Fa foe meki disipel nanga jepi foe a Sabi-boekoe
1 Wan marki di ala kresten ben sa wani doro na foe leri a waarheid na tra sma èn meki disipel foe den wan di „abi a joisti jeje gi têgo libi” (Tori. 13:48; Mat. 28:19, 20). Na organisâsi foe Jehovah gi wi wan heri moi wrokosani foe doe disi — a boekoe Sabi di e tjari joe go na têgo libi. A titel e poti prakseri na a prenspari di a de toemoesi prenspari foe abi oso-bijbelstudie, foe di têgo libi e anga foe a teki di sma moesoe teki sabi na ini den foe Jehovah, a wan-enkri troe Gado, èn foe en Manpikin, Jesus Krestes. — Joh. 17:3.
2 A Sabi-boekoe de now a moro prenspari poeblikâsi foe a Genootschap di wi e gebroiki foe hori oso-bijbelstudie. Te wi e gebroiki en, dan wi kan leri sma a waarheid na wan eenvoudig, krin èn sjatoe fasi. Disi sa jepi doro na ati foe den wan di e kisi leri (Luk. 24:32). A no de foe taki, dati a de fanowdoe taki a sma di e hori a studie moesoe gebroiki boen fasi foe gi leri. Foe kan doe dati, meki na inlegvel disi sreka foe gi rai, èn foe gi sani di wi kan hori na prakseri, di abi foe doe nanga a fasi foe gi leri, èn di abi boen bakapisi kaba. Te joe e gebroiki a koni foe man si sani krin, èn e handri akroederi a situwâsi foe ibri sma, dan safrisafri joe sa man gebroiki wan toe noso ala den rai di pristeri dja. Kibri na inlegvel disi, èn gebroiki en foeroe tron. Difrenti penti na ini, kan jepi joe foe abi moro boen bakapisi te joe e gebroiki a Sabi-boekoe foe meki disipel.
3 Hori wan oso-bijbelstudie di e go na fesi: Abi opregti persoonlijk belangstelling gi a studenti leki wan sma di kan tron wan kresten disipel nanga wan brada noso sisa na jejefasi. Abi waran fasi, switifasi, èn de fajafaja. Te joe de wan boen arkiman, dan joe kan kon sabi a tra sma — en historia nanga a fasi fa en libi de — san sa jepi joe foe si krin san na a moro boen fasi foe jepi en na jeje fasi. De klariklari foe gi joesrefi foe a boen foe a studenti. — 1 Tes. 2:8.
4 Te wan studie bigin kaba, dan a moro boen foe studeri den kapitel na ini a Sabi-boekoe, a wan baka a trawan. Disi sa meki a studenti kon froestan waarheid safrisafri, foe di a boekoe e taki foe bijbel tori ini a moro logis fasi fa sani e waka baka makandra. Meki a studie tan makriki èn meki a belangstelling tan, so taki a de nanga faja èn e go moro esi (Rom. 12:11). Akroederi a situwâsi foe a sma nanga a fasi fa a studenti man leri, kande joe sa man doe a moro bigi pisi foe ibri kapitel ini wán leisi na ini wan sani foe wán joeroe, sondro foe doe a studie toemoesi esi. Studenti sa go moro boen na fesi te a leriman nanga a studenti e hori densrefi na a mofo di den ben meki foe studeri ibri wiki. So boen, nanga moro foeroe sma, a sa man foe kaba den 19 kapitel foe a boekoe na ini wan sani foe siksi moen.
