„Disi wani taki têgo libi”
1 Wi moesoe si den wortoe foe Jesus, di skrifi na Johanes 17:3, leki wan serjoesoe sani. A no ben meki spotoe — taki te wi e teki sabi foe Gado èn foe Krestes, dan dati wani taki têgo libi! Ma na a sabi wawan di wi abi foe Jehovah èn foe Jesus, sa gi wi a pai foe têgo libi? Nôno. Den Israèlsma ben sabi taki Jehovah na den Gado, ma a fasi fa den ben libi no ben sori a sani dati. Leki wan bakapisi foe dati, den ben lasi a boen-ati foe Gado (Hos. 4:1, 2, 6). Na ini a ten disi miljoenmiljoen sma kande „abi faja gi Gado; ma no akroederi soifri sabi” (Rom. 10:2). Den moesoe kon leri sabi Jehovah, „a wan-enkri troe Gado”, èn den moesoe leri fa foe dini en na wan joisti fasi. Foe man doe dati, na ini november wi sa pristeri a boekoe Sabi di e tjari joe go na têgo libi. Sortoe bigin joe sa gebroiki foe pristeri a Sabi-boekoe? Djaso wan toe idea de di kan jepi joe.
2 Foe di na idea foe têgo libi na grontapoe de wan njoen sani gi moro foeroe sma, meki a bigin disi ben sa kan hari a belangstelling foe den:
◼ „Wi e aksi den birtisma foe wi wan sani. Efoe joe ben kisi a kari foe libi foe têgo na tapoe so wan grontapoe, joe ben sa teki a kari? [Sori a prenki tapoe den bladzijde 4-5 na ini a Sabi-boekoe. Gi okasi foe piki.] Disi troetroe kan tron joe prisiri ondrofeni na ini a libi. Ma san joe e prakseri taki joe moesoe doe foe meki a tron wan troetroe sani gi joe? [Gi okasi foe piki.] Loekoe san wi moesoe doe akroederi Johanes 17:3. [Leisi.] A boekoe disi e jepi foeroe sma foe kisi a spesroetoe sortoe sabi disi. Joe ben sa wani abi wan foe den boekoe disi gi joesrefi foe leisi? [Gi okasi foe piki.] Te mi kon baka, dan wi kan taki foe san ede a de reidelek foe bribi taki wi kan kisi têgo libi leti djaso na grontapoe.”
3 Te joe go baka foe fisiti den sma nanga soema joe ben taki foe Johanes 17:3, joe ben sa kan go doro na a fasi disi:
◼ „A lasti tron di mi ben de na joe, mi ben leisi den moi wortoe foe Jesus gi joe na Johanes 17:3, pe a ben gi wi a djaranti taki a teki di wi e teki sabi foe Gado èn foe en, wani taki têgo libi. Ma foeroe sma e bribi taki soso na ini hemel wi kan kisi wan moro betre libi. San joe e prakseri foe dati? [Gi okasi foe piki.] Efoe a boekoe di mi ben libi gi joe de krosibei, dan mi ben sa wani sori joe wan toe bijbeltekst di e boeweisi taki a paradijs sa kon njoen baka na grontapoe. [Taki foe paragraaf 11-16 tapoe bladzijde 9 nanga 10 na ini a Sabi-boekoe.] Te mi kon baka, dan mi ben sa wani sori joe foe san ede joe kan bribi den pramisi disi di de foe feni na ini bijbel. Bifo dati, kande joe ben kan leisi kapitel 2 ini a boekoe foe joe.”
