Aksi boksoe

◼ Now di wi abi a boekoe Sabi di e tjari joe go na têgo libi, dan o langa wi moesoe hori wan oso-bijbelstudie nanga wan sma?

Wi Kownoekondre Dienst foe september 1993 ben gi leki rai taki wi moesoe go doro nanga na oso-bijbelstudie nanga njoen sma di abi belangstelling teleki wi studeri toe boekoe nanga den. Now di wi abi a Sabi-boekoe, a loekoe leki a de fanowdoe foe tjari wan toe kenki kon, soleki fa dati skrifi tapoe bladzijde 25 nanga 26 foe A Waktitoren foe 1 januari 1996.

A Sabi-boekoe meki foe jepi den wan di ’abi a joisti fasi foe têgo libi’, foe leri den san den moesoe sabi, so taki den kan gi densrefi abra na Jehovah èn teki dopoe (Tori. 13:48). Foe dati ede, baka te joe kaba nanga a njoen boekoe disi, a no sa de fanowdoe foe studeri wan tra boekoe nanga a srefi studenti. Te den bijbelstudenti foe joe e bigin brasa a waarheid hori, dan moro nanga moro joe kan gi den deki-ati foe a go na fesi nanga a sabi foe den, foe di den e fisiti den konmakandra foe Jehovah Kotoigi, so srefi foe di den e leisi bijbel èn difrenti tra kresten poeblikâsi.

Efoe joe sabi den aksi tapoe bladzijde 175 te kon miti 218 foe a boekoe Georganiseerd om onze bediening te volbrengen (Orga foe doe wi diniwroko) heri boen, dan disi kan de wan jepi gi joe. Ala di joe no moesoe sori go tapoe den aksi disi noso loekoe den aksi disi nanga joe bijbel studenti, tokoe a ben o boen efoe joe poti krakti tapoe penti na ini a Sabi-boekoe di sa jepi a studenti foe sori taki a froestan den prenspari bijbel waarheid te den owroeman sa loekoe den aksi nanga sma di wani teki dopoe.

A no de fanowdoe foe poti moro bodoi leki san skrifi na ini a Sabi-boekoe, e gebroiki materiaal di no skrifi na ini a boekoe noso tra penti foe horibaka gi bijbel leri noso foe tjari moro boeweisi kon na krin teige falsi leri. Disi ben sa meki nomo taki a studie e kon moro langa. Na presi foe dati, wi e howpoe taki joe kan kaba a boekoe esi-esi efoe a kan, kande na ini so wan siksi moen. Disi e poti krakti tapoe a de di a de fanowdoe taki wi e studeri a materiaal boen na fesi, so taki wi kan pristeri en krin èn taki sani sjatoe. Na a tra sei a studenti kan kisi tranga foe studeri na fesi, e loekoe ala den tekst di kari, èn meki moeiti foe si krinkrin san a boekoe e leri na ini ibri kapitel.

A Waktitoren poti krakti tapoe a de di a de fanowdoe gi Jehovah Kotoigi foe hori moro foeroe boen bijbelstudie na ini wan moro sjatoe pisiten. (Loekoe Jesaja 60:22.) Te joe e gebroiki a Sabi-boekoe boen, dan dati kan jepi njoen sma foe kisi a sabi di e tjari den go na têgo libi èn foe handri akroederi den sani di den e leri. — Johanes 17:3.