5 Bigin ibri lès foe di joe e taki sjatoe foe wan toe sani di e wiki a belangstelling gi a materiaal. Joe sa si taki a titel foe ibri kapitel na a thema, pe krakti moesoe poti na tapoe. Ibri ondro-edeprakseri e tjari wan prenspari penti kon na fesi, èn e jepi joe foe hori a thema foe a kapitel na prakseri. Loekoe boen foe no taki toemoesi foeroe. Na presi foe dati, proeberi foe meki a studenti taki. Te joe e poti spesroetoe aksi gi a studenti di kan jepi en gi a piki, èn di abi den fondamenti na tapoe san a sabi kaba, dan dati sa jepi en denki foe sani, èn a sa meki en kon na den joisti bosroiti. (Mat. 17:24-26; Luk. 10:25-37; loekoe a Handleiding-boekoe bladzijde 51, paragraaf 10.) Hori joesrefi finifini na den tori di den skrifi na ini a Sabi-boekoe. Efoe joe bigin taki foe tra finifini tori, dan joe ben kan poeroe a prakseri foe a sma èn a kan meki taki den prenspari penti no de so krin moro èn a kan meki a studie kon moro langa (Joh. 16:12). Efoe wan aksi e kon di no abi foe doe nanga a tori di oenoe e studeri, dan nofo tron joe ben kan piki na aksi na a kaba foe a lès. Disi sa meki joe taki foe a lès foe a wiki sondro foe lasi joe prakseri. Tjari kon na krin gi a studenti taki te foe kaba moro foeroe foe en persoonlijk aksi sa kisi wan piki te a e go doro foe studeri a boekoe. — Loekoe a Handleiding-boekoe bladzijde 94, paragraaf 14.
6 Efoe a studenti e bribi troetroe ini a Dri-wánfasi, ini a dede di a sili no e dede, hèlfaja, noso den sortoe tra falsi leri dati, èn a no de tevrede nanga san a Sabi-boekoe e taki, dan joe ben kan gi en a Redeneren-boekoe (Taki-go-taki-kon-boekoe) noso wan tra poeblikâsi di e taki foe a tori. Froeteri en taki joe sa taki nanga en foe a tori, baka te a prakseri foe san a e leisi.
7 Foe bigin èn kaba a studie nanga wan begi foe aksi a tiri nanga a blesi foe Jehovah, e gi grani na a okasi, èn a e meki wan sma kisi wan lespeki fasi foe denki, èn a e poti prakseri na Jehovah leki a troe Leriman (Joh. 6:45). Efoe a studenti e gebroiki tabaka ete, dan kande baka wan pisi ten joe moesoe aksi en foe no doe dati na a ten foe a studie. — Tori. 24:16; Jak. 4:3.
8 Gi leri nanga boen bakapisi nanga jepi foe den bijbel tekst, agersitori, nanga aksi foe loekoe sani sjatoe baka: Awansi omeni leisi a leriman studeri a materiaal kaba kande, tokoe wan bekwaam leriman sa loekoe ibri lès sjatoe baka nanga a spesroetoe studenti na prakseri. Disi e jepi en foe froewakti wan toe foe den aksi foe a studenti. Te joe wani gi leri nanga boen bakapisi, dan joe moesoe froestan krin san na den prenspari penti na ini a kapitel. Soekoe den bijbel tekst foe si fa den e fiti a materiaal, èn bosroiti sortoewan foe den joe moesoe leisi na a ten foe a studie. Prakseri foe fa joe kan gi leri foe di joe e gebroiki den agersitori nanga den aksi foe loekoe sani sjatoe baka na a kaba foe a kapitel.
