Sreka wisrefi na tapoe osobijbelstudi èn hori den
1 Jezus ben gi en discipel a komando foe préki na boen njoensoe èn ’foe meki discipel’ (Matt. 24:14; 28:19, 20). Na hori foe osobijbelstudi de wan toemsi moifasi foe meki discipel. Foedi na toemsi prenspari wroko disi de wan pisi foe wi anbegi, meki wi moe feti a baka foe doe ala san wi kan te wi e sreka wisrefi tapoe osobijbelstudi èn hori den.
Sreka wisrefi tapoe studi
2 Sreka wisrefi tapoe wan osobijbelstudi, wani taki moro leki soso foe lési na les èn foe soekoe den tekst di no skrifi. Foe doro na ati foe wi bijbel studenti, dan wi moe tjari a materiaal so, dati ai bewégi en.
3 Ini a fosi presi wi moe abi wisrefi wan krin froestan foe a materiaal. Wi moe sabi fa ala den tekst abi foe doe nanga den paragraaf èn tapoe na bijbelstudenti. Na poti wan strepi na ondro den sroto wortoe nanga pisi foe na zin sa jepi wi foe hori den na ati. Wi moe poti den ede prakseri foe na les aparti èn denki foe den fa wi kan tjari en kon na tapoe na studenti. Boiti foe dati, wi moe hori na niveau foe na bijbel sabi foe na studenti na prakseri, kontren tapoe san a abi problema foe teki bepaalde afersi, pe a moe tjari kenki kon ini en kristen persoonlekheid nanga so moro fara. Wi kan aksi wisrefi: ’Fa na materiaal nanga den tekst ini na les ben sa kan gebroiki foe jepi en go na fesi?’ Sontron a kan de fanowdoe foe go soekoe punt. Efoe na studenti wani njan boen troetroe foe na studi, dan wan sreka a fesi finifini de fanowdoe.
4 Wan prenspari pisi foe na sreka foe joe na tapoe wan bijbelstudi de na begi na Jehovah. Taki foe aparti sani te joe e begi gi na sma èn foe san a abi fanowdoe foe en. Aksi efoe Jehovah wani jepi joe foe doro en ati. — 1 Kor. 3:6.
Hori a studi
5 Foe jepi a sma foe meki a waarheid tron wan pisi foe en, e aksi moeiti foe wi sé. Foe loekoe na studi materiaal soso tapoe wan formeel fasi, kan jepi a sma foe kisi sabi, ma a e bribi san ai leri? Jepi a studenti tapoe sortoe fasi na stof abi foe doe nanga en èn san a kan doe nanga a leri. — Kol. 3:10.
6 Loekoe boen gi na trapoe foe meki na takimakandra go na ini tra tori di no abi langalanga foe doe nanga a materiaal di joe o taki foe en. Joe kan taki foe den disi baka a studi. A de ooktoe prenspari gi na studenti foe gi piki nanga en égi wortoe na presi foe lési na piki foe a boekoe. Disi sa jepi joe foe si efoe ai froestan na materiaal ofoe no.
7 Wan boen leriman e poti krakti na tapoe den edeprakseri sodati na studenti no sa lasi den na prakseri. Jezus ben doe disi foe di a ben poti aksi di ben meki sma go denki èn di ben go te na mama foe a tori (Matt. 16:13-16; 17:24-27). Aksi no e jepi wawan foe de séker dati a studenti e froestan a stof ma e tjari ooktoe kon a krin san e libi na ini en ati. Jezus ben meki gebroiki ooktoe foe eenvoudig eksempre di no ben moeilek foe jepi en arkiman foe go denki den sani di a ben taki gi den. — Matt. 13:31-33; 24:32,33.
8 Sorgoe dati joe loekoe na a kaba foe na studi den prenspari tekst ini na overzicht. Poti aksi di sa jepi joe foe si fa a studenti e denki foe san a leri èn meki kon a krin fa a kan tjari san a leri kon ini en libi. Hori, efoe a de fanowdoe, na a bigin foe a tra studi foe joe ete wan sjatoe overzicht foe den ede-punt.
9 Wi e léi sma op foe tron dienstknekti foe Jehovah. Disi no de wan grani wawan ma ooktoe wan serjoesoe frantwortoe. Joe kan meki na kwaliteit foe a leri foe joe foe sma tapoe osobijbelstudi kon moro boen? Wi moe doe ala san wi kan te wi e sreka wisrefi tapoe osobijbelstudi èn te wi e hori den. — 1 Tim. 4:15,16.