Doro na ati foe joe bijbelstudenti
1 Joe wani meki joe bijbelstudenti doe den sani san a e leri? A moesoe foe doe so, efoe a wani foe njanboen foe a sabi san a e kisi. Foe gi joe bijbelstudenti krakti foe doe sani, joe moesoe doro en ati. Tapoe a dei foe Pinkster 33 bifo Gewoon Teri a taki foe na apostel Petrus di ben gi deki-ati „naki na ati” foe 3000 sma, di ben teki den wortoe foe en nanga prisiri” èn den ben dopoe a srefi dei (Tori. 2:37, 41). Fa joe kan doro a ati foe joe bijbelstudenti?
2 Sreka joesrefi heri boen: No proeberi foe behandel so meni materiaal dati pikinso ten tan abra foe taki-go-taki-kon nanga a studenti foe den sani di a leri. Bosroiti na fesi sortoe sani joe wani tjari kon moro foeroe na fesi, èn de seiker taki joe froestan den tekst, èn taki joe kan gebroiki den na wan fasi di abi boen bakapisi. Prakseri na fesi, foe den aksi di kan opo ini na ati foe a studenti nanga en background ini prakseri. Efoe joe sabi joe studenti heri boen, dan a sabi disi kan jepi joe foe sreka joesrefi nanga bodoi di sa fiti en spesroetoe.
3 Teki Jesus fasi foe leri: Jesus ben gebroiki agersitori foe meki sma kon froestan moeilek penti makriki, èn foe jepi den studenti foe en foe froestan san a ben wani taki èn foe den kan firi fa wan sma e firi ini wan situwâsi (Luk. 10:29-37). Na a srefi fasi, joe kan meki toemoesi boen leri go dipi ini na ati foe joe bijbelstudenti te joe hori joe agersitori makriki, teki den foe den sani di sma gwenti èn fiti den spesroetoe na den situwâsi foe a studenti.
4 Leki fa Jesus ben sori foeroe leisi, aksi spesroetoe e jepi foe doro na ati foe bijbelstudenti (Luk. 10:36). Ma joe no moesoe de tevrede, te a studenti e leisi na piki nomo foe a boekoe. Gebroiki aksi, di sa jepi en foe meki a denki tapoe wan fasi, so taki a sa kisi wan overtoigi di a no ben poti prakseri so fini na fesi ete. A fasi disi foe doe, e jepi a studenti toe foe kweki a koni foe denki. Poti aksi di e sori fa a e si sani, foe kon sabi fa ensrefi e bribi foe na afersi. Baka dati, kande joe kan si den kontren, pe jepi de fanowdoe, èn joe kan go doro nanga a tori èn gi moro spesroetoe asisteri.
5 Efoe wan bijbelstudenti no e go na fesi, dan a de fanowdoe foe kon sabi foe en fa dati doe kon. Disi ben sa wani taki, dati joe moesoe go fisiti en tapoe wan tra ten, leki a ten di joe e studeri nanga en. Foe san ede a e drai-drai foe handri? A kan de taki a no e froestan son bijbel penti? A no sabi fa foe tjari spesroetoe kenki kon ini a fasi fa a e libi? Jepi wan bijbel-studenti foe kon sabi den kefar te a e proberi foe ’engi tapoe toe difrenti prakseri’.—1 Kow. 18:21.
6 Na apostel Paulus ben froestan taki leri sma, di abi belangstelling, den troe tori foe bijbel, na wan wroko foe kibri sma libi, èn na so fasi a gi ala kresten rai foe ’tan poti prakseri alaten tapoe san den e leri trawan’ (1 Tim. 4:16). Den sma pe joe e hori wan bijbelstudie, moesoe teki moro leki soso leri foe bijbel èn san e pasa ini grontapoe. Den moesoe kisi soifri reti sabi foe Jehovah nanga Jesus èn den moesoe kisi jepi foe kweki wan waran persoonlek matifasi nanga den. Soso tapoe sowan fasi den sa kan sori den bribi nanga jepi foe den wroko (Jak. 2:17, 21, 22). Te joe doro a ati foe a studenti, dan disi sa boeweigi en foe teki a waka nanga libi, di sa gi Jehovah grani, èn di sa kibri en eigi libi.—Odo 2:20-22.