9 Te joe e gebroiki den tekst na wan boen fasi, dan joe sa jepi a studenti foe froestan taki troetroe a e studeri bijbel (Tori. 17:11). Te joe e gebroiki a boksoe „Kon sabi joe bijbel”, tapoe bladzijde 14 foe a Sabi-boekoe, dan leri en fa foe feni bijbel tekst. Sori en fa foe feni den vers di den teki den wortoe skrifi poti na ini a lès. Efoe ten e gi pasi foe dati, dan soekoe èn leisi den bijbel tekst di skrifi pe den de foe feni. Meki a studenti taki fa den e horibaka gi noso e tjari kon na krin san e taki na ini a paragraaf. Poti krakti tapoe den prenspari pisi foe den tekst, so taki a e kon froestan den reide foe den moro prenspari penti foe a lès (Neh. 8:8). Nofo tron, a no de fanowdoe foe a leriman poti moro bijbel tekst ini a takimakandra leki den wan di a boekoe e gi. Taki wan sani foe a waarde foe sabi den nen nanga a fasi fa den bijbel boekoe e waka a wan baka a trawan. A kan de wan jepi gi a studenti foe leisi bladzijde 27-30 foe A Waktitoren foe 15 juni 1991. Te a fiti, dan gi en deki-ati foe a gebroiki a New World Translation (Njoen-Grontapoevertaling). Safrisafri joe ben kan sori fa foe gebroiki den difrenti marki foe en, soleki den verwijstekst nanga na index foe bijbel wortoe.
10 Studie 34 na ini a Handleiding voor de Theocratische Bedieningsschool (Handleiding gi a Theokrasia Diniwroko-Skoro) e tjari kon na krin taki agersitori e boeweigi wan sma foe denki èn e meki en moro makriki foe froestan njoen prakseri. Den e moksi a koni fasi foe hari wan sma prakseri nanga a krakti di a abi tapoe a firi foe sma, so taki a boskopoe e kon na krin nanga wan krakti di nofo tron no man doe nanga jepi foe wortoe di taki wawan (Mat. 13:34). A Sabi-boekoe abi someni agersitori foe gi leri di de makriki, ma di tokoe abi krakti. Foe eksempre, wan ageristori di ben gebroiki na ini kapitel 17 e bow a warderi foe fa Jehovah, na wan jejefasi, e gi njanjan, krosi, nanga tanpresi nanga jepi foe a kresten gemeente. Den moi prenki foe a Sabi-boekoe kan gebroiki boen foe wiki a firi foe sma. Na ondro na ondro-edeprakseri „A prisiri opobaka”, tapoe bladzijde 185, a krakti di paragraaf 18 abi na tapoe sma, sa kon moro bigi te joe e meki a studenti loekoe baka na a prenki tapoe bladzijde 86. Disi kan boeweigi en foe denki foe na opobaka leki wan troetroe sani na ondro Gado Kownoekondre.
11 Bijbel studenti moesoe go na fesi na jejefasi nanga ibri lès. Dati meki, no misi foe poti den aksi foe loekoe sani sjatoe baka na ini na „Ondrosoekoe a sabi foe joe”-boksoe di e kon na a kaba foe ibri kapitel. A sma di e hori a studie moesoe arki te a studenti e gi piki èn a no moesoe de tevrede nanga wan boen piki nomo. Difrenti foe den aksi disi meki foe poeroe wan persoonlijk piki na a ati. Foe eksempre, loekoe bladzijde 31, pe a studenti e kisi na aksi: „Sortoe eigifasi foe Jehovah Gado spesroetoe e hari joe prakseri?” — 2 Kor. 13:5.
12 Leri den studenti foe sreka densrefi gi a studie: Wan studenti di e leisi a lès na fesi, e marki den piki, èn e denki foe fa foe taki den nanga en eigi wortoe, sa go moro esi na fesi na jejefasi. Nanga joe eksempre nanga deki-ati, joe kan leri en foe sreka ensrefi gi a studie. Sori en joe boekoe, pe joe marki noso poti strepi na ondro den moro prenspari wortoe nanga pisi lin. Tjari kon na krin fa foe feni den piki na tapoe den aksi di skrifi na ini a boekoe. Te oenoe e sreka wan kapitel makandra, dan a kan de wan jepi gi a studenti. Gi en deki-ati foe taki sani nanga en eigi wortoe. Soso na a fasi dati a sa kon na krin efoe a e froestan a materiaal. Efoe a e leisi en piki na ini a boekoe, dan joe kan gi en deki-ati foe denki, foe di joe e aksi en fa a ben sa tjari a penti kon na krin gi wan tra sma nanga en eigi wortoe.
