„Fa Mi Ben Sa Man . . . Efu No wan Sma E Sori Mi?”
1 Di na evangelie preikiman Filipus ben aksi na Etiopia eunuch efu a ben frustan san a ben leisi fu Gado Wortu, dan a man ben piki: „Fa mi ben sa man du dati dan, efu no wan sma e sori mi?” Nanga prisiri Filipus ben yepi en fu frustan a bun nyunsu fu Yesus, èn fu dati ede a man ben teki dopu wantewante (Tori. 8:26-38). Filipus ben e du a wroko di Krestes ben gi fu ’meki disipel fu sma fu ala nâsi, fu dopu den èn fu gi den leri’.—Mat. 28:19, 20.
2 Neleki Filipus wi musu du a wroko fu meki disipel. Ma toku a no ala ten wi e si taki den sma di e studeri Bijbel nanga wi, e go so esi na fesi na yeye fasi leki na Etiopia eunuch. A man dati, di ben teki a Dyu bribi èn di ben sabi den Buku fu Bijbel bun, ben abi wan safu ati èn a ben abi fu frustan nomo taki Yesus ben de a pramisi Mesias. A de wan tyalensi efu den sma di e studeri Bijbel nanga wi no sabi a Buku disi èn de nanga falsi kerki leri di kori den noso efu den de nanga den eigi problema fu den di de wan hebi gi den. San sa yepi wi so taki wi man yepi bijbelstudenti fu gi densrefi abra èn teki dopu?
3 Si a Yeye Nowtu fu a Bijbelstudenti: Na inlegvel fu Wi Kownukondre Dienst fu augustus 1998 ben taki o langa wi ben sa kan studeri nanga sma, te wi e gebroiki a San Gado e aksi-brochure èn a Sabi-buku. A ben gi a rai disi: „A de fanowdoe foe wegi a gaw di a studie e go akroederi den situwâsi foe a studenti nanga a leri di a studenti man leri. . . . Wi no wani òfer a kon froestan krin di a studenti moesoe kon froestan sani krin nomo foe di a boekoe moesoe kaba studeri gawgaw. Ibriwan studenti abi wan steifi fondamenti fanowdoe foe a njoen bribi di de foe feni na ini a Wortoe foe Gado.” Fu dati ede, a no de wan bun sani fu studeri den kapitel na ini a Sabi-buku esi-esi nanga a prakseri fu pruberi fu kaba a buku ini siksi mun. Kande moro leki siksi mun de fanowdu fu yepi son sma fu go na fesi so taki den kan teki dopu. Te yu e hori a studie ala wiki, dan teki awansi omeni ten yu abi fanowdu fu yepi a studenti fu frustan èn fu teki den sani di a e leri fu Gado wortu. Sontron, a kan taki tu noso dri wiki de fanowdu fu du wan kapitel fu a Sabi-buku. Disi sa meki taki yu abi ten fu leisi èn fu fruklari furu fu den tekst di kari.—Rom. 12:2.
4 Ma efu yu e si taki a studenti musu frustan a waarheid moro bun baka di yu kaba studeri a Sabi-buku nanga en noso efu yu e si taki a no abi na overtoigi ete fu teki wan bosroiti gi a waarheid èn gi ensrefi abra na Gado, dan san yu kan du dan? (1 Kor. 14:20) San yu kan du moro fu yepi a studenti fu waka a pasi fu libi?—Mat. 7:14.
5 Gi a Bijbelstudenti San A Abi Fanowdu na Yeye Fasi: Efu a de fu si taki wan sma e go na fesi, awansi dati no e pasa esi-esi, èn efu a de fu si taki a e kisi moro warderi gi san a e leri, dan tan gi a sma bijbelstudie fu di yu e gebroiki a di fu tu buku, baka di yu kaba nanga a San Gado e aksi-brochure èn a Sabi-buku. Kande dati no de fanowdu na ini ala situwâsi, ma efu a de fanowdu, dan go doro nanga a studie fu di yu e gebroiki a Ware vrede-buku, a Verenigd in de aanbidding-buku (De Wán ini na Anbegi-buku), noso a Gods woord-buku. Furu preikiman abi wan tu fu den buku disi gi densrefi, di den kan gebroiki efu a gemeente no abi moro. A Gods woord-buku na a wan enkri buku di yu kan seni aksi a bijkantoro. Ma a San Gado e aksi-brochure èn a Sabi-buku sa studeri fosi nanga ala sma di wani studeri. A ten di yu ben gebroiki fu hori a bijbelstudie, fu tyari gobaka èn fu studeri nanga wan sma, musu teri èn skrifi na tapu a raportu, srefi efu a studenti e teki dopu bifo a kaba a di fu tu buku.
6 Dati wani taki dati den wan di ben teki dopu no so langa pasa, ma di ben studeri soso wan buku musu kisi yepi baka fu studeri a di fu tu buku? A no abi fu de so. Ma kande den no e preiki moro noso kande den no go na fesi na ini a waarheid, èn den e firi kande taki den abi yepi fanowdu fu fiti a waarheid moro bun na ini den libi. Bifo wan sma e studeri baka nanga wan dopu preikiman, dan a musu aksi a dienstopziener rai. Ma efu yu sabi wan tu sma di fosi ben studeri a Sabi-buku, ma di noiti ben go so fara taki den ben gi densrefi abra èn teki dopu, dan kande yu ben kan go luku efu den ben sa wani bigin wan bijbelstudie baka.
7 A de wan buweisi fu Kresten lobi taki wi e poti furu prakseri na ibri sma di wani leri sani èn di e studeri Bijbel nanga wi. A marki fu wi na fu yepi a studenti fu frustan a waarheid fu Gado Wortu moro bun. Dan a kan teki wan fasti bosroiti gi a waarheid fu di a abi nofo sabi. Boiti dati, dan a kan gi en libi abra na Yehovah èn a kan teki dopu na ini watra.—Ps. 40:8; Ef. 3:17-19.
8 Yu e memre san ben pasa baka di na Etiopia eunuch ben teki dopu? „A ben rei go moro fara nanga prisiri” leki wan nyun disipel fu Yesus Krestes (Tori. 8:39, 40). Meki a de so taki wi, makandra nanga den wan di wi e yepi fu waka a pasi fu waarheid bunbun, e feni bigi prisiri na ini a dini fu Yehovah Gado — now èn fu têgo!