Sreka yusrefi bun fu gi leri
1. Fu san ede wi musu du muiti fu meki a Bijbelstudenti kisi warderi gi Bijbel?
1 Te wi e hori wan Bijbelstudie, dan wi musu sreka wisrefi bun efu wi wani meki a studenti dini Yehovah. Wi musu du muiti fu yepi a studenti fu kon kisi warderi gi den tru tori fu Bijbel. Disi o gi en deki-ati fu dini Yehovah (Deut. 6:5; Odo 4:23; 1 Kor. 9:26). Fa wi kan du disi?
2. Fa begi kan yepi wi te wi e sreka wisrefi?
2 Begi te yu e sreka yusrefi: Fu di na Yehovah e meki a siri fu waarheid gro na ini na ati fu a studenti, meki a fiti taki wi e begi fosi wi bigin sreka wisrefi gi a studie. Wi kan begi spesrutu gi a studenti èn gi den sani di a abi fanowdu (1 Kor. 3:6; Yak. 1:5). Den begi disi e yepi wi tu fu kon sabi san wi kan du moro fu yepi a studenti fu „kon sabi a wani fu [Yehovah] finifini”.—Kol. 1:9, 10.
3. Fa wi kan sreka wisrefi aladi wi e hori a studenti na prakseri?
3 Prakseri a studenti: Yesus ben sabi taki efu a ben wani gi bun leri, dan a ben musu hori den arkiman na prakseri. Na tu okasi, sma ben poti a srefi aksi gi Yesus: „San mi musu du fu kisi têgo libi?” Ibri leisi te a ben gi piki, a ben du dati na wan tra fasi (Luk. 10:25-28; 18:18-20). Wi musu hori a studenti na prakseri te wi e sreka wisrefi. Sortuwan fu den tekst di kari, wi o leisi nanga en? O furu wi wani studeri? Sortu sani na ini a lès a studenti o feni muilek fu frustan noso fu bribi? Efu wi e prakseri sortu aksi a studenti kan poti, dan wi sa de srekasreka fu gi bun piki.
4. San a wani taki fu sreka wisrefi bun?
4 Luku baka san yu o studeri nanga a sma: Awansi omeni leisi wi studeri wan tori na ini a ten di pasa, toku a o de a fosi leisi taki wi o studeri a tori dati nanga a studenti. Efu wi wani doro na ati fu en, dan a de tumusi prenspari fu sreka wisrefi bun ibri leisi te wi o studeri nanga a sma. Disi wani taki dati wi e du san wi e gi a studenti deki-ati fu du. Te yu e luku a tori di yu o studeri èn te yu e luku den tekst di kari, dan yu musu hori a studenti na prakseri. Boiti dati, yu kan hari strepi na ondro den moro prenspari penti tu.—Rom. 2:21, 22.
5. Fa wi kan teki na eksempre fu Yehovah?
5 Yehovah trutru wani si fa ibri Bijbelstudenti e go na fesi (2 Petr. 3:9). Te wi e teki ten fu sreka wisrefi gi ibri Bijbelstudie, dan neleki Yehovah wi e sori taki wi e broko wi ede nanga den fu di wi lobi den.