13 Gi a studenti deki-ati foe soekoe den bijbel tekst di skrifi pe den de foe feni, leki wan pisi foe a sreka di a e sreka ensrefi ala wiki, foe di ten no de kande foe leisi den alamala na a ten foe a studie. Prèise en foe a moeiti di a e meki nanga den lès foe en. (2 Petr. 1:5; loekoe A Waktitoren foe 1 augustus 1993, bladzijde 20, 21, foe feni moro rai foe san a leriman nanga a studenti kan doe foe meki a bijbel studenti go na fesi nanga a bijbelstudie foe en.) Na a fasi disi, a studenti e leri foe sreka ensrefi foe gi boen komentaar na gemeente konmakandra. A sa leri fa foe kweki boen gwenti gi persoonlijk studie di sa meki a de srekasreka foe tan go na fesi na ini waarheid baka te a kaba nanga en persoonlijk bijbel studie foe a Sabi-boekoe. — 1 Tim. 4:15; 1 Petr. 2:2.
14 Tjari studenti kon na Jehovah en organisâsi: A de a frantiwortoe foe wan sma di e meki disipel foe meki a studenti kisi belangstelling gi Jehovah en organisâsi. A studenti sa go na fesi moro esi foe kon lepi na jejefasi efoe a e erken èn e warderi na organisâsi èn e froestan taki a de fanowdoe foe tron wan pisi foe disi. Wi wani, taki a e prisiri foe de makandra nanga Gado pipel èn taki a e angri foe de nanga wi na a Kownoekondre zaal, pe a kan kisi a jepi na jejefasi èn na emotioneel sei di a kresten gemeente e gi. — 1 Tim. 3:15.
15 A brochure Jehovah’s Getuigen — Wereldwijd verenigd in het doen van Gods wil, meki foe sma kan kon sabi a wan-enkri organisâsi di wi kan si èn di Jehovah e gebroiki na ini a ten disi foe doe en wani. Foe san ede joe no e gi a studenti wan eksemplaar, so esi leki wan studie bigin. Biginbigin kaba, joe moesoe tan kari a studenti kon na den konmakandra. Tjari kon na krin fa den e hori. Joe ben kan froeteri en a nen foe wan poebliki taki di o hori noso sori en na artikel di den sa taki foe en na a Waktitoren-studie. Kande joe ben kan tjari en go loekoe a Kownoekondre zaal te no wan konmakandra e hori, so taki joe kan poeroe iniwan broko-ede di a abi kande foe di a ben o go na wan njoen presi foe a fosi leisi. Kande joe man aksi en foe tjari en go na den konmakandra. Te a e kon, meki a firi ensrefi boen drape (Mat. 7:12). Meki a kon sabi tra Kotoigi, so srefi den owroeman. A de foe howpoe, taki a sa bigin si a gemeente leki en jeje famiri (Mat. 12:49, 50; Mark. 10:29, 30). Joe ben sa kan poti wan marki gi en, soleki foe go na wan konmakandra ibri wiki, èn safrisafi joe kan poti tra marki. — Hebr. 10:24, 25.
16 Ala di oenoe e go doro foe hori na oso-bijbelstudie na ini a Sabi-boekoe, poti krakti na tapoe pisi di e tjari kon na krin taki a de fanowdoe foe abi demakandra doronomo nanga a gemeente na den konmakandra. Loekoe spesroetoe den bladzijde 52, 115, 137-139, 159, so srefi kapitel 17. Sori taki joesrefi abi dipi warderi gi Jehovah en organisâsi (Mat. 24:45-47). Taki positief foe a gemeente drape èn foe san joe e leri na den konmakandra (Ps. 84:10; 133:1-3). A ben sa boen efoe a studenti ben kan loekoe ibriwan foe den video foe a Genootschap, foe bigin nanga Jehovah’s Getuigen — De organisatie achter de naam. Foe kisi moro idea fa foe meki wan sma kisi belangstelling gi na organisâsi, loekoe De Wachttoren foe 15 maart 1985, bladzijde 21-25, nanga na inlegvel foe Wi Kownoekondre Dienst foe april 1993.
