Wan progressief fasi foe hori a tranga fanowdoe wroko foe meki disipel na prakseri
1 Bifo Jesus ben libi grontapoe gowe, a ben gi den bakaman foe en a komando foe „meki disipel foe sma foe ala nâsi”. Disi ben meki taki a ben de fanowdoe foe den go doe wan krakti preikiwroko nanga leriwroko èn bradi a wroko foe den go na heri grontapoe pe sma e libi (Mat. 28:19, 20; Tori. 1:8). Den ben si a komando disi leki wan hebi di moeilijk toemoesi foe tjari? No akroederi na apostel Johanes. Baka 65 jari, di a ben gebroiki leki wan sma di e meki disipel, a ben skrifi: „Bika disi na san a lobi gi Gado wani taki, dati wi e hori den komando foe en; èn tokoe den komando foe en no de wan hebi lai.” — 1 Joh. 5:3.
2 A tori foe bijbel di e taki foe a sani di den fosi kresten ben doe e boeweisi taki, nanga a firi taki a de tranga fanowdoe, den ben wroko na a komando di den ben kisi foe meki disipel foe Jesus Krestes (2 Tim. 4:1, 2). Den ben doe disi, no wawan foe di den ben abi a plekti foe doe so, ma foe a lobi lostoe foe den foe prèise Gado èn foe tjari a howpoe foe froeloesoe gi tra sma (Tori. 13:47-49). Foe di ala sma di ben tron disipel, densrefi ben kon tron mekiman foe disipel baka ten, meki a kresten gemeente ben gro gawgaw na ini a fosi jarihondro. — Tori. 5:14; 6:7; 16:5.
3 A wroko foe meki disipel e go moro gaw: Na ini a di foe 20 jarihondro disi, a moro bigi wroko foe ala ten foe meki disipel, e doe now! Te leki now, miljoenmiljoen sma teki a boen njoensoe èn doe wan sani na tapoe dati (Luk. 8:15). Foe di a ten e lon gowe libi a seti foe sani foe disiten, meki „a getrow èn koni srafoe” gi wi wrokosani di e meki taki a kan dati sma nanga wan krin ati kan leri a waarheid gawgaw. — Mat. 24:45.
4 Na ini 1995 wi ben kisi a boekoe Sabi di e tjari joe go na têgo libi, èn na ini 1996 a brochure San Gado e aksi foe wi? waka na en baka. Foe a Sabi-boekoe, De Wachttoren foe 1 januari 1996 ben taki na bladzijde 14: „Wi ben kan studeri a boekoe disi di abi 192 bladzijde na ini wan sjatoe pisi ten, te joe teki en gersi tra boekoe. Èn den sma di ’abi a joisti fasi gi têgo libi’, moesoe man foe leri nofo foe a studie disi, so taki den kan gi densrefi abra na Jehovah èn teki dopoe.” — Tori. 13:48.
5 Na inlegvel foe Wi Kownoekondre Dienst foe juni 1996, „Fa foe meki disipel nanga jepi foe a Sabi-boekoe”, ben poti leki marki na wi fesi: „Akroederi a situwâsi foe a sma nanga a fasi fa a studenti man leri, kande joe sa man doe a moro bigi pisi foe ibri kapitel ini wán leisi na ini wan sani foe wán joeroe, sondro foe doe a studie toemoesi esi. Studenti sa go moro boen na fesi te a leriman nanga a studenti e hori densrefi na a mofo di den ben meki foe studeri ibri wiki.” Na artikel ben go doro foe taki: „Wi moesoe froewakti taki na a ten taki wan sma kaba wan studie nanga jepi foe a Sabi-boekoe, taki en opregtifasi nanga a dipi foe a belangstelling di a abi foe dini Gado sa kon de foe si.” Na Aksi boksoe na ini Wi Kownoekondre Dienst foe oktober 1996 ben froeklari: „Wi e froewakti taki na ini wan moro sjatoe pisi ten, wan boen leriman sa man jepi wan boen opregti studenti foe kisi nofo sabi foe teki wan koni bosroiti foe dini Jehovah.”
6 A Sabi-boekoe abi winimarki: Na a okasi foe a dopoe foe wan jongoe oema, a ben froeteri fa a ben firi di a ben e studeri a Sabi-boekoe. A ben de wan pisi ten di a ben e studeri a Libi foe têgo-boekoe. Di den ben tjari a Sabi-boekoe kon na doro, a sisa di ben hori a bijbelstudie, ben abra go na a njoen boekoe. Heri esi a studenti ben kan froestan taki disi ben sa aksi taki a moesoe teki wan bosroiti foe a sei foe en, èn foe a momenti dati sani ben boeweigi en foe go gawgaw na fesi. A jongoe oema, di de wan sisa now e taki: „A Libi foe têgo-boekoe ben jepi mi foe lobi Jehovah, ma a Sabi-boekoe jepi mi foe teki a bosroiti foe dini en.”
7 Loekoe o gaw wan tra oema ben leri sabi a waarheid. Baka a di foe toe studie foe en, a ben fisiti wan konmakandra na ini a Kownoekondre zaal na a ten foe a fisiti foe a kringopziener. A wiki dati, na a di foe dri studie foe en, a taigi en taki a gi ensrefi abra na Jehovah èn taki a wani tron wan preikiman di no dopoe. A ben kon makandra nanga den owroeman, di ben feni en boen foe a de wan preikiman, èn a tra wiki a ben bigin nanga a velddienst. A ben kon de so dipi ini a bijbelstudie foe en dati a teki verlof foe a wroko foe en so taki a ben kan studeri toe noso dri tron wan wiki èn foe gebroiki moro ten na ini a diniwroko. Son tron den ben studeri toe noso dri kapitel wan leisi. Ini ala kontren foe en libi a ben bigin doe san a ben e leri, a ben kaba a Sabi-boekoe ini fo wiki èn a ben go na fesi foe teki dopoe!