4 Disi na wan pristeri di joe wani gebroiki kande gi sma di lobi kerki:
◼ „Wi taki nanga wi birtisma foe san ede so foeroe difrenti sortoe relisi de na grontapoe. Sowan 1200 relisi groepoe de na ini Amerkankondre wawan, èn moro leki 10.000 na heri grontapoe. Ma tokoe wán bijbel nomo de. Foe san ede a broeja disi foe relisi de, joe e denki? [Gi okasi foe piki. Opo a Sabi-boekoe na kapitel 5 èn leisi paragraaf 1.] Joe sa kisi boen piki na tapoe den aksi dati te joe e leisi a kapitel disi. Mi ben sa wani srefisrefi foe libi a boekoe gi joe efoe joe wani ondrosoekoe en.” Efoe a sma teki a boekoe, meki mofo krinkrin foe go baka, èn taki: „Te mi kon baka, kande wi ben kan taki efoe a de so dati ala relisi na difrenti pasi nomo di e tjari sma go na a srefi presi.”
5 Te joe go baka foe go doro nanga a takimakandra foe san ede someni relisi de, joe ben kan taki disi:
◼ „A lasti leisi di mi ben taki nanga joe, mi ben poti na aksi efoe a de so dati ala relisi na nomo difrenti pasi di e tjari sma go na a srefi presi. San joe e prakseri foe dati? [Gi okasi foe piki.] Mi ben sa wani sori joe na ini a boekoe di mi ben libi gi joe, san Jesus ben taki foe a tori disi. [Go na kapitel 5 na ini a Sabi-boekoe, èn leisi paragraaf 6 nanga 7, èn so srefi Mateus 7:21-23.] Kande joe e aksi joesrefi foe san ede a de so prenspari foe sabi soifri san na a wani foe Gado. Joe sa si taki den tra paragraaf kan leri wi foeroe. Grantangi leisi a tra pisi foe a kapitel disi. Tra leisi te mi kon, mi sa wani srefisrefi foe sori joe a waarde foe abi soifri sabi foe bijbel.”
6 Foeroe tron a abi boen bakapisi foe bigin wantewante nanga bijbelstudie. Disi na wan fasi foe bigin èn di de foe si tapoe bladzijde 12 foe a „Redeneren”-boekoe (Taki-go-taki-kon boekoe):
◼ „Mi kon fisiti joe foe pristeri joe wan bijbel lès na oso, sondro foe joe pai gi dati. Efoe joe wani, mi ben sa wani gebroiki wan toe miniti nomo foe sori joe fa sma na ini moro leki 200 kondre e taki foe bijbel na oso leki osofamiri groepoe. Wi kan gebroiki iniwan foe den tori disi leki wan fondamenti gi wan takimakandra. [Sori den kapitel na ini a Sabi-boekoe.] Sortoewan e hari joe spesroetoe?” Wakti meki a sma teki wan foe den. Go na a kapitel di a sma teki, èn bigin a studie nanga a fosi paragraaf.
7 Disi na wan tra fasi di abi boen bakapisi èn di joe ben kan proeberi foe bigin wantewante nanga studie:
◼ „Mi e gi bijbel lès na sma, sondro foe den pai gi dati èn mi abi ten gi moro studenti. Disi na a boekoe di wi e gebroiki leki wan jepi foe studeri bijbel. [Sori a Sabi-boekoe.] A e teki wan toe moen nomo foe studeri en èn a e gi piki tapoe den aksi soleki: Foe san ede Gado e gi pasi meki pina de? Foe san ede wi e kon owroe èn dede? San e pasa nanga den lobiwan foe wi di dede? Èn fa wi kan kon krosibei na Gado? Aksi na baka dati: „Mi kan sori joe fa a studie e go?” Efoe a sma no wani teki a studie di joe pristeri en, dan aksi en efoe a ben sa wani a Sabi-boekoe, so taki a kan leisi en gi ensrefi. Efoe a e pramisi foe leisi en, dan joe kan libi wan eksemplaar.
8 A soifri sabi foe Gado èn foe Krestes de wan bigi goedoe gi ibriwan sma di abi en! Te wi e teki en na ini wi, dan dati wani taki troetroe têgo libi na ini volmaakti situwâsi. Meki wi gebroiki ibri okasi na ini november foe prati nanga tra sma a sabi di e tjari wi go na têgo libi.