17 Gi studenti deki-ati foe gi kotoigi na trawan: A marki di wi abi foe studeri nanga sma na foe meki disipel di e gi kotoigi foe Jehovah (Jes. 43:10-12). Dati wani taki, dati a leriman moesoe gi a studenti deki-ati foe taki nanga trawan foe san a e leri foe bijbel. Disi a kan doe soso foe di a e aksi: „Fa joe ben sa tjari a waarheid disi kon na krin gi joe famiri?” noso „Sortoe bijbel tekst joe ben sa gebroiki foe boeweisi disi na wan mati?” Poti krakti tapoe den moro prenspari presi na ini a Sabi-boekoe pe den e gi deki-ati foe gi kotoigi, soleki bladzijde 22, 93-95, 105, 106, so srefi kapitel 18. Te a de so fara kaba, joe kan gi a studenti wan toe traktaat foe gebroiki te a e kisi okasi foe gi kotoigi na trawan. Gi en a rai foe kari den osofamiri memre foe en kon foe sidon na a studie foe en. A abi mati di ben sa wani studeri toe? Aksi en foe sori joe den wan di abi belangstelling.
18 Te a sma, di kan tron wan disipel, e go na a theokrasia diniwroko-skoro èn na a diniwroko-konmakandra, dan a kan kisi moro leri èn deki-ati di sa jepi en foe tron wan preikiman foe a boen njoensoe. Te a e sori wan belangstelling foe skrifi en nen na a skoro noso foe tron wan preikiman di no dopoe ete, dan den gronprakseri di skrifi tapoe bladzijde 98 nanga 99 foe a Bediening-boekoe sa fiti dja. Efoe wan sani na ini en libi no e gi en pasi foe de so wan sma, dan joe kan soekoe na ini den poeblikâsi foe a Genootschap materiaal di kan gi jepi èn di e taki foe a tori, èn prati dati nanga en. Foe eksempre, wan studenti kan abi problema foe wini a de di a de wan srafoe foe tabaka noso tra drug. A Redeneren-boekoe e tjari krakti prakseri foe bijbel kon na krin foe san ede kresten moesoe loekoe boen foe abi den sortoe kefalek gwenti dati, èn tapoe bladzijde 129 a e tjari wan fasi kon na fesi di e sori fa foe jepi trawan broko nanga takroe gwenti èn abi boen bakapisi. Begi nanga en foe a tori, èn leri en foe bow tapoe Jehovah foe kisi jepi. — Jak. 4:8.
19 A fasi di e sori san moesoe pasa foe kon sabi efoe wan sma boen nofo foe teki prati na a poebliki diniwroko e kon na fesi na ini A Waktitoren foe 1 januari 1996 bladzijde 28, paragraaf 6. Te a studenti boen nofo, dan a ben sa de wan jepi foe hori wan oefening foe sreka en gi a fosi dei di a sa go ini a velddienst. Taki na wan positief fasi, foe fa den sma e handri èn den gens di de foeroe na ini joe kontren. Meki a bigin nanga na oso-foe-oso wroko so esi leki dati kan, èn safrisafri leri en den tra sani foe a diniwroko. Efoe joe e hori joe pristeri sjatoe èn makriki, dan a sa de makriki gi en foe doe san joe e doe. Bow en èn gi en deki-ati, èn sori taki joe e prisiri foe a wroko, so taki a e si a faja foe joe èn e sori dati toe (Tori. 18:25). A marki foe wan njoen disipel moesoe de foe tron wan fajafaja preikiman foe a boen njoensoe di e preiki doronomo. Kande joe kan jepi en foe meki wan praktis schema gi a diniwroko. Foe meki a kan go na fesi ini a man di a man gi kotoigi na trawan, joe kan aksi en foe leisi den Wachttoren-artikel foe 15 november 1984, bladzijde 13-24, 15 juli 1988, bladzijde 9-20; den Waktitoren foe 1 januari 1991, bladzijde 27-32; nanga 1 januari 1994, bladzijde 16-21.
