn nanga yepi fu telefon. Wi kan aksi wisrefi: ’Mi e du ala san mi man fu preiki na ala fasi so taki mi kan fruteri sma a boskopu di e gi libi?’​—Mat. 10:11.

⁴ Wan pionier ben teki a bosroiti fu miti ala sma na ini a kontren fu en. Na wan fu den oso, ala ten den garden ben tapu èn noiti sma no ben de na oso. Ma wan dei di a pionier no ben de na ini a preikiwroko, a ben si taki wan oto ben de na fesisei fu na oso pe sma noiti no ben de. Fu di a no ben wani lasi na okasi disi, meki a naki na a doro. Wan man opo a doro, èn baka a fosi takimakandra di a sisa ben abi nanga a man, a ben go baka wan tu leisi makandra nanga en masra. Te fu kaba, a man bigin studeri Bijbel, èn now a de wan dopu brada. A breiti taki a sisa ben preiki gi en, fu di a sisa ben firi taki a ben abi wan paiman na trawan.

⁵ Fu di a kaba o kon heri esi, meki now na a ten fu pai wi paiman na tra sma fu di wi e meki tranga muiti fu de fayafaya na ini a preikiwroko.​—2 Kor. 6:1, 2.

Pisi 11: Hori bijbelstudie di e go na fesi

Yepi nyun preikiman fu tyari go baka

¹ Te wan bijbelstudenti e bigin fu teki prati na a preikiwroko, dan a sa miti sma di wani sabi moro fu a bun nyunsu. Fa wi kan yepi a nyun preikiman fu tyari bun gobaka èn fu yepi den sma di wani sabi moro?

² Efu a studenti wani fu tyari wan gobaka, dan na a fosi leisi te a e miti a sma a musu bigin sreka sani fu go baka na a sma. Gi a studenti deki-ati fu sori taki a e broko en ede trutru nanga den sma nanga suma a e taki (Fil. 2:4). Leri en safrisafri fa a kan meki den ososma taki fa den e denki, fa a kan arki san den e taki, èn fa a kan si sortu broko-ede den abi. Te wan sma sori taki a wani sabi moro, dan meki a nyun preikiman skrifi den moro prenspari sani fu san a ben taki. Gebroiki den sani di a skrifi fu yepi en sreka gi tra takimakandra nanga a sma.

³ Sreka unsrefi fu go baka: Luku baka fu san unu ben taki a fosi leisi nanga na ososma, èn sori a studenti fa a kan suku wan pisi tori fu a Kownukondre boskopu di o hari a prakseri fu na ososma (1 Kor. 9:19-23). Sreka makandra nanga a studenti fu hori wan syatu takimakandra, pe a studenti e leisi wan bijbeltekst èn sosrefi wan paragraaf na ini a publikâsi di a o gebroiki fu studeri nanga a sma. Boiti dati, sreka wan aksi di yu kan poti na a kaba fu a takimakandra so taki a studenti kan piki na aksi dati a tra leisi te a go baka na a ososma. Sori a nyun preikiman fa fu meki a sma kon sabi moro fu Gado Wortu ibri leisi te a go na a sma.

⁴ A ben o de wan bun sani fu leri a studenti fu taki wan syatu sani na a bigin te a go baka na wan sma. Baka te a taki na ososma odi, a kan taki: „Mi ben nyan bun fu a takimakandra di wi ben abi a leisi di pasa, èn mi kon baka fu fruteri yu moro fu san Bijbel e taki fu [kari a tori fu san yu o taki].” Kande yu kan sori a nyun preikiman sosrefi san a kan taki te wan tra sma di a no ben fruwakti fu miti, e kon na a doro.

⁵ Go baka wantewante: Gi a studenti a deki-ati fu kon kisi a gwenti fu go baka wantewante na ala den sma di sori taki den wani sabi moro. Kande a sa musu go baka furu leisi fosi a feni a sma na oso, ma a musu horidoro. Leri a studenti fa a kan meki mofo fu go baka na a sma, èn yepi en fu kon frustan o prenspari a de fu drai go baka na a sma soleki fa a ben pramisi (Mat. 5:37). Leri a nyun preikiman fu abi switifasi, fu hori sma na prakseri, èn fu abi lespeki te a e suku den sma di wi kan teki gersi nanga skapu. Leri en sosrefi fu yepi den sma disi, so taki den kan kon sabi moro.​—Tit. 3:2.