8 A masra foe wan sisa e taki foe ensrefi leki a ben de „soifri wan trowpatna di no e bribi”. Wan dei, wan brada pristeri en wan bijbelstudie na ini a Sabi-boekoe nanga a kondisi taki a kan stòp baka na fosi studie noso iniwan ten baka dati. A masra ben agri foe proeberi, ala di a no ben kisi foeroe skoroleri di a ben jongoe èn a no ben studeri no wan sortoe relisi boekoe moro leki 20 jari langa. Fa a ben handri di a ben e studeri a Sabi-boekoe? A ben taki: „A ben de wan troetroe prisiri foe kon si taki a bijbel jepi disi ben skrifi na so wan koemakriki fasi. Den bodoi ben skrifi so krin èn na wan fasi di sma kan froestan, dati heri esi mi ben e loekoe go na fesi nanga bigi froewakti na a tra studie foe wi. A sma di ben e leri mi ben e waka na wan heri boen fasi baka den fasi foe meki disipel di a Genootschap ben skrifi, èn nanga jepi foe a santa jeje foe Jehovah mi ben teki dopoe fo moen baka dati. Mi kan taki troetoe dati, efoe wi e kweki wan lobi foe meki disipel, e go doro foe soekoe den sma di abi wan reti-ati na ini a diniwroko foe a veld, e gebroiki a Sabi-boekoe èn tra bijbel jepi di a Genootschap e gi, èn san de moro prenspari, e begi foe kisi a tiri foe Jehovah, dan wi kan abi a spesroetoe grani foe e jepi foe meki disipel.” Den sani di skrifi na tapoesei de ondrofenitori di de toemoesi aparti. A moro bigi ipi foe den studenti foe wi no e kon so gaw na ini a waarheid.
9 A fasi fa studenti e go na fesi e difrenti: Wi moesoe agri taki den bekwaamfasi foe den sma di e gi leri nanga di foe den wan di e kisi a leri kan difrenti srefisrefi. A gro na jejefasi kan go safri noso gaw. Son studenti e go moro gaw na fesi leki trawan na ini wan toe moen. A krakti foe a gro foe wan sma na jejefasi e go nanga a leri di a kisi na fesi, nanga o dipi a e warderi jeje afersi, èn nanga o dipi a gi di a e gi ensrefi na ini a dini foe Jehovah de. A no ala sma di wi e studeri nanga den „de moro boen na jejefasi” foe studeri den Santa Boekoe ibri dei, so leki fa den fositen Bereasma di ben tron bribiman ben doe. — Tori. 17:11, 12.
10 Dati meki taki na inlegvel foe Wi Kownoekondre Dienst foe april 1998 „Wi e soekoe — moro bijbelstudie”, e gi a bodoi disi leki fa a de troetroe: „A troe, taki a no ala studenti foe bijbel e go na fesi na a srefi fasi. Son wan no abi a firi gi jeje sani leki trawan, noso den no de so gaw foe teki den sani di den e leri na ini den. Trawan abi wan toemoesi druk libi èn kande den no ben man gi a ten di de fanowdoe foe kaba wan heri kapitel ibri wiki. So boen, na ini son kefal a kan de fanowdoe foe teki moro leki wán studie-joeroe foe studeri son kapitel nanga a sma èn a kan teki wan toe moen moro foe kaba a boekoe.”
11 Sma di e meki disipel e tan abi wan balansi fasi foe si sani: A de fanowdoe foe wegi a gaw di a studie e go akroederi den situwâsi foe a studenti nanga a leri di a studenti man leri. Foe di wi kisi a deki-ati foe bigin studie nanga a San Gado e aksi-brochure, a kan teki so wan toe noso dri moen foe kaba en bifo wi go abra na a Sabi-boekoe. Efoe wi gebroiki ala den rai di skrifi ini na inlegvel foe Wi Kownoekondre Dienst foe juni 1996, dan a sa kan teki ete siksi te neigi moen foe kaba a Sabi-boekoe. Son sma di ben bigin wan studie na ini a Sabi-boekoe no so langa ete, abra go na a San Gado e aksi-brochure foe jepi a studenti foe leri den fondamenti bijbel waarheid moro esi. Dan den ben doe a studie ini a Sabi-boekoe baka. Efoe wan studie ben bigin ini a Sabi-boekoe èn a ben e waka boen, dan a sa kan abi wini foe studeri a San Gado e aksi-brochure baka te a studie ini a Sabi-boekoe kaba, so boen wan gawgaw loekoe baka foe den gron waarheid foe Gado Wortoe. Na ini ala den toe kefal, wi no wani òfer a kon froestan krin di a studenti moesoe kon froestan sani krin nomo foe di a boekoe moesoe kaba studeri gawgaw. Ibri studenti abi wan steifi fondamenti fanowdoe foe a njoen bribi di de foe feni na ini a Wortoe foe Gado.
12 Foe di wi sabi pe wi de na ini a ten disi di e go doronomo, dan a de moro tranga fanowdoe foe leri tra sma kon sabi a waarheid leki iniwan ten bifo. Boiti taki wi e begi doronomo foe bigin njoen bijbelstudie, meki wi begi gi den sma di e studeri kaba nanga wi. Dan a sa de a prisiri foe wi foe tan dopoe moro disipel „ala den dei te na a kaba foe a seti foe sani”. — Mat. 28:20.