20 Gi studenti deki-ati foe gi densrefi abra èn teki dopoe: A moesoe man gi wan opregti studenti foe leri nofo nanga jepi foe wan studie foe a Sabi-boekoe foe gi ensrefi abra na Gado èn de boen nofo foe teki dopoe. (Teki gersi Tori. 8:27-39; 16:25-34.) Ma fosi wan sma sa kon so fara foe gi ensrefi abra, a moesoe kweki wan lespeki dini foe Jehovah (Ps. 73:25-28). Soekoe na ini a heri pisi ten di joe e hori a studie, okasi foe meki a kisi warderi gi den eigifasi foe Jehovah. Taki foe joe eigi dipi firi gi Gado. Jepi a studenti denki na a fasi foe kweki wan waran, persoonlijk matifasi nanga Jehovah. Efoe a kon sabi èn lobi Gado troetroe, dan a sa dini En getrow, bika a lespeki dini foe Gado abi foe doe nanga fa wi e denki foe Jehovah leki wan sma. — 1 Tim. 4:7, 8; loekoe a Handleiding-boekoe, bladzijde 76, paragraaf 11.
21 Doe moeiti foe doro na ati foe a studenti (Ps. 119:11; Tori. 16:14; Rom. 10:10). A moesoe si fa waarheid abi krakti na ensrefi tapoe èn bosroiti san a moesoe doe nanga san a e leri (Rom. 12:2). A e bribi a waarheid troetroe di den e pristeri en ibri wiki? (1 Tes. 2:13) Foe doro a marki dati, joe kan meki a studenti taki san a e denki, foe di joe e poti koni aksi di e tjari a prakseri foe en kon na krin, soleki: San joe e denki foe disi? Fa joe kan gebroiki disi na ini joe libi? Na den sani di a e taki, joe kan si krin efoe moro jepi de fanowdoe foe doro en ati. (Luk. 8:15; loekoe a Handleiding-boekoe bladzijde 52, paragraaf 11.) Den edeprakseri gi den prenki tapoe bladzijde 172 nanga 174 foe a Sabi-boekoe e aksi: „Joe gi joesrefi abra na Gado na ini begi?” èn „San e tapoe joe foe teki dopoe?” Den kan boeweigi na ati foe a studenti na wan boen fasi foe doe wan sani.
22 Na ini a Waktitoren foe 1 januari 1996, bladzijde 28 paragraaf 9, den e taki san moesoe doe te wan preikiman di no dopoe ete, wani teki dopoe. A Sabi-boekoe ben skrifi nanga a marki foe jepi a sma gi wan piki tapoe den „Aksi gi den wan di wani teki dopoe”, di de foe feni na a bakasei foe a Bediening-boekoe di den owroeman sa go loekoe nanga en. Efoe joe poti krakti tapoe den aksi di skrifi na ini a Sabi-boekoe, dan a studenti sa moesoe de srekasreka te den owroeman sa poti den aksi gi en foe sreka en gi en dopoe.
23 Jepi den wan di kaba na oso-bijbelstudie: Wi moesoe froewakti taki na a ten taki wan sma kaba wan studie nanga jepi foe a Sabi-boekoe, taki en opregtifasi nanga a dipi foe a belangstelling di a abi foe dini Gado sa kon de foe si (Mat. 13:23). Dati meki a lasti ondro-edeprakseri foe a boekoe e aksi: „San joe sa doe?” Den lasti paragraaf e meki a studenti poti en prakseri na a matifasi di a ben sa moesoe kweki nanga Gado, a fanowdoe di a de fanowdoe foe gebroiki a sabi di a leri, èn a fanowdoe di a de fanowdoe foe doe wan sani esi-esi foe sori en lobi gi Jehovah. No wan seti de foe studeri tra poeblikâsi nanga den sma di kaba a Sabi-boekoe. Tjari kon na krin na wan switi fasi èn krinfasi gi wan studenti di no e handri tapoe a sabi foe Gado, san a moesoe doe foe go na fesi na jejefasi. Joe ben sa kan go loekoe en ten na ten èn libi okasi gi en foe doe den sani di a moesoe doe di kan tjari en go na têgo libi. — Preik. 12:13.
24 Wan njoen disipel di e teki a waarheid èn e teki dopoe, sa moesoe gro boen foeroe ini sabi nanga froestan, so taki a kan kisi balansifasi dorodoro ini a bribi (Kol. 2:6, 7). Na presi foe go doro nanga en oso-bijbelstudie baka di joe kaba a Sabi-boekoe, joe kan sorgoe taki joe de klariklari foe gi en osortoe persoonlijk jepi di a abi fanowdoe kande foe kon lepi na jejefasi (Gal. 6:10; Hebr. 6:1). En, foe en sei, kan kon froestan den sani moro krin te a e leisi bijbel ala dei, e studeri A Waktitoren nanga tra poeblikâsi foe a ’getrow srafoe’ persoonlijk, èn e sreka ensrefi èn go na den konmakandra, èn taki foe a waarheid nanga kompe bribiman (Mat. 24:45-47; Ps. 1:2; Tori. 2:41, 42; Kol. 1:9, 10). Te a e leisi a Bediening-boekoe èn e gebroiki san de na ini, dan dati sa plèi wan prenspari ròl foe a tron wan sma di orga-orga na theokrasia sei foe doe en diniwroko dorodoro. — 2 Tim. 2:2; 4:5.
25 Kweki a koni foe man gi leri: Wi kisi a komando foe „meki disipel foe sma . . . , e gi den leri” (Mat. 28:19, 20). Foe di a koni foe man gi leri abi foeroe foe doe nanga a meki foe disipel, meki wi wani doe foeroe moeiti foe go na fesi leki leriman (1 Tim. 4:16; 2 Tim. 4:2). Efoe joe wani moro rai foe fa foe kweki a koni foe man gi leri, dan joe ben sa wani leisi kande: „De kunst van onderwijzen ontwikkelen” (Kweki a koni foe man gi leri) nanga „Het hart van je luisteraars bereiken” (Doro na ati foe den arkiman foe joe) na ini a Handleiding-boekoe, studie 10 nanga 15; „Onderwijzer, onderwijs” (Leriman, Gi leri) na ini a Hulp-boekoe bladzijde 1161-1164; nanga den Waktitoren-artikel „Bow nanga sani di faja no man bron” nanga „Te joe e gi leri, doro na ati”, foe 1 augustus 1984; „Joe e taki-go-taki-kon na wan boen fasi nanga jepi foe den Boekoe foe bijbel?”, foe 1 maart 1986; nanga „Fa foe kisi prisiri ini a meki foe disipel”, na ini na inlegvel foe Wi Kownoekondre Dienst foe juli 1996.
26 Te joe e doe moeiti foe meki disipel, foe di joe e gebroiki a Sabi-boekoe, begi ala ten taki Jehovah, a sma „di e meki en gro”, sa blesi den moeiti foe joe foe doro na ati foe libisma nanga a boen njoensoe foe a Kownoekondre (1 Kor. 3:5-7). Meki joe ondrofeni a prisiri foe leri trawan froestan, warderi, èn doe wan sani na tapoe a sabi di e tjari sma go na têgo libi!